Бзылъхугъэхэм я Махуэм ехъулӏэу, УФ-м и Къэрал Думэм и депутат Узденов Солтан, «Зыуэ щыт Урысей» партым и хэгъуэгу къудамэм хэтхэр, волонтерхэр щыхьэщӏащ зи ныбжь хэкӏуэтахэм я «Гармония» Унэинтернатым. Абы щыпсэу цӏыху 78-м ерыскъы ӏыхьэхэр хуашащ, дадэ-нанэхэм я щыӏэкӏэ-псэукӏэм щӏэупщӏащ. — Нобэрей акцэр, бзылъхугъэхэм я махуэщӏым хуэзами, Хэкум и хъумакӏуэхэм я Махуэри къызэщӏедгъэубыдащ, икӏи дэтхэнэми гулъытэ хуэтщӏащ.
Мы ӏуэхур щхьэусыгъуэфӏ хъуащ депутат Узденов Солтан мыбы щыпсэухэм яхуэзэнымкӏэ, япсэлъэнымкӏэ, зыгъэгузавэ ӏуэху щыӏэмэ, ахэр зэхэхынымкӏэ, — жиӏащ «Зыуэ щыт Урысей» партым и хэгъуэгу Исполкомым и унафэщӏ Джамбаев Руслан.
Депутатыр мы ӏуэхущӏапӏэм зэкъым къызэреблэгъар. Щхьэусыгъуэ зэхуэмыдэхэр иӏэу пӏалъэ-пӏалъэкӏэ къахуокӏуэ, гу хуабагъэ хуэныкъуэхэм гулъытэ яхуещӏ зэпыт. Хьэщӏэхэр пэшхэм щӏыхьэурэ абы щыпсэухэм япсэлъащ, зыгъэгузавэ ӏуэхухэмкӏэ ящӏэупщӏащ. Зы унагъуэ хъуауэ псэу дадэхэмрэ нанэхэмрэ гулъытэ зэрыщамыгъащӏэмкӏэ къеблэгъахэм фӏыщӏэ хуащӏащ. Шхэнымкӏи, псэунымкӏи, нэгузыужь ӏуэхугъуэхэмкӏи къызыхуэтыншэу мыбдеж зэрыщыпсэур къыхагъэщащ. — Мыбдеж щыпсэухэр зыми хуэмыныкъуэу, зыхуейуэ хъуар ягъуэт, къэралым ахэр зыхуэныкъуэу хъуамкӏэ къызэрегъэпэщ. Ауэ, ди цӏыхухэр езыхэр зыгуэркӏэ мыбы щыпсэухэм къадэӏэпыкъуну хуейуэ зыкъыхуагъазэ. Ерыскъыкӏи, зыхуэныкъуэ хьэпшыпхэмкӏи, нэгъуэщӏхэмкӏи къыддэӏэпыкъуну хьэзырхэр куэдщи, зыгуэр дыхуэныкъуэу зэрыжытӏэу къытлъагъэӏэс. Нобэ, Узденов Солтан аргуэру ахэр игъэгуфӏащи, фӏыщӏэ худощӏ. Ди гуапэщ апхуэдэхэр куэду къызэрытхуэкӏуэр, дазэрыщымыгъупщэр, сытымкӏи я дэӏэпыкъуэгъу зэрызыхэтщӏэр, — жиӏащ «Гармония» Унэ-интернатым и унафэщӏ ӏэнатӏэр зыгъэзащӏэ Евгъэмыкъуэ Марат. А махуэм Унэ-интернатым щыпсэухэм нэгъуэщӏ хьэщӏэхэри яӏащ, тыгъэхэм къинэмыщӏауэ, нэгузыужь ӏуэхугъуэхэри ирагъэкӏуэкӏащ.
АМИРОКЪУЭ Мадинэ
Больше на Черкес хэку
Подпишитесь, чтобы получать последние записи по электронной почте.
