Хэкупсэ тхылъым къилъэща саугъэтыр

Ди республикэм апхуэдэ хабзэ щыгъэуващи, илъэситI къэс зэ хэгъуэгум щыпсэу лъэпкъхэм къахэкIа творческэ интеллигенцэм къагъэщIа тхыгъэ нэхъыфIхэр зэпеуэм ипкъ иту къыхах, абыхэм я авторхэм литературэмрэ гъуазджэмрэкIэ Къэрэшей-Черкес Республикэм и Iэтащхьэм и саугъэтыр хуагъэфащэ. Апщыгъуэми, гу зылъытапхъэщи, мыхьэнэшхуэ ират хэгъуэгум щыпсэу лъэпкъ къэс къабгъэдэкIа авторхэр къыхагъэщыным. Илъэсыжьым и кIэух махуэхэм къапщытэжащ ищхьэкIэ зи гугъу тщIа зэпеуэм кърикIуахэр икIи республикэм и Iэтащхьэм и саугъэтым хуэфащэу къалъытахэм – мыхьэнэ ин зыкIуэцIылъ тхыгъэ гъуэзэджэхэм, тхылъыфIхэм я автор хэм – хэгъуэгум щыщ тхакIуэхэмрэ усакIуэхэмрэ щIыхь нагъыщэхэр хуагъэфэщащ. ГуфIэгъуэ дауэдапщэр щекIуэкIащ Къэрэшей-Черкес Республикэм щэнхабзэмкIэ и Министерствэм. Абы къеблэгъащ «Союз писателей России» ООО-м и Къэрэшей-Черкес республикэ къудамэм и тхьэмадэ Байрамкулов Наурыз, ягъэлъэпIэну лауреатхэр.

КъЧР-м и Iэтащхьэм и саугъэтыр зэрахуигъэфэщам къыдэкIуэу, КъЧР-м щэнхабзэмкIэ и министрым и къуэдзэ Къэбардэ Иринэ лауреатхэм яхъуэхъуащ дяпэкIи ехъулIэныгъэрэ гулъытэрэ щымыщIэну, я творчествэм зиужьыну, ефIэкIуэну, сыт щыгъуи гулъытэ ягъуэтыну. Апхуэдэу, мы гъэм литературэмрэ гъуазджэмрэ кIэ КъЧР-м и Iэтащхьэм и саугъэтыр зыхуагъэфэщахэм яхэхуащ тхакIуэхэу, усакIуэхэу, публицистхэу Айбазов СулътIан (къэрэшей), Братковэ Татьянэ (урыс), Капаев Иса (нэгъуей), Шыбзыхъуэ Ларисэ (абазэ), Абидокъуэ Люсанэ (адыгэ) сымэ. — Мы саугъэтыр хуэгъэзащ Къэрэшей-Черкес Республикэм и псэкупсэ, интеллектуальнэ къэкIуэнум зегъэужьыным, литературэмрэ гъуазджэмрэ яхьэлIа творческэ лэжьыгъэ къэзыгъэщIхэр гъэгушхуэным. ХабзэфI хъуауэ, ди республикэм и Iэтащхьэм и саугъэтыр зыхуагъэфащэр ди хэгъуэгум щыщ литератор, журналист, гъуазджэм и лэжьакIуэ цIэрыIуэхэр, зи творческэ гуащIэкIэ щIыхь нагъыщэ лъагэхэр къэзылъэщахэращ. ТхакIуэхэм я хэгъуэгу Союзым хэт дэтхэнэми мы саугъэтыр къылъысащ къигъэщIа тхыгъэфIым и щIыхькIэ, ар гъащIэм сэбэп зэрыщыхъунур, гъэсэныгъэ мыхьэнэ, лъэпкъхэм яку дэлъ зэныбжьэгъугъэмрэ зэгурыIуэныгъэмрэ, хэкупсагъэлъэпкъыпсагъэр къыхэщу зэрыщытыр къыхалъытэкIэрэ, — жиIащ Къэбардэ Иринэ. Гуапэ зэрытщыхъуну, республикэм и Iэтащхьэм литературэмкIэ и саугъэтыр зыхуагъэфэщахэм яхэхуащ «Черкес хэку» газетым и редактор нэхъыщхьэри, и «Афган 1979-1989» тхылъым и фIагъыр къыхалъытэкIэрэ. — Дэтхэнэ творческэ цIыхум дежкIи къыпхуэмылъытэну гуапэщ и лэжьыгъэм уасэ къыщыхуащIкIэ. АтIэ, гуфIэгъуэм сызэщIеIэтэ «Афган 1979-1989» тхылъым апхуэдэ уасэ къызэрыхуащIам — КъэрэшейЧеркес Республикэм и Iэтащхьэм литературэмкIэ и саугъэтыр къызэрыхуагъэфэщам папщIэ! Шэч хэмылъу, апхуэдэ гулъытэр авторымкIи, си лъэпкъымкIи, а тхылъыр зытезухуа ди зауэлI – интернационалистхэмкIи щIыхь лъагэщ, пщIэ инщ. Нобэрей зэманым деж тхылъым игъэзащIэ гъэсэныгъэ лэжьыгъэр, пкъырылъ мыхьэнэр хуабжьу инщ.

АтIэ, а щIалэ хахуэхэм къакIуа зауэлI гъуэгуанэм, Хэкум и хьэлэмэтхэр хъумэн папщIэ абыхэм къагъэлъэгъуа лIыхъужьыгъэмрэ гуеягъымрэ щапхъэ зэрыримыкъу щыIэкъым. Абыхэм ядэплъейурэщ нобэрей щIэблэр зэрыдгъасэр, хэкупсагъэ зэрахэтлъхьэр… А лэжьыгъэм, шэчыншэу, къэралым и тхыдэм уасэ хууегъэщI, уегъэлъытэ, лъэпкъхэр зэрегъэубыд, пщIэ зэхурегъэщI. Аращ нэхъыщхьэр. Илъэс 15-м къриубыдэу си гуащIэ зыбгъэдэслъхьа «Афган 1979-1989» тхылъым къыпэкIуа щIыхьыр сэркIэ уасэншэщ! Апхуэдэ гулъытэм сызэрыригуфIэр псалъэкIэ къэIуэтэгъуейщ. ФIыщIэ ин яхузощI си лэжьыгъэр къыхэзыгъэщахэм, гулъытэ къыхуэзыщIахэм, — къыддэгуэшащ зи щIыхьыр саугъэткIэ къыхагъэща авторыр.

ХЬЭТАЙ Мадинэ