МахуэщI нэхъ гуапэмрэ хуабэмрэ — бзылъхугъэхэм я Дунейпсо Махуэм и щӀыхькӀэ Черкесск къалэм къыщызэрагъэпэща гуфӀэгъуэ дауэдапщэм хэтащ Къэрэшей-Черкесым и Ӏэтащхьэ Темрезов Рэшид.
Ди хэгъуэгум и лӀыщхьэм бзылъхугъэхэм фӀыщӀэ яхуищӀащ илъэс куэд хъуауэ хьэлэлу зэрылажьэм, щӀыналъэм и жылагъуэ гъащӀэм жыджэру зэрыхэтым, узыншагъэр хъумэным, щэнхабзэм, егъэджэныгъэм, юриспруденцэм, цӀыхухэр социальнэу хъумэным я ӀэнатӀэхэмкӀэ зэфӀэкӀхэр зэраӀэм папщӀэ.
Абыхэм яхуигъэфэщащ Урысейм и Президент Путин Владимир къыбгъэдэкIа ФIыщIэ тхылъхэмрэ Къэрэшей-Черкесым и щӀыхьыцӀэхэмрэ. — Анагъэмрэ сабиигъуэмрэ защӀэгъэкъуэныр федеральнэ, хэгъуэгу лъэныкъуэхэри я лэжьыгъэм и пэрыт унэтӀыныгъэу къонэ. Ди Лъэпкъ Пашэ Путин Владимир къызэрыхигъэщащи, анэу ущытыныр — насыпышхуэщ, абы щыгъуэми, тыншкъым, гуащӀэдэкӀ хьэлъэщ.
Дэ ар фӀыуэ къыдгуроӀуэ икӀи, Ӏэмал имыӀэу, адэкӀи гулъытэ яхуэтщIынущ анэхэм, сабий зиӀэ унагъуэхэм, псом хуэмыдэу быныбэхэм, зыхуей дэӀэпыкъуныгъэр ягъэгъуэтыным, я хьэлэмэт зыхэлъхэр сыт щыгъуи къэралым и нэӀэм зэрыщӀэтыр зыхащӀэным. Ди щIыналъэм и зыужьыныгъэм бзылъхугъэхэм хуащI хэлъхьэныгъэм и мыхьэнэр къэлъытэгъуейщ. Абыхэм фIагъ иӀэу зэдахь ӀэщӀагъэм ехъулӀэныгъэ щызыIэрыгъэхьэныр, унагъуэм гулъытэ хуэщIыныр, бынхэмрэ къуэрылъху-пхъурылъхухэмрэ гъэсэныгъэ нэс ятыныр. Ахэр псори хэгъуэгум и зыужьыныгъэм и лъабжьэщ.
Абыхэм ящыщ куэдым, я гуащӀэ щымысхьыжу, фронтым зыщIагъакъуэ, тылым и мызакъуэу, СВО-м щыIэ ди щIалэхэм ядоIэпыкъу, — жиIащ республикэм и лIыщхьэм. Ар къызэхуэсахэми яхъуэхъуащ махуэшхуэмкӀэ, я Ӏыхьлыхэми, я благъэ гъунэгъухэми узыншагъэ, ехъулӀэныгъэ, фӀыгъуэ яӀэну! ЩӀыхьышхуэ яхуищӀащ бын куэд зыпI анэхэм, СВО-м хэт, ди къэралым и хьэлэмэтхэмрэ хэку цIыкIумрэ лӀыгъэ хэлъу зыхъумэ ди лӀыхъужьхэм я анэхэм, къыхигъэщащ абыхэм я Ӏущагъымрэ я псэемыблэжыныгъэмрэ узэрагъэгушхуэр, пщӀэ нэхъ ин дыдэ зэрахуэфащэр. — Сывохъуэхъу гъатхэ махуэщI дахэмкIэ! Ди республикэри, фIыщэу тлъагъу ди къэралыр — Урысейри нэхъри ефIэкIуэну! — захуигъэзащ хэгъуэгум и Iэтащхьэм гуфIэгъуэ дауэдапщэм хэтахэм.
ЕЗАУЭ Маринэ
Больше на Черкес хэку
Подпишитесь, чтобы получать последние записи по электронной почте.
