ДэIэпыкъуэгъухэм — фIыщIэ

Нобэ къэралым къыхуигъэува къалэнхэр ягъэзащIэу СВО-м щыIэ  34-нэ, 54-нэ гвардейскэ бригадэхэм я унафэщIхэмрэ зауэлIхэмрэ къабгъэдэкIыу фIыщIэ тхыгъэхэмрэ медалхэмрэкIэ къыхагъэщащ гуманитар дэIэпыкъуныгъэр республикэм къыщызэгъэпэщыным гуащIэшхуэ хэзылъхьэ цIыхухэм. Мы Iуэхур къызэригъэпэщащ КъЧР-м СВО-м и ветеранхэм я Ассоциацэм.

Мы IуэхущIапIэм и лэжьыгъэр зэрырихьэкI илъэсым гуманитар гулъэхэр зэхуэхьэсынымрэ ахэр зэуапIэм егъэшэнымрэ зэкIэлъызыгъакIуэ купсэ хъуащ.

Ассоциацэм и унафэщI, КъЧР-м и ЦIыхубэ ЗэIущIэм (Парламентым) и депутат Мутчаев Дахир и щхьэкIэ 34-нэ гвардейскэ мотострелковэ бригадэ щхьэхуэм хэту СВО-м къулыкъу щищIащ. Иджыпстуи зэ-

пыщIэныгъэшхуэ ядиIэщ къулыкъу къыдэзыщIахэм, IэщэкIэ къуэш зэхуэхъуахэм. ЗауэлIхэр зыхуэныкъуэмкIэ абы зыкъыхуагъазэурэ, адэкIэ КъЧР-м и ЦIыхубэ ЗэIущIэм и депутатхэм гуманитар гулъэхэр зэрагъэпэщ.

КъинэмыщIауэ, ди республикэм еджэныгъэм епха IуэхущIапIэхэр, сабий IыгъыпIэхэр, жылагъуэ зэгухьэныгъэхэр а Iуэхум жыджэру пыкъуокIри, я дэIэпыкъуныгъэр зэи зэпыукъым.

Ахэр ди республикэм къыщызэрагъэпэщ КъЧР-м и Iэтащхьэ Темрезов Рэшид и унафэкIэ къагъэщIа Штабым и къэухьым иту.

А махуэм зауэлIхэм къабгъэдэкIа нагъыщэхэр хэIэтыкIауэ щратыжащ жылагъуэ дэIэпыкъуныгъэмкIэ Штабым и хэщIапIэм.

Зауэ дзэ пакIэхэм я командирхэмрэ зауэлIхэмрэ фIыщIэ псалъэхэр кърагъэхьащ дэIэпыкъуныгъэ Iуэхур къызэгъэпэщыным хэлэжьыхь дэтхэнэми хуэгъэзауэ.  Апхуэдэу, «За содействие СВО» медалымрэ ФIыщIэ тхылъхэмрэ  зыхуэгъэзахэм яритыжащ Мутчаев Дахир.

КъЧР-м и ЦIыхубэ ЗэIущIэм (Парламентым) и тхьэмадэ Иванов Александр къыхуагъэфэща нагъыщэр гуапэ зэрыщыхъуар жиIащ икIи СВО-м и ветеранхэм я Ассоциацэм и лэжьыгъэм зэрыхуэжыджэрым, зауэлIхэм, ветеранхэм, абыхэм я унагъуэхэм защIэгъэкъуэнымкIэ лэжьыгъэшхуэ зэрагъэзащIэр къыхигъэщащ. — Ди зауэлI хахуэхэм дадэIэпыкъунущ абы хуэныкъуэху. Ди лъэпкъ пашэ Путин Владимир игъэнэIуа къалэнхэр псори  нэгъэсауэ гъэзэщIапхъэщ. Абы тету ди зауэлIхэми зэуапIэм я лэжьыгъэр щагъэзащIэ.

АбыкIэ дэтхэнэми фIыщIэ мыухыж яхудощI. Дэри мыбдеж ди къалэнхэр щыдогъэзащIэ, — жиIащ Иванов Александр.

А махуэм депутатхэм къанэмыщIауэ, нагъыщэхэр иратащ КъЧР-м финансхэмкIэ и министрым, КъЧР-м СВО-м и ветеранхэм я Ассоциацэм къыбгъэдэкIыу фIыщIэ тхылъхэр хуагъэфэщащ жылагъуэ дэIэпыкъуныгъэмкIэ Штабым, нэгъуэщIхэми.

БОРЭНЫКЪУЭ Мадинэ