«Дунейр си нэхэмкIэ»

Ди хэгъуэгум и жылагъуэ лэжьакIуэ жыджэр, Урысейм и бзылъхугъэхэм я зэгухьэныгъэм и КъэрэшейЧеркес хэгъуэгу къудамэм и унафэщI БОРЛАКОВЭ Маринэ ООН-м доклад къыщищIащ.

«Создавая будущее сегодня» щхьэщIэдзапIэм щIэту Женевэ щыIэ ООН-м и штаб-фэтэрым щекIуэкIа зэпсэлъэныгъэм къэрал 30-м щIигъум къабгъэдэкIа экспертхэр хэтащ. Ди хэкуэгъу бзылъхугъэр апхуэдэ мыхьэнэ лъагэ зиIэ Iуэхугъуэм къызэрыщыпсэлъар дэркIэ нагъыщэфIщ. Къэралыбэ утыкушхуэм щытепсэлъыхьащ узыншагъэкIэ щыщIагъэ зиIэхэм экономикэ и лъэныкъуэкIэ я зэфIэкIым зегъэужьыным, къэухь IэрыщIыр зыхэт медицинэм къыдэкIуэ щытыкIэхэм зэрызахъуэжым, ныкъуэдыкъуагъ зиIэхэм я шынагъуэншагъэр къызэгъэпэщыным, нэгъуэщI упщIэхэми. Борлаковэ Маринэ ди щIыналъэм къигъэзэжа нэужь, щIыпIэ жыжьэм къыщаIэта IуэхугъуэхэмкIэ республикэм и журналистхэм къыддэгуэшащ. Мы Iуэхугъуэр къызэригъэпэщащ ныкъуэдыкъуагъ зиIэхэм ядэIэпыкъунымкIэ.

«Парус надежды» къэралыбэ псапащIэ жылагъуэ организацэм, БРИКС стратегическэ проектхэмкIэ къэралыбэ альянсым и дэIэпыкъуэгъу хэлъу. «Парус надежды» организацэм и Президент Давыдов Денис зи узыншагъэкIэ зи зэфIэкI иримыкъухэм ящыщщ. Арами, ныкъуэдыкъуагъ зытелъхэм я зэфIэкIыр зэры гъунэншэм езым и дуней тетыкIэр и щыхьэтщ. Женевэ деж къэрал бжыгъэ къызэщIиубыдэу щаутIыпща «Мир моими глазами» проектыр къызэзыгъэпэщари аращ. А проектыр хуэгъэзащ ныкъуэдыкъуагъ зытелъхэм я дунейр къэгъэлъэгъуэным, лъэкIыныгъэу ябгъэдэлъымкIэ фIэщ хъуныгъэр нэхъ ин щIыным.

— Сэ мы Iуэхум сыхэтыну къыщысхуагъэфэщами си фIэщ мыхъущурэ сыпэджэжауэ щытащ. Ауэми сыгугъакъым абы сыхэхуэну. Ауэ, ди къэралым щыщу абы хэтыну ягъэбелджыла цIыху 29-м щыщу блыращ ВИЗЭ къызратар, сэри сахэту. Апхуэдэу щыхъуакIэ, ар ди хэгъуэгумкIэ къэзмыгъэсэбэпынкIэ Iэмал иIэтэкъым. Утыкум сыкъыщыпсэлъэну ипэхуным симыгугъами, хэгъуэгум сыкъызэрыбгъэдэкIар си гум илъти, зызэзгъэпэщри, сыкъэпсэлъащ, ныкъуэдыкъуагъ зытелъхэм ядэIэпыкъунымкIэ гулъытэ зыхуэщIын хуейуэ слъытэ лъэныкъуэхэр утыкум щызгъэIуащ. Унагъуэм зи узыншагъэкIэ щыщIагъэ зиIэ щыщIэскIэ, абы кIэлъыплъми гулъытэшхуэ зэрыхуэныкъуэр къыхэзгъэщу сыкъэпсэлъащ. ИтIанэ, мы ирагъэжьа проектыр щэджащэщ икIи, си фIэщ мэхъу, ди хэгъуэгум щыпсэухэм ящыщ абы хыхьэмэ, ифI къызэрекIынур. Нобэ си къалэну къызолъытэ ар ди цIыхухэм янэсхьэсыныр, — жиIащ Борлаковэ Маринэ. «Мир моими глазами» къэралыбэ проектыр псапащIэ сурэт гъэлъэгъуэныгъэщ. Абы хэтщ дуней псом и къэрал 30-м щIигъум щыпсэу, узыншагъэкIэ щыщIагъэ зиIэхэр. А проектыр адрейхэм нэхъыщхьэу къыщхьэщызыгъэкIыр сурэтхэр зыщIыр зи зэфIэкI иримыкъу цIыхухэрауэ зэрыщытращ. Сурэт ящIам къыдэкIуэу ахэр я щхьэ къытопсэлъыхь, я лэжьыгъэмкIэ дунейр зэралъагъур къагъэлъагъуэ. — А лэжьыгъэм и мыхьэнэр хегъахъуэ Китайм къыхилъхьа Iуэхугъуэм. Абы и хьэрш станцэхэм проектым хэт сурэтхэр ирегъэхь.

ИужькIэ, абы къызэщIрагъэубыда къэралыгъуэхэм сурэт-гъэлъэгъуэныгъэхэр щекIуэкIынущ. Хэт ищIэрэ, ди щIыналъэм щыщ, зи узыншагъэкIэ зи зэфIэкI иримыкъухэм ящыщу сурэт щIыным, блогерствэм дихьэххэмкIэ ар IэмалыфI хъункIэ хъунщ я цIэр ягъэIунымкIэ, я лэжьыгъэхэр утыкушхуэм къыщагъэлъэгъуэнымкIэ, — жиIащ Борлаковэ.

Проектым и къалэн нэхъыщхьэр — ныкъуэдыкъуагъ зытелъхэм езым я дуней еплъыкIэр, я зэфIэкIыр къэгъэлъэгъуэнращ, абыхэм я нэкIэ дунейм и зэхэлъыкIэ дахэм гу лъегъэтэнращ, а Iуэхур и тегъэщIапIэу къэралхэм я зэныбжьэгъугъэр гъэбыдэнращ. Сурэт гъэлъэгъуэныгъэр онлайн, офлайн щытыкIэхэм иту екIуэкIынущ. Лэжьыгъэхэм ящIыгъун хуейщ абы хэт цIыхухэм я гъащIэ хъыбарри. Проектым ипкъ иту псапащIэ аукцион ирагъэкIуэкIынущи, апхуэдэу яща сурэтхэм къыщIаха ахъшэр авторым хурагъэхьыжынущ. Мы Iуэхум и къарур нэхъ лъэщ хъун папщIэ актер, спортсмен, хьэрычэтыщIэ цIэрыIуэхэр къыхашэ. «Мир моими глазами» проектыр — ар сурэт гъэлъэгъуэныгъэ къудейкъым, атIэ зи зэфIэкI иримыкъухэр социальнэ гъащIэм деж я лъэр щыгъэбыдэнымкIэ IэмалыфIщ. Абы хэтыну хуейхэм мы электроннэ пощтым ятх хъунущ: mir@ bricsplanet.org.

БОРЭНЫКЪУЭ Мадинэ