Хабзэр убзэкъым

Дызыщыпсэу технологие, цифровизацэ, зэпыщІэныгъэ Іэмалхэм, къинэмыщІ къулеягъхэм я фІыгъэкІэ, дэнэ сыт къыщыхъуми дыщыгъуазэщ. Уеблэмэ Іуэхур къыщыхъея дыдэм щегъэжьауэ, кІэ игъуэтыхункІэ дыкІэлъыплъыфыну лъэкІыныгъэ диІэщ.

Абы ипкъ иткІэрэ, зэхыдох зэпыт нэгъуэщІ хэгъуэгухэм къикІахэм хабзэкъутэныгъэ, экстремизм, терроризм къэхъукъащІэхэр япкъ къызэрикІ зэпытыр. Абы урегъэгупсыс: ярэби, езыхэр зыщыпсэу хэгъуэгур яхуримыкъуу, нэгъуэщІым щыкІуэкІэ, а здэкІуам лыуз хуамыІэ хъууэ ара, е зыхуэкІуам хабзэр Іэпэдэгъэл ищІу, абы къыкІэлъыкІуэ къэхъукъащІэу пІэрэ иужькІэ дызыхэплъэр? Дауи щрет, и фІыпІэр зыщ, текІ зимыІэщ: къытхуэкІуари, къызыхуэкІуари хабзэм тетын, щІыпІэм щекІуэкІ зэхэтыкІэм, хабзэхэм зрагъэкІун хуейщ. Хабзэр псоми я зэхуэдэщ. Хабзэкъутэныгъэ куэд къыщыхъу къудамэщ уней ухуэныгъэр. Абыхэм япэщІэтыным и зы Іэмалу, республикэ ЦПЭ-мрэ (центр противодействия экстремизму) МВД-м и УВМ-мрэ Прикубан районым и зы ухуэныгъэм рейд щрагъэкІуэкІащ. «Нелегал» оперативно-профилактикэ рейдым къызэщІиубыда нэрыбгэ 20-м щыщу, хамэ къэралхэм щыщ нэрыбгэ 17 МВД-м и ЦПЭ-м яшащ. Экстремизм, терроризм къэхъукъащІэ шынагъуэхэм япыщІамэ, абыхэм теухуа гупсысэхэр, литературэхэр, къинэмыщІхэр жылагъуэм щагъэбагъуэмэ, щызэрахьэмэ къыщІагъэщын мурадкІэ, ахэр тегъэчынауэ щІаплъыкІащ, лэжьыгъэ драгъэкІуэкІащ. Хабзэкъутэныгъэхэр къыщІагъэщащ. Абыхэм ящыщщ лэжьэнымкІэ хуитыныгъэ къезыт дэфтэрыр-патентыр зимыІэ, хамэ къэралхэм щыщ нэрыбгэ 15 лэжьапІэтхэм ягъэлэжьэну ухуэныгъэхэм къызэращтар. Ар административнэ хабзэкъутэныгъэм щыщщ. АдэкІи пащэнущ миграцэ хабзэкъутэныгъэхэр къыщІэгъэщынымкІэ лэжьыгъэм. ЖыІэпхъэщи, «Нелегал» оперативно-профилактикэ рейдхэр щІэх-щІэхыу ирагъэкІуэкІ. Абыхэм я къалэн пажэхэм щыщщ республикэм къихьэикІыр нэІэм щІэгъэтыныр, къихьами, икІами хабзэхэр зэрагъэзащІэр зэгъэзэхуэныр, хабзэм ебакъуэм жэуап егъэхьыныр.

КъЧР-м и МВД-м и пресс-къулыкъу