Дызэкъуэтмэ, ди къэкIуэнур быдэщ

Лъэпкъхэм я зэкъуэтыныгъэм и Махуэм Къэрэшей-Черкес Республикэм гуфIэгъуэ дауэдапщэ куэд щекIуэкIащ. Черкесск къалэм, Первомайскэ уэрамым и утыкушхуэм «Лъэпкъзэпх зэкъуэтыныгъэ» фестиваль гъэщIэгъуэн щызэхэтащ. А Iуэхугъуэм къызэщIиубыдащ лъэныкъуэ куэд. УщрихьэлIэт абы лъэпкъ къэс и пщIантIэ къызэгъэпэщахэм, творческэ утыкухэм, мастер-классхэм, акъылгъэлажьэ джэгукIэхэм. Щхьэхуэу зыщрагъэубгъуащ зауэ IэкIуэлъакIуагъэм зыхуегъэсэным, СВО-м хэтхэм гулъытэ яхуэщIыным хуэунэтIа утыкуми.

МахуэщIым зыщагъэпсэхуну унагъуэкIэ къекIуэлIащ. Дэтхэнэми игъуэтт и нэгу зэрызригъэужьын Iуэхугъуэхэр. Нэхъ цIыкIухэм я напэхэм сурэт тращIыхьт Урысейм, республикэм щыпсэу лъэпкъхэм я ныпхэр тету. Хэт шахмат, хэт пхъэ зэтелъхьэ зэдэджэгут.

МыдэкIэ къыщытт сурэт зытепщIыхь хъун стендышхуэр. Абы щхьэж езым зэрыфIэфIу сурэт гуэр трищIыхьти, иужькIэ дыщеплъыжам абы и зэхэлъыкIэм, гупсысэм ухуашэт ди щIыналъэм деж лъэпкъ зэкъуэтыныгъэр зэрыбыдэм. Лъэпкъхэм я бзэ зэхуэмыдэхэмкIэ псалъэхэр щытхат, сурэтхэм щыплъагъут лъэпкъыу хъуам ящыщ Iыхьэ гуэр. Лъэпкъ пщIантIэхэм щынэрылъагъут дэтхэнэми и щэнхабзэр, и псэукIэр къэзыгъэлъагъуэ хьэпшыпхэр. Урысхэм я пщIантIэм самоварыр къыщывэт, хьэлыгъуанэ цIыкIухэри телъу.

Адыгэхэм я щIыпIэм пшынауэ макъыр щыинти, цIыхур куэду къришалIэт. Пшына уэ Iэзэ Чырбыж Зулетэ ныбжьыщIэ гуп щIыгъуу адыгэ макъамэхэр къригъэбзэрэбзыкIт, укъытелъадэу укъэфэным уригъэхъуапсэу. Зауэм теухуа лъэныкъуэмкIэ бунэтIмэ, мыбдеж ныбжьыщIэхэм лъэкIыныгъэ яIэт автоматыр зэпкърыхын-зэпкъырылъхьэным зыхуагъэсэну.

Зауэ Iэщэхэм я зэпкъырылъыкIэм, я мыхьэнэм ныбжьыщIэхэм къахутепсэлъыхьт СВО-м и ветеранхэр. ЩIалэ цIыкIухэми нэхъыжьыIуэхэми ар хуабжьу яфIэгъэщIэгъуэну къыщIэкIащ, икIи Iэщэр къагъэIэрыхуэу, абы хэту СВО-м хэтахэм упщIэ куэди ирату щытащ. Электроннэ тирми цIыху куэд къызэхуишэсат. Мыбдеж дыдэм зыщебгъэсэфынут фэбжь зыгъуэт цIыхум япэу дэIэпыкъуэгъу узэрыхуэхъунум. Абыхэм хуагъасэт «Авангард» зауэ-хэкупсэ гъэсэныгъэмкIэ Купсэм и волонтерхэм. Хэти СВО-м ирагъэхьыну зэрызахъумэхэр ящIт. КъинэмыщIауэ, СВО-м щыIэхэм хуабагъ зыхэлъ тхыгъэхэр хурагъэхыну мыбы къекIуэлIа псоми лъэкIыныгъэ яIащ. Ар здатхын, зрадзэжын ашычыр щыту щIыпIэ щхьэхуэ абы хухэхат. МахуэщIыр игъэдэхащ концертышхуэм. Республикэм и уэрэджыIэхэм ягъэзэщIащ Хэкум, зэкъуэтыныгъэм теухуа уэрэдхэр.

БОРЭНЫКЪУЭ Мадинэ