Гухэхъуэщ сабийр гуфIэмэ

Илъэс еплIанэ хъуауэ сабийр хъумэным и Лъэпкъыбэ Махуэм ехъулIэу ди хэгъуэгум щрагъэкIуэкI «Мой особенный ребенок» псапащIэ фестивалыр.

Зи узыншагъэкIэ дагъуэ зиIэ сабийхэм нэгузыужь дауэдапщэр къахузэрегъэпэщ «Территория милосердия» фондым и волонтёр Байрамуков Руслан. МахуэщIым кърагъэблэгъащ республикэм и социальнэ IуэхущIапIэхэмрэ еджапIэхэмрэ я гъэсэнхэр. А цIыкIухэм я нэгу зэрызрагъэужьам къыдэкIуэу, езыхэми утыкум зыкъыщагъэлъэгъуэну лъэкIыныгъэ яIащ. — Мы гъэм, сабийхэм я Махуэм къыдэкIуэу, хэгъуэгум къыщыдэкI, сыт щыгъуи ди ныбжьэгъу пэжу къыддэгъуэгурыкIуэ «Наш Теремок» сабий журналыр илъэсипщI зэрырикъуари догъэлъапIэ. Ар гулъытэншэу къэдгъанэкъым, сыту жыпIэмэ журналымрэ сабийхэмрэ я зэпыщIэныгъэр быдэщ.

КъинэмыщIауэ, мы гъэм ТекIуэныгъэр ди къэралым къызэрихьрэ илъэс 80 зэрырикъуар зыщыдгъэгъупщакъым. МахуэщIым хэтщ зауэм теухуа уэрэдхэр, къафэхэр. Дауэдапщэм хэтыну сыт щыгъуи къыдогъэблагъэ республикэм и социальнэ IуэхущIапIэхэм, еджапIэхэм я гъэсэнхэр. Къапщтэмэ, мыр сабийхэм я творчествэм зезыгъэужь Iуэхущ.

Апхуэдэу, зи тхьэкIумэ зэхимыххэм хухэха еджапIэм и гъэсэнхэм IэпэтэрмэшкIэ уэрэд ягъэзэщIащ, къэфащ. АдреймкIэ сабийхэм я нэгу зрагъэужьащ республикэм и районхэм, Черкесск къалэм къабгъэдэкIа сабий творческэ гупхэм.

ФIыщIэ яхуэфащэщ ди республикэм щылажьэ «Сатурн» предприятэмрэ хьэрычэтыщIэ Псэун Азэмэтрэ. Ахэр сыт щыгъуи щIэгъэкъуэн къытхуохъу, мы махуэми сабийхэм папщIэ йогуртхэр, псы IэфIхэр къытхуашащ, — дыщигъэгъуэзащ Iуэхум Байрамуков Руслан.

Фестивалыр гъэщIэгъуэну, хуабагъэкIэ гъэнщIауэ, сабийхэм я гукъыдэжыр къиIэту екIуэкIащ. Амфитеатрым щIэсахэр уэрэдхэми дежьууащ, къэфащ, джэгуащ. Зи нэ зымылъагъухэм я Жылагъуэм хэт сабийхэм я IэкIэ ящIа тыгъэ цIыкIухэмкIэ адрейхэми ядэгуэшащ. Мыпхуэдэ Iуэхухэм зи узыншагъэкIэ дагъуэ зиIэ, гулъытэ хуэныкъуэ сабийхэм я гъащIэр нэхъ дахэ ещI, жылагъуэм щыщ зыуэ зэрыщытыр зыхрегъащIэ.

Фестивалыр ирагъэкIуэкIащ КъЧР-м щэнхабзэмкIэ и Министерствэм и дэIэпыкъуныгъэ хэлъу.

БОРЭНЫКЪУЭ Мадинэ