ХИМИК цIэрыIуэм и щIыхькIэ

Черкесск къалэр илъэс 200 зэрырикъур зэрагъэлъапIэм къриубыдэу Социалистическэ ГуащIэдэкIым и ЛIыхъужь Цахилов Захар Сослъэнбэч и къуэм и фэеплъыр мыкIуэдыжыну яхъумащ — абы и цIэр къалэм дэт е 20-нэ еджапIэм фIащащ. ЩIэныгъэм и Махуэм еджапIэм щрагъэкIуэкIа дауэдапщэм КъЧР-м и Iэтащхьэ Темрезов Рэшид хэтащ.

СССР-м щIыхь зиIэ и химик, и къэхутакIуэ, Лениным и орденитIым я кавалер, Черкесск къалэм щIыхь зиIэ и цIыху Цахилов Захар Сослъэнбэч и къуэм и хэгъуэгуми и къалэми я зыужьыныгъэм хуищIа хэлъхьэныгъэр къэлъытэгъуейщ. ИкIи а махуэм цIыху щыпкъэм и цIэр еджапIэ къудейракъым, атIэ, къалэм и Ищхъэрэ районым и уэрамми фIащащ.

ГуфIэгъуэ зэIущIэм къеблэгъащ КъЧР-м егъэджэныгъэмрэ щIэныгъэмрэкIэ и министр Кравченко Иннэ, Черкесск къалэм и мэр Баскаев Алексей, Цахилов Захар и Iыхьлы гъунэгъухэр, егъэджакIуэхэр, адэ-анэхэр, еджакIуэхэр. КъЧР-м и Iэтащхьэм зи IуэхущIафэхэмкIэ, Хэкум псэемыблэжу хуэлэжьэнымкIэ щапхъэ тхуэхъу цIыху щыпкъэм и цIэр мыкIуэдыжыну хъума зэрыхъуар мы махуэр нэхъри лъапIэ зыщI Iуэхугъуэу зэрыщытыр жиIащ.

— Захар Сослъэнбэч и къуэр лIыщIыгъуэ ныкъуэм щIигъукIэ Черкесск къалэм и предприятэ нэхъ лъэрыхь дыдэхэм я унафэщIу щытащ. Абы къалэм и зыужьыныгъэм хэлъхьэныгъэшхуэ хуищIащ. Медикосанитар частым, санаторэпрофилакторэм, апщыгъуэм профтехучилищэм, сабий IыгъыпIэхэм, къату зэтет унэхэм я ухуэныгъэхэр къызыбгъэдэкIар аращ. Ар псоми къащхьэщыкIт и IэщIагъэ зэхэщIыкIымкIэ, и ткIиягъымкIэ, абы къыдэкIуэуи цIыхум хэлъ лъапIагъэхэмкIэ — жэуаплыгъэкIэ, сакъыныгъэкIэ, гулъытэкIэ, цIыхугъэкIэ. Ауэ, нэхъыщхьэу Захар Сослъэнбэч и къуэм и гъащIэр зыгъэбеяр, гъунапкъэншэ лъапIагъэу иIар — ар и хэкуэгъухэм, лэжьэгъухэм, куэд хъу и акъылэгъухэм, ныбжьэгъухэм, и лъэужьыр зыхухэм къыхуаIа лъагъуныгъэмрэ пщIэмрэщ, — жиIащ Темрезов Рэшид. КъЧР-м и Iэтащхьэм къыхигъэщащ ар гу къабзэ, жэуаплыгъэ ин, цIыху пэжу зэрыщытар, цIыхухэм гулъытэшхуэ зэрахуищIар. А цIыху щыпкъэм щIыхьрэ фIылъагъуныгъэу къыхуащIу щытар мыкIуэдыжын щIэинщ.

ЕджакIуэхэм захуигъазэкIэрэ Темрезов Рэшид щIалэгъуалэр къыхуриджащ я хуэкуэгъу апхуэдэ цIыхухэм я лIыхъужьыгъэмрэ ехъулIэныгъэмрэ фIыуэ зэрагъэщIэну. — Феджэ, федаIуэ, фигу ивубыдэ — адэкIи къытщIэхъуэну щIэблэм янэфхьэс! Апхуэдэ дыдэущ щIэныгъэр, тхыдэр, ди гъащIэр зыухуахэм я щIыхьыр хъума зэрыхъур. Фызыщалъхуа щIыпIэм фыхуэлэжьэнымкIэ, Iуэхушхуэхэр зэфIэхыным фытегушхуэнымкIэ Цахилов Захар щапхъэ фхурехъу, — жиIащ ди хэгъуэгум и лIыщхьэм.

Цахилов Захар и гъащIэ гъуэгуанэм щигъэгъуазэу и гукъэкIыжхэмкIэ а махуэм ядэгуэшащ ипхъу Уртаевэ Маринэ.

— Си адэм и гъащIэр химическэ промышленностым триухуащ. Ар илъэс 55-м щIигъукIэ къэралым щынэхъ ин дыдэхэм щыщ Черкесск химическэ производствэ зэгухьэныгъэм и унафэщIу щытащ. Ар пашагъэ быдэ зыхэлът, и Iуэхум хуэпэжт. Сыт щыгъуи телэжьащ хэгъуэгум и мызакъуэу, къэралым и зыужьыныгъэм. И гуащIэдэкI лэжьыгъэмкIэ къэрал нагъыщэхэмкIэ и цIэр къыхагъэщащ, республикэмкIи къэралымкIи хэкупсагъэ ин хэлъу щытащ. Черкесск, пса лъэ хэмылъу, зыми пимыщI и къалэт, — къыхигъэщащ Уртаевэ Маринэ.

Урысей Федерацэм и егъэджэныгъэм пщIэ щызиIэ и лэжьакIуэ, КъЧР-м щIыхь зиIэ и егъэджакIуэ ПIапIшу Сэрмэдан къыщыпсалъэм жиIащ республикэм къыщымынэу ди хэкуэгъум и цIэр жыжьэ зэрыIуар, икIи хэгъуэгур щIэрэщIэнымкIэ а цIыхушхуэм хэлъхьэныгъэу хуищIар къызэрылъытэгъуейр. Абы хэту еджапIэм «япэ уэзджынэм» и макъыр къэIуащ еджэгъуэ илъэсыщIэр зэрырагъэжьам и щыхьэту. КъыкIэлъыкIуэу, КъЧР-м и Iэтащхьэмрэ Цахиловым ипхъумрэ хуагъэфэщащ еджапIэм и щIыхьэпIэ нэхъыщхьэм щыфIалъа, Цахилов Захар и фэеплъ пхъэбгъуркъызэIуахыну.Иужьым, гъащIэр гуащIэдэкIым, Хэкум хуэпэжынымрэ фIыуэ лъагъунымрэ я нагъыщэ хъуа цIыху щэджащэм и фэеплъым и лъабжьэм къекIуэлIахэм удз гъэгъахэр щагъэтIылъащ.

Дауэдапщэм и кIэм Темрезов Рэшид еджапIэщIэр къиплъыхьащ. ЕджапIэ пэшхэр, спортзалыр, шхапIэр зэрызэтрагъэпсыхьар зригъэлъэгъуащ. Лъэныкъуэ куэдымкIэ зэманым декIуу зэтрагъэпсыхьа еджапIэми гуэдзэ егъэджэныгъэм и программэ убгъуами мыбдеж щеджэнухэм лъэкIыныгъэщIэхэр зэраритыр къыхигъэщащ. ЩIэупщIащ еджакIуэхэр зыдихьэх лъэныкъуэхэм, я творческэ, щIэныгъэ зэфIэкIыр здынэсым.

БОРЭНЫКЪУЭ Мадинэ