Хэкур къыщоджэкIэ

ВЬЮГИН Сергей — контракткIэ дзэм къулыкъу щызыщIэнухэр къыздыхах пунктым и инструктор нэхъыжьщ:

— Сэ мы зэманым сыщолажьэ Урысей Федерацэм зыхъумэжыныгъэмкIэ и Министерствэм контракткIэ къулыкъу хуэзыщIэну тезубыдахэр къыздыхах, здагъэхьэзыр военнэ IуэхущIапIэу Черкесск къалэм дэтым. Контракт тхылъым Iэпэ щIэдзыным ипэ къихуэ Iуэхугъуэхэр къызэнэкIынымкIэ пунктым къекIуа лIэхэм садэIэпыкъуну си пщэ илъщ. 2010 гъэм сэри къулыкъу щысщIащ дзэм. 2022 гъэм и мазае мазэми сыщыIащ зауэ операцэ хэхар здызэхаубла щIыпIэхэм. Абы ипэкIэ Ставрополь къалэм си къулыкъур щесхьэкIыу, дзэ пакIэм сыхэту, Херсон лъэныкъуэм сихьащ. Абдеж я гугъуагъкIэ зэщхьэщыкI къалэнхэр къыщытхуащI къэхъут, уеблэмэ гужьеигъуи, шынагъуи дыхэхуэу. Ауэ, хэкупсагъэрэ псэ къарууэ тхэлъым дыкъигъэлэнджакъым.

Мэлыжьыхь мазэращ япэу уIэгъэ сыщащIар. УIэгъэщ зыбжанэм сыщIэлъащ си лъэ сытеувэжыху. Сызэрыхъужу фронтым сыIухьэжати, зытIэкIу текIри сагъэкIуащ си узыншагъэм и щытыкIэм дохутырхэр кIэлъызгъэплъыну икIи ткIийуэ къызжаIащ зэуапIэм сихьэж мыхъуну, «А» категориери страхыжри «В» къызатащ.

Иужьым, Черкесск къалэм контракткIэ къулыкъу зыщIэнухэр къыздыхах пунктым инструктор нэхъыжьу сыщылэжьэну сыкъагъэкIуа хъуащ сызыхэт дзэ пакIэм и унафэщIым и чэнджэщкIэ. Къэрэшей-

Черкесым и къалащхьэм си унагъуэкIэ сыкъэкуэшыжауэ, бынитIи къысщIэхъуэжауэ сыщопсэу.

Сэ солъагъу, республикэм ит военкоматхэм къулыкъум дэкIыну хуейуэ цIыху куэд зэрекIуалIэр. Хэти хуейщ зауэ-хыдзэм кIуэну, хэти мэхъуапсэ лъэсыдзэм хыхьэну. ГъэщIэгъуэнращи, УФ-м зыхъумэжыныгъэмкIэ и Министерствэм контракт зэгурыIуэныгъэр дэзыщIхэм яхэтщ къэрал къулыкъухэм къабгъэдэкIахэри: МВД-м, хьэкум приставхэм, ФСИН-м я лэжьакIуэхэр.

Дауэ щымытми, къулыкъум и нэхъыбэм дэкI хабзэщ Хэкум и къэкIуэнур зэрыхъунум тегузэвыхь къызэрыкIуэ щIалэхэр. Сэ къызэрыслъытэмкIэ, дэтхэнэ цIыхухъуми IэщэкIэ Узэда Къарухэм хэтыныр къалэн пажэу къыхуэувхэм ящыщщ — атIэ, уи Хэку къыщоджэкIэ, къулыкъу хуэпщIэу уи щIыхуэр зытебгъэкIыжын хуейщ. Мы къэралращ псори дыкъыздэхъуар икIи дыздапIар.

Мыбы лъэпкъыу исыр, хэгъуэгуу щыIэр къэралым и хъумакIуэщ.

ЛЫХЬ Тимур