ГуащIэм къыпэкIуа щIыхь

Гъатхэпэм (мартым) и 6-м Адыгейм и лIыщхьэ КъумпIыл Мурат Урысей Федерацэмрэ Адыгэ Республикэмрэ я къэрал нагъыщэхэр IэщIагъэ зэмылIэужьыгъуэхэм телажьэ цIыху гуащIафIэхэм яхуигъэфэщащ. «Адыгэ Республикэм щIыхь зиIэ и журналист» цIэ лъапIэкIэ зи щIыхьыр къыхагъэщахэм ящыщщ Къэрэшей-Черкес Республикэм къыщыдэкI «Черкес хэку» газетым и редактор нэхъыщхьэ, КъЧР-м щIыхь зиIэ и журналист, УФ-м и журналистхэми и тхакIуэхэми я Союзхэм хэт, КъЧР-м и тхакIуэхэм я Союзым и адыгэ къудамэм и унафэщI, Къэрэшей-Черкес Республикэм и Iэтащхьэм литературэмрэ гъуазджэмрэкIэ и саугъэтыр (2025 гъ.) къызыхуагъэфэща АБИДОКЪУЭ Люсанэ.

ЗэIущIэр къыщызэIуихым КъумпIыл Мурат къыхигъэщащ зи гуащIэдэкIым, зэчийм, зыпэрыт Iуэхум хуэпэжхэр, республикэмрэ къэралымрэ я зыужьыныгъэм зи лэжьыгъэкIэ хэлъхьэныгъэфI хуэзыщIхэр а махуэм зэрагъэлъапIэр. «Мыбдеж къыщызэхуэсахэм экономикэм зывогъэужь, социальнэ IэнатIэр фогъэбыдэ, хабзэмрэ шынагъуэншагъэмрэ къызывогъэпэщ. Ауэ псори фызытелажьэр зыщ — Урысейр нэхъ лъэщ хъунырщ, ефIэкIуэнырщ. Нобэ псоми ди зэхуэдэ текIуэныгъэм хэлъхьэныгъэ нэхъыбэ хуэзыщIыр СВО-м щыIэ ди зауэлIхэращ. Абыхэм я къалэнхэр щIыхь пылъу, лIыгъэрэ хахуагъэрэ къагъэлъагъуэу ягъэзащIэ», — жиӀащ АР-м и лIыщхьэм.

КъумпIылым къыхигъэщащ дзэм и къарур Iэщэм и мызакъуэу, псалъэкIи, гъуазджэкIи, дэIэпыкъуныгъэкIи нэхъ быдэ зэрыхъур. ЕгъэджакIуэхэр, дохутырхэр, журналистхэр, спортсменхэр, хеящIэхэр, къэрал къулыкъущIапIэхэм я лэжьакIуэхэр, шоферхэр, слесархэр, инженерхэр, диспетчерхэр а махуэм ягъэлъэпIащ. «Фэ фщыщ дэтхэнэри жэуаплыгъэ пылъу, нэгъэсауэ мэлажьэ. Апхуэдэ IэщIагъэлIхэр республикэм и щIэгъэкъуэнщи, дызэгъусэу куэд тхузэфIэкIы

нущ. Си фIэщ мэхъу Адыгейм ифI зыхэлъ Iуэху дахэ куэд адэкIи къызэрывдэхъунур», — къыщIигъужащ КъумпIылым. Нагъыщэ лъапIэр зыхуагъэфэщахэм ящыщу «Черкес хэку» газетым и редактор нэхъыщхьэм псалъэ щратым жиIащ: — ИкъукIэ си гуапэщ апхуэдэ пщIэ лъагэ къызэрысхуэфщIар. Къуэш республикэм щIыхь зиIэ и журналисту сыщытыныр сэркIэ щIыхь лъапIэщ. Ди лэжьэгъу нэхъыжьхэу, «Черкес хэку», «Адыгэ макъ», «Адыгэ псалъэ» газетхэм я редактор нэхъыщхьэхэу щыта Къардэн Мухьэмэд, ХьэщIэмыз Биболэт, Мэзыхьэ Борис сымэ я фIыгъэкIэ, илъэс 40-м щIигъуауэ зэдолажьэ къуэш республикэхэм къыщыдэкI адыгэ газетхэр.

ТхыгъэхэмкIэ дызэхъуажэурэ щхьэж и диалекткIэ къытыдодзэ адыгэ дунейм къыщыхъу Iуэхугъуэ нэхъыщхьэхэр, ди лъэпкъым къыхэкIа цIыху цIэрыIуэхэм, зэчиифIэхэм, гуащIафIэхэм ятеухуахэр, щIэджыкIакIуэхэм ядогъэцIыху къуэш хэгъуэгухэм я щыIэкIэ-псэукIэр. Ди газетхэр илъэси 100 щрикъум ирихьэлIэу унафэ тщIащ журналистхэмкIэ дызэхъуажэу редакцэ хэм тхьэмахуэкIэ щыдгъэлэжьэну. Ари фIыуэ къызэрыдэхъулIам, газетеджэхэм ягу зэрырихьам нэхъыбэжым дытрегъэгушхуэ, абы ди щэнхабзэ зэпыщIэныгъэхэр нэхъри егъэбыдэ. ФIыщIэ яхуэсщIыну сыхуейщ Адыгейм, КъэрэшейЧеркесым, Къэбэрдей-Балъкъэрым цIыхубэ хъыбарегъащIэ IэнатIэхэмкIэ я къэрал къулыкъущIапIэхэм я унафэщIхэм ди Iуэхур къызэрыддаIыгъым папщIэ. Си щхьэкIи, КъэрэшейЧеркес Республикэм лъэпкъ IуэхухэмкIэ, цIыхубэ зэпыщIэныгъэхэмрэ печатымрэкIэ и министр Есенеев Мурат къыбгъэдэкIыуи фIыщIэ фхузощI, ди зэхуаку дэлъ зэкъуэшыныгъэр зэревгъэфIакIуэм папщIэ, — къыхигъэщащ Абидокъуэ Люсанэ.

Фигу къэдгъэкIыжынщи, зы тхьэмахуэкIэ ипэ къихуэу, «Урысейпсо ЦIыхубэ Фронт» жылагъуэ зэщIэхъееныгъэм и ГъэзэщIакIуэ комитетым къихьа унафэм ипкъ иткIэ, КъЧР-м щылажьэ ЦIыхубэ фронтым и ревизионннэ комиссэм и унафэщI, лъэпкъ печать СМИ-м и пашэ Абидокъуэ Люсанэ Москва къалэм ирагъэблагъэри, «ТекIуэныгъэм папщIэ» бгъэхэIу дамыгъэмкIэ ягъэлъэпIащ. Ар къыпэкIуащ ЦIыхубэ фронтым иригъэкIуэкI лэжьыгъэм теухуа хъыбархэр сытым дежи и чэзум республикэ газетым къызэрытридзэм. КъинэмыщIауэ, 2025 гъэм и дыгъэгъазэ (декабрь) мазэм творческэ и лъэныкъуэкIи и лэжьыгъэм пщIэшхуэ ирагъэгъуэтащ. Абы къыхуагъэфэщащ Къэрэшей-Черкес Республикэм и Iэтащхьэм литературэмрэ гъуазджэмрэ и саугъэт лъапIэр. Ди гум къыбгъэдэкIыу дыхуохъуахъуэ ди лэжьэгъу бзылъхугъэ жаным, игури и псэри зыхилъхьэ Iуэхум къыпэкIуа ехъулIэныгъэхэм папщIэ. Тхьэм нэхъри хыуигъэгъахъуэ!

ХЬЭТАЙ Мадинэ, Мейкъуапэ — Черкесск