ЕгъэджакIуэ щыпкъэ, гъэсакIуэ нэс

Спорт зэхьэзэхуэкIэ и щIыхьымрэ и фэеплъымрэ ягъэлъэпIащ, яIэтащ илъэс 30-м зэрынэхьэскIэ зи къару,  зи гуащIэ ин, щIэныгъэ куу егъэджакIуэ IэщIагъэм хуэзыгъэтIылъа, щапхъэ зыгъэлъагъуэ спортсмену, узэщIакIуэу, къызэгъэпэщакIуэ къызэрымыкIуэу лъэпкъым и щIалэгъуалэм ящхьэщыта КЪЭЗЭНОКЪУЭ Мухьэрбий Хьисэ и къуэм.

Фэеплъ Iуэхугъуэр здыщрагъэкIуэкIа, Арэшыкъуэ Р. и цIэр зезыхьэ Хьэбэз къуажэ курыт еджапIэм къеблэгъащ Мухьэрбий и ныбжьэгъуахэр, игъэсахэр, къыдэлэжьахэр, Зеикъуэ курыт еджапIэм и егъэджакIуэ гупышхуэ, лъэпкъым и щIэблэр, и унагъуэм щыщхэр, Iыхьлыхэр.

Зэхьэзэхуэр къыщызэIуахым гуапэу абдеж къыщыпсэлъащ Мухьэрбий и ныбжьэгъу щыпкъэу къыдэгъуэгурыкIуа, КъЧР-м и ЦIыхубэ ЗэIущIэм (Парламентым) и депутат, ухуэныгъэмрэ энергетикэмрэкIэ комитетым и тхьэмадэ Щынахъуэ Кърым, Хьэбэз районым и Iэтащхьэ Тэмазэ Рэмэзан, Зеикъуэ къуажэм и унафэщI Зэубыд Рустам, зи фэеплъыр ягъэлъапIэм къыдеджа ПIапIшу Мухьэдин, курыт еджапIэм и унафэщI Хъупсырокъуэ Иринэ сымэ, нэгъуэщIхэри.

Дэтхэнэми къыхигъэщащ Къэзэнокъуэ Мухьэрбий а щIыхьыр икъукIэ зэрыхуэфащэр, и гуащIэкIэ, и лэжьыгъэ уасэншэмкIэ къызэрилъэщар. ФIыщIэ ин хуащIащ спорт зэхьэзэхуэр къызэгъэпэщыныр зи жэрдэм къикIахэм, абы мылъку хэзылъхьахэм, зэпеуэр зэхэзышахэм. Абыхэм ящыщуи я цIэр къраIуащ Хьэбэз муниципальнэ район администрацэр, физкутурэмрэ спортымрэкIэ комитетыр, Мухьэрбий и къуажэм и Iэтащхьэр, къуажэдэсхэр, и ныбжьэгъуахэмрэ иригъэджахэмрэ, и Iыхьлыхэр.

Зэхьэзэхуэр щрагъажьэм, ар езыгъэкIуэкIа Кхъуэхъу Линдэ кIэщIу къытеувыIащ Мухьэрбий и гъащIэ гъуэгуанэр къызэрекIуэкIам. АтIэ, дзэ къулыкъур Германием щрихьэкIри, ухуакIуэ бригадэм хэту колхозым щылэжьащ. «Путь Ильича» колхозым и комсомол комитетым и секретарь пщэрылъ хьэлъэр ихьащ, щытащ методисту. Иужьым Мухьэрбий и щIэныгъэм хигъэхъуэн и мураду щIыхьащ Ставрополь пединститутым. И гуащIэдэкI лэжьыгъэм иригъэжьащ физкультурэмкIэ егъэджакIуэу, атлетикэ псынщIэмкIэ гъэсакIуэ IэнатIэри зыдихьу.

Къэралым, абы къыщIэхъуэ щIэблэр гъэсэным, узыншэу къэгъэтэджыным хуигъэтIылъа гуащIэ иным къыпэкIуащ КъЧР-м и ЦIыхубэ ЗэIущIэм (Парламентым), республикэм егъэджэныгъэмрэ щIэныгъэмрэкIэ, физкультурэмрэ спортымрэкIэ Министерствэхэм, район администарцэм къабгъэдэкIа ЩIыхь, ФIыщIэ тхылъхэр.

— Мухьэрбий игъэсахэр, балигъ щыхъуахэми, лэжьапIэ нэужьым спортзалым къекIуалIэти, дауэ емышами, Iэмал имыIэу спорт джэгукIэхэмкIэ зызэрапщытт. Махуэ псом лэжьапIэм зэрыщылэжьар, зэрезэшар ящыгъупщэжти, жэщ ныкъуэ нэгъунэ щызэдэджэгу щыIэт, апхуэдизымкIэ спортыр я псэм хэпщIауэ гъэсакIуэм ахэр къигъэтэджати.

Гъэмахуэм къызэIуах еджапIэ лагерхэм деж еджакIуэхэр сыт и лъэныкъуэкIи псыхьыным: гуащIэдэкI лэжьыгъэкIи, спортымкIи увыIэгъуэ имыIэу Мухьэрбий телажьэт. Куэдрэ ныбжьыщIэхэр зыплъыхьакIуэ, нэгузыужь ишэт, Архъыз, Домбай Псыхуабэ, Налшык, нэгъуэщI къалэхэми.

Хэгъуэгу псом щекIуэкI спорт зэхьэзэхуэхэм Мухьэрбий и гъэсэнхэм зыкъыщагъэлъагъуэ зэпытт, увыпIэфIхэри къыщахьт: пщащэхэр, щIалэ цIыкIухэр зыхэт командэхэм. Игури и псэри хэпщIауэ спорт гъэсэныгъэм гуащIэшхуэ хуигъэтIылъащ Мухьэрбий. Абы и Iуэху бгъэдыхьэкIэу щытар ноби тщыгъупщэкъым, — къыхагъэщащ Мувхьэрбий фIыщэу зыцIыхуу щыта къэпсэлъахэм.

Лъэпкъым къыбгъэдэкIыу зэхьэзэхуэр зэхэзышахэм, абы хэтыну къекIуэлIахэм, къыщыпсэлъахэм захуигъазэкIэрэ, Мухьэрбий и шынэхъыжь Къэзэнокъуэ Хьэсэмбий мыращ жиIар:

— ГукъэкI фщIыуэ нобэ къефхьэжьа Iуэху дахэм пщIэшхуэ иIэщ. Уи егъэджакIуэу, гъэсакIуэу щытам и щIыхьыр пIэтыныр цIыхугъэ нэсщ. Сыт щыгъуи жаIэ: «УифI гъэлъапIи, уэри лъапIэныгъэ уихуэжынщ» жэуэ.

Нобэ фIыкIэ Мухьэрбий фигу къывогъэкIыжри, Тхьэм фигъэпсэу вжыдоIэ! Гъэсэныгъэ дахэ фхэлъщ! Ар Мухьэрбий фызыхуигъэсахэм ящыщщ. Ди лъэпкъым къыбгъэдэкIыу фIыщIэ ин фхудощI ди щIалэм и фэеплъыр вгъэлъэпIэну, вгъэщыпкъэну зигу къэкIауэ хъуам. Ди фIэщ мэхъу: Мухьэобий и псэр нобэ хуабжьу гуфIащ. Дэтхэнэми фи насыпыр Тхьэм кIыхь ищI!, — жиIащ Хьэсэмбий.

ВолейболымкIэ зэпеуэмкIэ къэдгъэзэжынщи, абы и хеящIэ нэхъыщхьэу щыта, Хьэбэз район администрацэм физкультурэмрэ спортымрэкIэ и комитетым и пашэ Къэргъей Аслъэн дызэрыщигъэгъуэзамкIэ, спорт зэхьэзэхуэм зызэрапщытыну командиплI къекIуэлIащ: Али-Бэрдыкъуэ, Хьэбэз, Зеикъуэ, Малый Зеленчук къуажэхэм къабгъэдэкIауэ.

Командэхэр ерыщагърэ нэрыгърэ яхэлъу текIуэныгъэм щIэбэнащ. Ауэ фIым я нэхъыфIу, мы спорт лIэужьыгъуэмкIэ IэкIуэлъакIуагъ ин зыбгъэдэлъу къыхэщар Хьэбэз къуажэм къигъэува гупращ. Абыхэм япэ увыпIэр къахьащ. ЕтIуанэ хъуащ Малый Зеленчук къуажэм къикIахэр. Ещанэ увыпIэр Мухьэрбий и къуажэм — Зеикъуэм зыIэрагъыхьащ. Зэпеуэм къыхэжаныкIахэм хуагъэфэщащ щIыхь нагъыщэхэр: кубокхэмрэ медалхэмрэ.

АБИДОКЪУЭ Люсанэ