ЕджакIуэхэм я Урысейпсо олимпиадэ

 Республикэм и Правительствэм и пэшышхуэм щагъэлъэпIащ еджакIуэхэм я Урысейпсо олимпиадэм и хэгъуэгу Iыхьэм щытекIуахэр.

Олимпиадэр сабий зэ­чиифIэхэр къыхэгъэщыным хуэунэтIауэ илъэс къэс ирагъэкIуэкI IуэхугъуэфIщ. IэщIагъэ къыздыщIах ищхьэ еджапIэхэм щIыхьэнымкIэ абы щытекIуэхэм я лъэкIыныгъэхэми хохъуэ.

2024-2025 еджэгъуэ илъэсым екIуэкIа олимпиадэхэм еджакIуэ 23 469-рэ хэтащ. Абы щыщу нэрыбгэ 1114-м, еджапIэ, муниципальнэ Iыхьэхэм увыпIэхэр къыщахьри, хэгъуэгу зэхьэзэхуэм нэсащ. Абдеж щIэныгъэфI зыбгъэдэлъу къыщызыгъэлъэгъуа, зэхьэзэхуэм пашэ щыхъуа еджакIуэ 80-м я щIыхь тхылъхэр мы махуэм ира­тыжащ. Зэхьэзэхуэр ТекIуэныгъэм и Илъэс 80-м траухуащ.

НыбжьыщIэхэм яхъуэ-хъуну дауэдапщэм къеблэгъащ КъЧР-м и Правительствэм и тхьэмадэм и къуэдзэ Поляков Евгений, рес-публикэм экологиемрэ щIыуэпс хъугъуэфIыгъуэхэмрэкIэ и министр Кочкаровэ Дианэ, ЦIыхубэ ЗэIущIэм (Парламентым) щIэныгъэмкIэ, егъэджэныгъэмкIэ, щэнхабзэмрэ щIалэгъуалэ IуэхухэмрэкIэ и комитетым и унафэщI Черняевэ Татьянэ  Урысей профсоюзым и хэгъуэгу егъэджэныгъэ къудамэм и унафэщI Чотчаевэ Маринэ сымэ.

— Нобэ ди пащхьэ ит, мурад гъэнэхуахэм хуэкIуэ ныбжьыщIэ акъылыфIэхэм щIэныгъэ лъагэ къагъэлъэгъуащ текIуэныгъэр къалъэщын ипэкIэ. ЕхъулIэныгъэр къыпокIуэ ерыщыгъэмрэ егугъуныгъэмрэ. Абы щIыгъущ я егъэджа­кIуэхэмрэ адэ-анэхэмрэ я зэхэщIыкIри, дэIэпыкъуныгъэри.

Си фIэщ мэхъу, феде­ральнэ утыкум щекIуэкIыну Олимпиадэм и кIэухым мы IуэхумкIэ пэрыт хъуа ныбжьыщIэхэм ди республи­кэр щIыхь пылъу къызэрыщагъэлъэгъуэнур, дяпэкIэ абыхэм щIэныгъэлI, цIыху пашэ къазэрыхэкIынур, — жиIащ республикэм егъэджэныгъэмрэ щIэныгъэмрэкIэ и министр Кравченко Иннэ, ныбжьыщIэхэм захуигъазэкIэрэ.

Олимпиадэм къызэщIеубыдэ предмет зэхуэмыдэхэр. НыбжьыщIэхэм езыхэм къыхах нэхъыфIу къадэхъу лъэныкъуэхэр. Черкесск къалэм дэт е 9-нэ гимназием и е 11-нэ классым щеджэ Сэкий Арсен (сурэтым щы­волъагъу) биологиемкIэ хэгъуэгу Олимпиадэм щытекIуащ.

— Дыкъэзыухъуреихь дунейр сыт щыгъуи сфIэгъэщIэгъуэнт. КъэкIыгъэхэм, хьэкIэкхъуэкIэхэм ятеухуауэ нэтынхэм сеплъ зэ­пытт, седжэт. Абы щхьэусыгъуэ хуэхъуагъэнщ ме­дицинэм и лэжьакIуэхэм я   унагъуэм сыкъызэрыщыхъуари. Си адэшхуэ Сэкий Анатолэрэ си адэ Муратрэ биологиер зэрысфIэфIым гу лъатауэ медицинэ лъэ­ныкъуэмкIэ сызэраунэтIы­ным пылът.

ЕджапIэм щекIуэкI олимпиадэхэм сыхэлэжьыхьащ сыт щыгъуи. Ауэ, е 9-нэ классым сыхэсу, олимпиадэм сыщытекIуати, абы  сигъэгушхуэри, нэхъри зэ­рызызужьыным сыхущIэкъуащ. АдэкIэ биологием нэхъри нэхъ зыхэзгъэгъуэзащ. Университетхэм къабгъэдэкI олимпиадэ зэхуэ­мыдэхэми сыхэт зэпытщ. Согугъэ мы гъэм ищхьэ медицинэ еджапIэм сыщIыхьэну, — дыщегъэгъуазэ ныбжьыщIэм.

Олимпиадэм ипкъ иту, илъэс къэс анэдэлъхубзэхэмкIи зэпеуэ йокIуэкI. Мы гъэм абы хэтащ хэгъуэ-гум щыщ еджакIуэ миным щIигъу. АдыгэбзэмкIэ хэгъуэгу зэпеуэм текIуэныгъэр къыщахьащ Черкесск къалэм и е 13-нэ гимнази­ем и е 9-нэ классым щеджэ Туаршы Иринэрэ Черкесск къалэм и е 17-нэ гимназием и е 11-нэ классым хэс Унэжь Лилэрэ.

НыбжьыщIэхэм я дипломхэр иратыжа нэужь, КъЧР-м егъэджэныгъэмрэ щIэныгъэмрэкIэ и Министерствэм къыбгъэдэкIыу ФIыщIэ тхылъхэр хуагъэфэщащ Олимпиадэр егъэкIуэкIы­ным хэта егъэджакIуэхэм.  ЗэIущIэм и кIэм псори зэхэту фэеплъ сурэт зытрахащ.

БОРЭНЫКЪУЭ Мадинэ