«Газпром межрегионгаз Черкесск», «Газпром газораспределение Черкесск» щIыуэпс компанэхэм я еплIанэ Зыуэ щыт клиент купсэ Къэрэшей-Черкес Республикэм къыщызэIуахащ. Ар иджы Хьэбэз къуажэм щылэжьэнущ. IуэхущIапIэщIэр къызэIухыным хэтащ Хьэбэз муниципальнэ район администрацэм и ӏэтащхьэ Жу Тимур, «Газпром межрегионгаз Черкесск» ООО-м и генеральнэ унафэщӏым и къуэдзэхэу Рожнов Игорь, Кузнецов Михаил, а ӏуэхущIапӏэм Хьэбэз районым щиӏэ къулыкъум и унафэщӏ Амирокъуэ Хьэмелэ сымэ.
Хьэбэз районым IуэхущIапIэщIэ къызэрыдэувам, абы цIыхухэмкIэ мыхьэнэ хэха зэриIэм къытепсэлъыхьащ Жу Тимур. Абы къыхигъэщащ щIыуэпс компанэхэм я лэжьыгъэр зэгъэуIуауэ районым зэрыщызэфIахыр, лъэныкъуэ куэдкIэ цIыхухэм гулъытэ зэрырагъэгъуэтыр. Купсэм и пэш Іэхуитлъэхуитышхуэм хьэщIэхэр ирагъэблэгъащ. Мыбдеж щхьэгъубжитIым цIыхухэр зэрекIуэлIэнум псори трагъэпсыхьащ. Нэрыбги 10 зэ щIыхьэгъуэу щIэтыфынущ, сабий зи гъусэхэм папщIэ щысыпIэ — джэгупIэ щIыпIэхэри къызэрагъэпэщащ. Купсэм щылажьэхэм къызэралъытэмкIэ, илъэсым къриубыдэу цIыху мини 5,2-м нэс зыхуейм хуагъэзэфыным IуэхущIапIэр тегъэпсыхьащ. Купсэм и япэ клиенту ягъэхьэщІащ район администрацэм и Iэтащхьэр. IуэхущIапIэм и лэжьакIуэм Жу Тимур щигъэгъуэзащ мыбдеж щызригъуэтыфыну хуэIухуэщIэхэм, ахэр зэрыт памяткэр къыхуигъэфэщащ, зыщIэупщIахэми я жэуап къритащ. АтIэ, Хьэбэз районым щыпсэухэм клиент купсэм лъэкIыныгъэ къаритынущ щIыуэпс гъуэзым ехьэлIа сыт хуэдэ хуэIухуэщIэри нэгъэсауэ зыIэрагъыхьэну. Абы хеубыдэ ухуэныгъэ-монтаж лэжьыгъэхэр, газификацэм, догазификацэм, счетчикым кIэлъыгъэплъыным, зэрегъэхъуэкIыным ехьэлIа Iуэхухэр, щIыуэпс гъуэзым и уасэр тыныр, тарифхэм зыщыгъэгъуэзэныр, нэгъуэщI куэди. «Газпром газораспределение Черкесск» ООО-м и Зыуэ щыт клиент купсэм и хэщӏапӏэр: Хьэбэз къуажэ, Заводская уэрам, 27-нэ унэ.
АСЛЪЭНЫКЪУЭ Мадинэ
Больше на Черкес хэку
Подпишитесь, чтобы получать последние записи по электронной почте.
