Фэеплъыр ужьыхкъым

КАВКАЗ ЗАУЭР зэриухрэ илъэси 161-рэ щрикъум ехьэлІа фэеплъ дауэдапщэхэр накъыгъэм (майм) и 20-м щIидзащ. Iуэхугъуэхэр щрагъэжьащ адыгэхэр куэду зыщыпсэу Хьэбэз, Адыгэ-Хьэблэ районхэм. Абыхэм хэтащ власть къулыкъущIэхэр, жылагъуэ Iуэхузехьэхэр, щэнхабзэм и лэжьакІуэхэр, егъэджакІуэхэр, еджакІуэхэр, хэкупсэ-лъэпкъыпсэхэр.

Хьэбэз къуажэм щегъэжьауэ Али-Бэрдыкъуэ щыІэ мемориал комплексым нэс пхъакъуэ зыIыгъ гупышхуэ ирикІуащ.

Фэеплъ мывэхэм дыуэ щащІынри, я щхьэ щагъэщхъынри, Іуащхьэм дэкІынри, мывэхэм тетхахэм къытрагъэзэжурэ еджэнри — куэд дыдэм а пшыхьым щыхэплъащ.

Іуащхьэм и лъабжьэм щыгъэнэІуа, адыгэ лІакъуэцІэхэр зытетха мывэ къэс мафІащхьэхэр щыпагъэнащ. Ахэр 12 мэхъу. Е 13-ри мы гъэм пагъэнащ — адыгэ лІакъуэ 12-р къызэщІэзубыдэ, «Адыгэхэр» жэуэ зытет фэеплъ мывэ зэпэплІимэм щхьэщыту. Абы къыпаха мафІэ дэпымкІэ, лъэхъу зэфІэдзам, шыуан лъабжьэм щызэщІагъэстыжащ адыгэ жьэгу мафІэр.

Накъыгъэм и 21-р щыгъуэщIэж дауэдапщэхэр зэуэ зыхуэкІуэж махуэти, ар икъукІэ гъэнщІауэ дэнэ щIыпIи щрагъэкIуэкIащ. Фэеплъ зэхыхьэхэр щыIащ Черкесск къалэм, Али-Бэрдыкъуэ, Красный Восток, Адыл-Хьэлъкъ къуажэхэм.

Кавказ зауэм хэкIуэдахэм я фэеплъу Черкесск къалэм дащIыхьа сыным и гупэм щекIуэкIа Iуэхугъуэхэм хэтащ, республикэм и Iэтащхьэ Темрезов Рэшид, езым ищхьэкIэ къыбгъэдэкIа зыхуэгъэзэныгъэри утыкум щыжиIащ КъЧР-м и Правительствэм и тхьэмадэ Аргун Мурат.

КъинэмыщIауэ, щыгъуэ пэкIум хэтащ КъЧР-м и Iэтащхьэмрэ и Правительствэмрэ я Администрацэм и унафэщI Уэз Мурат, Правительствэм и лIыкIуэхэр, Парламентым и депутатхэр, лъэпкъ жылагъуэ Iуэхузехьэхэр: Аслъэнхэ Алий, Хубиев Хьэсэн, Куэнчэ Умар, Казаков Валерий, динырылажьэхэр, нэгъуэщIхэри.

Кавказ зауэм хэкIуэдахэм дыуэ тращIа нэужь, къэпсэлъахэр къытеувыIащ а зауэжьым адыгэхэм, абазэхэм, къэзакъхэм, нэгъуейхэм къахуихьа хэщIыныгъэхэм; зауэр къежьэн хуей щIэхъуам и тхыдэми ириплъэжащ.

Апхуэдэ тхыдэ къэхъугъэхэр къытебгъэзэж зэрымыхъунум, ди республикэм щыпсэу лъэпкъхэр Урысей уардэм иригушхуэу, зэкъуэшыныгъэрэ зэныбжьэгъугъэрэ яку дэлъу зэрызэдэкIуэтапхъэм, абы хущIэкъун зэрыхуейм лъэпкъхэр къыхураджащ.

Шэджагъуэм сыхьэтыр 12-00-м зэрыдунейуэ, ди лъэпкъэгъухэр зыщыпсэу къэралу хъуам, щыгъуэ дакъикъэ хухахащ Кавказ зауэм хэкIуэдауэ хъуам. Иужьым, пэкIум хэтахэм удз гъэгъахэр щагъэтIылъащ фэеплъ сыным и лъабжьэм.

Къапщтэмэ, Черкесск къалэм пщыхьэщхьэм КъЧР-м и «Адыгэ Хасэ», «Абаза», «ЩIалэгъуалэ Хасэ», «Алашарэ» лъэпкъ жылагъуэ зэгухьэныгъэхэм я къызэгъэпэщыныгъэкIэ, КъЧР-м щэнхабзэмкIэ и Министерствэм, «Черкес хэку» газетым я дэIэпыкъуныгъэ ин хэлъу, щэнхабзэ дауэдапщэхэри фIагъ лъагэ хэлъу республикэ къалащхьэм щызэхэтащ.

Фэеплъ пшыхьым щыIуащ Кавказ зауэжьым траухуа уэрэдхэр, усэхэр, теплъэгъуэхэмрэ видеонэтынхэмрэ къыщагъэлъэгъуащ.

Абы хэтащ республикэм и артист цIэрыIуэхэр: Мэремкъул Ачар, Думэныщ Лианэ, Къэтей Фатимэ, Ажий Мурат, уэрэдымкIэ «Черкесия», «Абазги» ансамблхэр, адыгэ театрым и актёрхэр, лъэпкъ IэмэпсымэхэмкIэ «Пасэрей» ансамблыр, Ашыбокъуэхэ Азэмэтрэ Iэсятрэ, Чэнджэщауэ Артур сымэ.

Пшыхьым къыкIэлъыкIуащ адыгэ, абазэ щIалэгъуалэ зэгухьэныгъэхэм ягъэхьэзыра, щэху уэздыгъэхэр фэеплъ сыным и пащхьэ щызэпыгъэнэныр, зауэм хэкIуэдахэм я фэеплъыр ягъэщыпкъэу. Мыбдежми щыIуащ «ИстамбылакIуэм» траухуа щыгъуэ макъамэхэр, уэрэдхэр, усэхэр.

ТУАРШЫ Ирэ