Экстремизмэм пэщIэту

Тхьэми бзаджэнаджэми зэхуэдэу уадэджэгу хъунукъым

Урысей Федерацэм и хабзэхъумэ къулыкъухэр илъэс зыбжанэ хъуауэ терроризмэмрэ экстремизмэмрэ епха организацэхэм хъарзынэу бэныныгъэ драгъэкIуэкI. Ауэ, ди жагъуэ зэрыхъущи, жэщ-махуэ имыIэу зыпэщIэт щIэпхъаджащIэ гупхэм зэрану къытхуахьыр нэхъ мащIэ зэрымыхъуауэ къонэ.

Мы зи щхьэфэ диIэбэ организацэхэм языныкъуэхэр апхуэдэу гъэпсащи, гъащIэм щытыкIэ хьэлъэ иригъэува, гугъуехь гуэрхэм хэту псэухэм я къарууншагъэр къызыхуагъэщхьэпэурэ, я Iуэхур дагъэкI, зыгуэрхэми —     психологическэу зэтемысхэр, нэхъ гупцIанэу щытхэр кIэнджэгу къащIурэ, лей кIэлъызэрахьэ, щыIэщ а хъуагъэщагъэхэмкIэ зи пщIэ къэзыIэтыну пылъхэри.  

Иджырей зэманым цIыхубэм зи цIэр хэзыгъэIуа икIи куэдыр гузэвэгъуэ хэзыдза организацэщ «Свидетели Иеговы» жыхуиIэр. УФ-м и хьэкум Нэхъыщхьэм ди къэралым деж экстремизм Iуэху щызыщIэу къилъыта мы организацэм иригъэкIуэкI лэжьыгъэ «зэхэмыбзым» мызэ-мытIэу и гугъу фхуэтщIагъэххэщ.

Тобэ ирехъуи, къэралым щыпсэу дэтхэнэри, и ныбжьымрэ зыпэрыт IэнатIэмрэ ямылъытауэ, дауикI, зэхихагъэнщ «Свидетели Иеговы»-м къыхуаIэт псалъэмакъхэр. АтIэ, а гупым хэтхэр, кIэстум дахэхэмкIэ зэщыхуэпыкIарэ тхылъ цIыкIухэр яIыгъыу къызэхакIухьт унагъуэ-унагъуэкIэрэ, «псэукIэ тэрэзрэ» «еплъыкIэ захуэрэ» хэти иIэн зэрыхуейм къыхураджэу, «ягъэсэну» пылъу. Сытми, абыхэм жаIари пхагъэкIыну зыпылъари жылагъуэм къащыдимыщтэм, щэхурылажьэ защIащ.     

ИтIани, хабзэхъумэ къулыкъухэр еш ямыIэу йобэн апхуэдэ щIэпхъаджагъэхэр зыIэщIэщIэхэм. МВД-м къызэритымкIэ, нэгъабэ а организхацэм епха цIыху 41-м уголовнэ IуэхущIэхэр къыхуаIэтри жэуаплыгъэм ирашэлIащ, нэрыбгэ 19-ри яубыдащ щхьэусыгъуэ зэхуэмыдэхэм япкъ къикIкIэ.

Абы къинэмыщIауэ, хьэкумым и унафэ къэщтэкIэри имыгъэткIийуэ къигъэнакъым хьэпсэ къызытехуэхэм яхуэгъэзауэ («Свидетели Иеговы»-м хэт нэрыбгищым илъэси 8-м щIигъукIэ ягъэтIысащ).  

Иужьрейуэ жэуаплыгъэ ирашэлIахэм ящыщу щапхъэ нэрылъагъу ирокъу мазаем и 20-м уголовнэ Iуэху къызыхуаIэта ди лъахэгъу щIалэ Семенов Евгений.  Абы Тхьэм теухуауэ цIыхухэм ядригъэкIуэкIа «уэршэр мамырхэр» хьэкумыщIэм къилъытащ экстремизм лэжьыгъэм хуэхьыпхъэу икIи илъэсихрэ мазищрэ хьэпсэу къытрилъхьащ.

ИщхьэкIэ къыщытхьар къызэщIэткъуэжкIэрэ, гу нэхъ зылъыттэн хуейр зыщ. Нобэрей гъащIэр, арами гъэунэхуныгъэшхуэщ ди къэралымкIэ. Апхуэдэу щыщыткIэ, зэхэкуэгъухэр зы къыхуеджэныгъэ захуэм дыщIэвгъуэви, Урысейр — ди къэрал лъэщыр зэредгъэфIэкIуэнум, нэхъыфI зэрытщIынум девгъэгугъу!

Зыгъэхьэзырар

АБЫКЪУ Къамырзэщ