Афганистаным щекӀуэкӀа зауэм зэкъуэш зэхуищӀахэм ящыщ зым, Къэрэшей-Черкесым щыпсэу ХАСАНОВ Хьэсэн Даут и къуэм и лъэгуажьэпкъыр икъутауэ пӀэм хэлът. Абы чэзууэ бгъэдэст и Ӏыхьлыхэр, зыхуей хуагъазэу. ЛӀым и лъакъуэр операцэ иримыгъэщӀмэ, пӀэм къыхэнэнкӀэ шынагъуэ щыӀэт. Ветераным операцэм щӀитыну мылъку иӀэтэкъым, квотэ къыдихынуи хузэфӀэкӀтэкъым…
Я ныбжьэгъур зыхэхуа гузэвэгъуэр къуэш къыхуэхъуахэм къыщацӀыхум, цӀыхухэм я Урысейпсо приемнэм ипэ къихуэу, ЛДПР-м и хэгъуэгу къудамэм зыхуагъэзащ. Хэгъуэгу партым и координатор Чайка Александр а зыхуэгъэзэныгъэр и нэӀэм щӀигъэувэри, икӀэщӀыпӀэкӀэ езыр екIуэлIащ Орджоникидзевскэ жылагъуэм щыпсэу, Афган зауэм и ветераным и унагъуэм. Чайка Александр Ӏуэхур зэрыщытыр зригъэлъэгъуащ икӀи жиӀащ ветераным зыхуэныкъуэ медицинэ дэӀэпыкъуныгъэ игъуэтынымкӀэ щӀэгъэкъуэн зэрыхъунур.
АтӀэ, ветеранхэм яхуэфащэщ дэӀэпыкъуныгъэрэ гулъытэрэ, дэтхэнэ зы Ӏуэхури мыхьэнэшхуэ зиӀэщ! Апхуэдэу, ветераным и зыхуэгъэзэныгъэм ехьэлӀауэ Чайка Александр лэжьыгъэ зэӀущӀэ дригъэкӀуэкӀащ Къэрэшей-Черкес Республикэм узыншагъэр хъумэнымкӀэ и министрым и япэ къуэдзэ Селиванов Владимир Анатольевич икӀи Хасановым операцэ щӀынымкӀэ квотэр къызэрыӀэрагъыхьэну Ӏуэхум теухуауэ зыхуей псори иритащ, адэкӀэ зэрылэжьэну щӀыкӀэмкӀи зэгурыӀуахэщ.
Дэфтэрхэр щӀиплъыкӀа нэужь, Владимир Анатольевич Ӏуэхур зэригъэзэхуэну иритащ балигъ цӀыхухэм медицинэ дэӀэпыкъуныгъэ ягъэгъуэтынымкӀэ Министерствэм и къудамэм и унафэщӀ Батчаевэ Беллэ. Профильнэ ведомствэхэмрэ ӀэщӀагъэлӀхэмрэ зэгурыӀуэу зэрызэдэлэжьамрэ гулъытэ зэрыхуащӀамрэ я фӀыгъэкӀэ квотэ Ӏуэхур пӀалъэ кӀэщӀ дыдэкӀэ зэфӀагъэкӀащ, ветеранри операцэ ящӀащ. Мы Ӏуэхум иджыри зэ къегъэлъагъуэ гулъытэ хьэлэлымрэ ерыщагъымрэ цӀыхум и гъащӀэр нэхъыфӀ зэрищӀыр, цӀыхухэм я зыхуэгъэзэныгъэр зэрызэфӀахыр. Тхьэм нэхъыбэжи хущIигъыхьэ псапэ зыщIэ дэтхэнэри!
Зыгъэхьэзырар ЕЗАУЭ Маринэщ
Больше на Черкес хэку
Подпишитесь, чтобы получать последние записи по электронной почте.
