Ди гуапэу дывохъуэхъу МахуэшхуэмкIэ — зи хэку къэзыгъэзэжа адыгэхэм я МахуэмкӀэ! Мы махуэ щӀэщыгъуэм дигу къегъэкӀыж илъэс 27-кӀэ узэӀэбэкӀыжмэ, 1998 гъэм шыщхьэӀум и 1-м къэхъуа Ӏуэхугъуэшхуэр. А махуэ дыдэм, Урысей Федерацэм и унафэщӀхэм я дэӀэпыкъуныгъэкӀэ, япэу ди хэкуэгъу гуп лъапӀэ лъахэм къыщытеуващ – Косовэ Автоном щӀыналъэм щыщ адыгэ (шэрджэс) хэхэсхэр.
Къэрал куэдым щыпсэу адыгэхэр зыхэс лъэпкъхэм пщIэ къыхуащIу, я IэщIагъэщIэныгъэкIэ ехъулIэныгъэфIхэр къагъэлъагъуэу нобэм къызэрысар ину ди гуапэщ. Ауэ дэнэ щӀыпӀэ ахэр щымыпсэуми, сыт хуэдэ бзэкIэ мыпсалъэми, ягури я псэри ХэкужьымкӀэ къэгъэзащ, ар я плъапӀэщ. Апхуэдэу, нобэ Косовэ, Тыркум, Сирием, Израилым, Иорданием, Германием, США-м къикӀыжа ди хэкуэгъу 5000-м щӀигъу Ищхъэрэ Кавказым и республикэхэм щопсэу. Абыхэм ящыщщ Сирием щыщ ди лъэпкъэгъу 3000-р.
Ахэр псори ди Хэкум и цӀыху щыпкъэ хъуащ, абы и зыужьыныгъэм хэлъхьэныгъэшхуэ хуащӀ. ЕхъулӀэныгъэ яӀэу жылагъуэм хыхьащ, ӀэнатӀэ зэмылӀэужьыгъуэхэм щолажьэ, дуней псом тет адыгэ хэхэсхэм я зэпыщӀэныгъэр ягъэбыдэ. Къэралми и зэфӀэкӀым къриубыдэу куэд ещӀэ абыхэм псэукӀэ тынш, ехъулӀэныгъэ яӀэу зыщагъэзэгъэн щытыкӀэхэр къызэрагъэпэщынымкӀэ. ПщӀэ зыхуэсщӀ си къуэшхэ, си шыпхъухэ!
Дунейпсо Адыгэ Хасэм и ГъэзэщӀакӀуэ гупми сэри къыдбгъэдэкӀыу гуапэу сывохъуэхъу зи хэку къэзыгъэзэжа адыгэхэм я МахуэмкӀэ! Къэрал зэмылӀэужьыгъуэхэм фыкъыщыхъуами, хэкужьым хувиIэ пыщӀэныгъэр лӀэщӀыгъуэхэм къриубыдэу быдэу къэнащ. Фи лъахэм фыкъыщыкӀуэжым, фэ гъащӀэм щывгъэзэщӀащ хэхэс щӀэблэ куэдым я хъуэпсапӀэр — сыт щыгъуи фи гум илъа щӀым фытетыныр, фытелэжьэныр.
Ди фӀэщ мэхъу адыгэхэм (шэрджэсхэм) я хэкужьым къагъэзэжыныр къызэпымыуну. Къеблэгъэжахэр адыгэ щIыналъэм лъэ быдэкIэ щыувыну, щыбэгъуэну! Ди хэхэсымрэ хэкужьу щыт Урысеймрэ я зэпыщӀэныгъэр ефIэкIуэну, ХэкумкIэ къэхъуапсэ дэтхэнэми и мурад дахэр къехъулIэну, лъэпкъым, ди къэралым къыхуэщхьэпэн Iуэху куэд длэжьыну Тхьэм тхузэфIигъэкI!
СЭХЪУРОКЪУЭ Хьэутий, ДАХ-м и тхьэмадэ
Больше на Черкес хэку
Подпишитесь, чтобы получать последние записи по электронной почте.
