Урысейм и ЛIыхъужь Къардэн Уэхьид и цIэр зезыхьэ ПсэукIэ-Дахэ курыт еджапIэм щекIуэкIащ «Дызэгъусэу дот. Адэ-анэм ЕГЭ-р щрагъэт махуэм» акцэр.
Абы кърагъэблэгъащ Хьэбэз районым егъэджэныгъэмкIэ и Управленэм и унафэщI Сидакъ Жаннэ, абы и къуэдзэ Аслъэныкъуэ Светланэ, къуажэм и Iэтащхьэ Кэп Мурат, журналистхэр, мы гъэм еджапIэм къыщIэкIыну ныбжьыщIэ цIыкIухэм я адэ-анэхэр.
ЕджапIэр къэзыух ныбжьыщIэхэм ябгъэдэлъ щIэныгъэр, зэфIэкIхэр къызэрапщытэ Iэмалхэр къагъэсэбэпурэ, а махуэм экзамен ирагъэтащ адэ-анэ 15-м. Мы Iуэхугъуэр къызэзыгъэпэщахэм акцэм хэлэжьыхьахэр щагъэгъуэзащ Зыуэ щыт экзаменхэр зэратыну щIыкIэм.
— Ди къалэну щытар экзамен къызэрыIах щIыкIэм адэ-анэхэр хэгъэгъуэзэнрат, сабийр мыхьэнэшхуэ зиIэ а Iуэхум зэригъэпIейтейр щхьэщахыфын хуэдэу. Адэ-анэхэм сабийхэр ягъэгушхуэфынущ, абыхэм еущиефынущ, — къыхигъэщащ Сидакъ Жаннэ.
Адэ-анэхэм ирагъэлъэгъуащ экзаменхэр зытхэр зэрызэбгъэдагъэтIысхьэ щIыкIэр, гъэунэхуныгъэхэм кърикIуахэр къапщытэнымкIэ къагъэсэбэп Iэмалхэр.
Балигъхэм ирагъэта экзаменыр нэхъ кIэщIт. ЕджапIэхэр къэзыухахэм хуэдэу, адэ-анэхэми паспортымрэ къалэмымрэ фIэкIа яIыгъ хъунутэкъым.
ЕЗАУЭ Маринэ
Больше на Черкес хэку
Подпишитесь, чтобы получать последние записи по электронной почте.
