ХъыбарыфI дыдэ къытIэрыхьащ ди лъэпкъым къыхэкIа спортсмен лъэрыхь, самбист цIэрыIуэ, Ботэщей къуажэм щыщ ТАМБИЙ Адемыркъан хуэгъэзауэ. АтIэ, щэкIуэгъуэм (ноябрым) и 13-16 махуэхэм Краснодар къалэм щекIуэкIа, зи ныбжьыр илъэс 21-м нэс спортсменхэр зыхэта, дзюдо спорт лIэужьыгъуэмкIэ Урысейм пашагъэр къыщыхьыным хуэгъэза спорт зэхьэзэхуэ иным япэ увыпIэкIэ къыхэжаныкIащ Москва къалэм къыбгъэдэкIыу зэпеуэм зыкъыщызыгъэлъэгъуа ди лъэпкъэгъу самбист, дзюдоист цIэрыIуэр. Зэхьэзэхуэм къриубыдэу Адемыркъан зэпэщIэтыныгъитху щригъэкIуэкIащ, дэнэ дежи пашагъэр щиубыду.
Финал зэхьэзэхуэм къыпэщIэхуа дагъыстан дзюдоистым бжыгъэр 13-0-уэ текIуащ. Спортсменыр къызыбгъэдэкIыр Москва къалэращ. Фигу къэдгъэкIыжынщи, Тамбий Адемыркъан ди лъэпкъыр Дунейпсо утыкухэм самбокIэ щызыIэта спортсмен лъэрыхь дыдэщ. АтIэ, а спорт лIэужьыгъуэмкIэ Адемыркъан Дунейпсо пашагъэр тIэунейрэ къилъэщын хузэфIэкIащ.
Хьэбэз районыр, адыгэу дуней хъурейм тетыр зэрыгушхуэ чемпион ныбжьыщIэм и гъэсакIуэщ Iуэху зэхэщIыкI ин зыбгъэдэлъхэу Кабанов Дмитрий, Братхэ Къаплъэн, Уэз Мыхьэмэт сымэ. ДыщогуфIыкI Адемыркъан и текIуэныгъэм. Дыщыщыгъуазэщ адэкIи щIалэр спорт лъагапIэ инхэм хуэкIуэн зэримурадым, уеблэмэ и хъуэпсапIэ нэхъыщхьэу игъэувыр Олимп Джэгухэм бжьыпэр щиубыдынращи, Тхьэм къыдигъэхъу! И IэпщIэлъапщIагъэм ефIэкIуэну, и ехъулIэныгъэ лъагэхэмкIэ адыгэцIэр дуней хъурейм щиIэтыну дыхуохъуахъуэ!
АБИДОКЪУЭ Люсанэ
Больше на Черкес хэку
Подпишитесь, чтобы получать последние записи по электронной почте.
