Черкесск къалэм дэт, ДАУР Аслъэн и цIэр зезыхьэ щэнхабзэмрэ гъуазджэхэмрэкIэ колледжым «Последний из ушедших» (Очаг надежды) спектаклым и япэ утыку ихьэр щекIуэкIащ. Абы и режиссёру щытар Акъ Мухьэрбэч и цIэр зезыхьэ адыгэ драмэ театрым и унафэщIым и къалэнхэр зыгъэзащIэ ЕмкIуж Андзорщ. Пьесэр и IэдакъэщIэкIщ усакIуэ, журналист, драматург Бемырзэ Зураб. Тхыгъэм лъабжьэ хуэхъуар Баграт Шинкубэ и роман цIэрыIуэращ.
ЕмкIужым зэрыжиIащи, лъэпкъым и блэкIам теухуа мы тхыгъэри, теплъэгъуэ ягъэувари гугъущ. КъыщыIэта темэм – Кавказ зауэм и кIэухым ехъулIэу адыгэхэр мухьэжыр гъуэгуанэ зэрытехьам – къинэмыщIауэ, мы теплъэгъуэр гугъу зыщIахэм ящыщщ ар моноспектаклу зэрыгъэпсам. НэгъуэщIу жыпIэмэ, зы актёрым роль бжыгъэ игъэзащIэурэ, и теплъэкIи и хьэлкIи зызэрихъуэкIыурэ теплъэгъуэр екIуэкIащ. Апхуэдэу спектаклым театреплъхэр Тыркум къыщигъэхутащ, лIыхъужь нэхъыщхьэу зи ныбжьыр хэкIуэта Бэрзэдж Джырандыкъуэ и унэ жьэгум и дишащ.
Абы къыхуеблэгъа, Хэкужьым къикIа щIалэм прегъажьэ, адыгэ хабзэм къызэригъэувым хуэдэу, ерыскъы Iэнэм пэрегъэс мыпсэуж, ауэ пщIэрэ — щхьэрэ зиIэу щытыгъа адыгэлI хахуэхэр… А Iыхьэм гурыIуэгъуэ пщещI жьы хъуа лIыхъужьым и псэм Хэкур, абы щытепщэ хабзэхэр зэрыщыпсэур, ар абыхэм лъыкIэ зэрахуезэшыр. ГъэщIэгъуэнщ адэкIэ теплъэгъуэм зэрызиужьри: хьэщIэр зыщIэупщIа хъыбарыр Джырандыкъуэм къеIуатэ, Кавказым щыпсэуа, езыр щIалэу щыщытыгъа пIалъэм къыщIыгъуа цIыхухэм я псалъэхэр игу къигъэкIыжурэ.
Апщыгъуэми, Бэрзэджым и ролыр зыгъэзащIэ Мамыжь Хьэзрэт лIыхъужьым игу къигъэкIыж адыгэлIхэм я теплъэм йохьэ, я макъкIэ мэпсалъэ, Хэкум икIын-къинэн, адэкIэ зауэм пыщэн, хьэмэрэ къызэтеувыIэн упщIэ хьэлъэхэм я жэуапхэр къет. Мы Iыхьэм ущеплъкIэ, ущыхэдэIухькIэ, Iэмалыншэу уэри а пIалъэм укъыщохутэри, узыщIогупсысыкI: «Сэ абыхэм я пIэм ситамэ, сытыт си жэуапу, си еплъыкIэу щытынур?» жэуэ… Апхуэдэ IэмалкIэ спектаклыр къэзыгъэщIахэм къыднахьэсыну хуеящ а зэманым хэпсэукIа дэтхэнэми и гум щыхъар, сыт хуэдэ IуэхукIи еплъыкIэ зэхуэмыдэхэр зэрыщыIар. Спектаклым и кIэухым хуэкIуэу долъагъу убых къафэр къэзыщI щIалэщIэр – нобэми ныжэбэми мылIэжыныпсэу адыгэм диIэ убых къафэр… Дауи, мыпхуэдэ хэзыгъэгъуазэкIэ ди щIэджыкIакIуэхэм спектаклым и купщIэр зыхедгъэщIэфынкъым. А псори гурыIуэгъуэ щыхъунур фэ езыр фи нэкIэ, фи тхьэкIумэкIэ сценэм къэхъум зыщывгъэгъуазэмэщ. Спектаклым и утыкуихьэм щыIа, Къэрэшей-Черкесым щэнхабзэмкIэ министр Агырбэ Зураб актёрхэми, теплъэгъуэм елэжьа псоми фIыщIэ яхуищIащ.
— Мы темэм псоми ди гулъытэ хуэныкъуэщ. Ди лъэпкъхэм я гум телъ уIэгъэхэм я гугъу зэIухауэ щытщIкIэ, ахэр нэ гъуэщI лъэпкъхэми зыхащIэну Iэмал щагъуэткIэ, зы лъэпкъым адрейр нэхъ къыгурыIуэ хуохъу. Ар ди зэгурыIуэныгъэмкIэ щхьэпэу солъытэ. Сыхуейщ спектаклыр гастроль ежьэну, нэхъыбэм мы темэр къагурыIуэну, иджыри зэ егупсысыну, – къыхигъэщащ министрым. А пщыхьэщхьэм спектаклым еплъахэм ящыщщ республикэ «Адыгэ Хасэ – Черкесский Парламент» лъэпкъ зэгухьэныгъэм и тхьэмадэ Аслъэнхэ Алии. — Нобэ дызэплъам иджыри зэ дызригъэгупсысыжащ.
А зэман жыжьэм дыхэт хуэдэу къысщыхъуащ. Уи псэкIэ, уигукIэ псори зыхыбощIэ. Теплъэгъуэр зыгъэхьэзыра псоми сайхъуэхъуну сыхуейщ лъэпкъым и гуфIэгъуи, и гуауи сыт щыгъуи даIыгъыфу, ди гум къипсэлъыкIыфу, нэсыфу, зэгурыIуэу Тхьэм куэдрэ игъэлэжьэну!
ЦIыхухэм театрыр фIыуэ ялъагъу, къокIуалIэ, яфIэгъэщIэгъуэну сценэм къэхъум кIэлъоплъ. Нэхъыщхьэращи, нобэ дызэплъар ди анэдэлъхубзэкIэ Iуащи, ар хуабжьу щхьэпэщ ди щIэблэмкIи, уеблэмэ нэхъыжьхэмкIи. Аращи, дыныфпоплъэ иджыри спектакль гъэщIэгъуэн куэд утыку къифхьэну, – жиIащ Адыгэ Хасэм и тхьэмадэм.
ГЪУКIЭКЪУЛ Иринэ
Больше на Черкес хэку
Подпишитесь, чтобы получать последние записи по электронной почте.
