Хэкум къэзыгъэзэжам и МахуэмкIэ

Си лъэпкъэгъухэ! Си гум къыбгъэдэкIыу сывохъуэхъу адыгэм къытхуэгъэза махуэщI лъапIэмкIэ — Хэкум къэзыгъэзэжам и МахуэмкIэ!

Хэкур — анэщ. ЦIыхум дежкIэ абы нэхъ лъапIэ гъуэтыгъуейщ. Узыщалъхуа Хэку ущымыпсэужыныр — насыпыншагъэ инщ. Жагъуэ зэрыхъущи, адыгэ лъэпкъым и щхьэм кърикIуа гуауэ иным — зыхэта илъэсищэ зауэм ипкъ къикIыу, ди лъэпкъыр дуней псом щикъухьауэ къэнащ. ПщIыхьэпIэ Iейм щилъагъунтэкъым адыгэм апхуэдэ насыпыншагъэр — хамэ щIыналъэм къыщыхутэу, и бзэр, и хабзэхэр кIуэдыжыным нэсыныр. Хэхэс гъащIэм нэхъыкIэ гуауи лъэпкъым и щхьэм кърикIуэфынтэкъым. Нобэр къыздэсам адэжь щIыналъэм къыщIэбэгыу хамэщIым щыпсэур мащIэкъым. Абы щыхьэт дытохъуэ зэпыт хамэ къэралхэм щыпсэу ди лъэпкъэгъухэм дащыIущIэкIэ.

Абыхэм я нэхъыбэр щIохъуэпс зэ нэхъ мыхъуми, Кавказыр зрагъэлъагъуну, адэжь Хэкум къихьэну. Хэхэс хъуа ди лъэпкъэгъухэм зыщагъэгъупщэкъым къызыхэкIар, я бзэр, лъэпкъ хабзэхэр зэралъэкIкIэ яхъумэ. Адыгэр сыт хуэдиз лъэпощхьэпо хэмыплъами, хамэ щIыналъэ къыщыхута ди лъэпкъэгъухэм яхузэфIэкIащ зыкъызэтрагъэнэн, я хабзэхэр яхъумэжын, зыхэсхэм зыхамыгъэгъуэщэн.

Уеблэмэ зыщыпсэу щIыналъэхэм адыгэхэм я цIэр фIыкIэ щыжаIэу къэрал утыку инхэм итщ, IэнатIэшхуэ зыIыгъхэри яхэтщ. Апхуэдэ щIыхь, пщIэ ин зыIэрызыгъэхьа ди лъэпкъэгъухэм яхъумэ къызыхэкIам и тхыдэр, и щэнхабзэр, Хэкужьым хуаIэ зэпыщIэныгъэм зрагъэужьыным къаруушхуэ ирахьэлIэ. БлэкIа лIыщIыгъуэм и 1990 гъэхэм хуитыныгъэ ягъуэтри, Хэкум къагъэзэжауэ щытащ ди лъэпкъэгъу куэдым, адыгэ хэгъуэгухэм, къуажэхэм, жылагъуэхэм щетIысэхащ. Къэрэшей-Черкесри апхуэдэщи, унагъуэ пщIы бжыгъэ мыбдеж щопсэу. Ахэр Щамым къикIа защIэщ.

Лъэпкъым и Адыгэ Хасэм и лъэкIыныгъэ, зэфIэкI къызэрихькIэ а унагъуэхэм защIыдогъакъуэ, илъэс куэдкIэ яхузэдгъэзэхуащ я дэфтэр Iуэхухэр, Хэкум хэхэсу замылъытэжын папщIэ, сыт и лъэныкъуэкIи ноби дадоIэпыкъу. Ди гуапэщ, Хэкужьыр псэупIэ зыхуэзыщIыжыну къыщIэхъуэпсхэр Кавказым къызэрыIэпхъуэжыр, Урысейм лъапсэ зэрыщагъэтIылъыр. ИкIи, жылагъуэм ди къалэныр зи адэжь Хэку зи плъапIэ ди лъэпкъэгъухэм тхузэфIэкI яхуэтщIэнращ. Хэкум къэзыгъэзэжам и Махуэм ипкъ иту, адыгэу дуней псом тетым сохъуэхъу зэкъуэтыну, лъэпкъыбзэр, хабзэхэр ямыгъэкIуэдыну. Дызэкъуэтмэ — дылъэщщ, сыт хуэдэ лъэпощхьэпори къызэднэкIыфынущ!

Лъэпкъ махуэу дунейм Тхьэм дытригъэт!

АСЛЪЭНХЭ Алий, ДАХ-м и вице-президент, КъЧР-м и «Адыгэ Хасэ — Черкесский Парламент» лъэпкъ жылагъуэ зэщIэхъееныгъэм и тхьэмадэ