Къэрэшей-Черкесым и Правительствэм и тхьэмадэ Аргун Мурат хэтащ гуащIэдэкI сату утыкур зэфIэгъэувэжынымкIэ лажьэ къулыкъузэпх лэжьакӀуэ гупым и зэIущIэм. Ар екIуэкIащ Урысей Федерацэм и Правительствэм и тхьэмадэм и къуэдзэ Голиковэ Татьянэ и унафэм щIэту.
Ахэр тепсэлъыхьащ 2026 гъэм къыщегъэжьауэ 2036-м пщIондэ Урысей Федерацэм и экономикэр зыхуэныкъуэну IэщIагъэлӀхэр зыхуэдизыр гъэнэIуэным. Голиковэ Татьянэ хэIущIыIу зэрищIамкIэ, 2026 гъэм икIэм нэгъунэ зэхалъхьэнущ къэралыр IэщIагъэлIхэмкIэ зэхуригъэкъунымрэ гуащIэдэкI сату утыкур 2036 гъэм ехъулIэу щыIэну технологическэ зэхъуэкIыныгъэхэм хуэгъэхьэзырынымрэ я стратегие план. Абы зэрыщIигъэбыдамкIэ, хэгъуэгухэри жыджэру хэтыпхъэщ мы лэжьыгъэм. — И чэзум икIи фIагъ хэлъу гъэхьэзырын хуейщ дызыхуэныкъуэну IэщIагъэлIхэр гъэбелджылыныр. Ар лъапсэ хуэхъунущ къэтхьыну унафэм.
Ар хэгъуэгухэм я Iэтащхьэхэр махуэ къэси зэлэжьыпхъэ къалэнщ, — къыхигъэщащ Голиковэ Татьянэ. Къэрэшей-Черкес Республикэм бэзым ит лэжьыгъэ щагъэзащIэ IэщIагъэлIу дызыхуэныкъуэнур зыхуэдэмрэ зыхуэдизымрэ зэхэгъэкIынымкIэ. 2025 гъэм лэжьапIэтхэм драгъэкIуэкIауэ щытащ щIэупщIэныгъэ убгъуа. Абы хэтащ хэгъуэгум и предприятэ зы минрэ щитхум щIигъу. Абы лъэкIыныгъэ къыдитащ илъэсибл гъунэгъум дызыхуэныкъуэну IэщIагъэлIхэмкIэ Iуэхур зэрыщытыр тегъэчынауэ зэрызэхэтлъхьэну гъэлъэгъуэныгъэхэр зэдгъэпэщыну. ЩIэупщIэныгъэм къыпэкIуахэмкIэ белджылы ящIащ IэщIагъэлIхэм нэхъыбэу хуэныкъуэ IэнатIэхэр.
ПАЩIЭ Хьэдис
Больше на Черкес хэку
Подпишитесь, чтобы получать последние записи по электронной почте.
