Къэрэшей-Черкесым и къалащхьэм щыIэ къэрал филармонием дыгъэгъазэм и 10-м щагъэлъэпIащ сурэт щIынымкIэ «Охрана труда глазами детей» зэпеуэм хэта, щытекIуа ныбжьыщIэхэр.
Сабийхэм яхуэгъэза зэхьэзэхуэр жэпуэгъуэм и 13-м щегъэжьауэ щэкIуэгъуэм и 3-м пщIондэ екIуэкIащ. Ар къызэригъэпэщауэ щытащ республикэм гуаЗэхьэзэхуэ щIэдэкIымрэ социальнэ зыужьыныгъэмрэкIэ я Министерствэм. Ар илъэс бжыгъэ хъуауэ зэхашэ икIи мы гъэм абы сабий 78-рэ хэтащ. Дэтхэнэ лэжьыгъэри – сабий зытхам и псэм щыщ Iыхьэщ, и дуней еплъыкIэм и пакIэщ.
Дауэдапщэр зэхаублащ «Социальная защита населения в Карачаево-Черкесской Республике» къэрал программэм и жьауэм щIэту. Абы и къалэн нэхъыщ хьэу щытар сыт хуэдэ лэжьыгъэри шынагъуэншэу къызэгъэпэщауэ зэрыщытыпхъэм къыдэкIуэтей щIэблэм гу лъегъэтэнрат. ИкIи, абы теухуа я гупсысэхэр сурэтхэмкIэ къагъэлъэгъуэну цIыкIухэр къыхураджащ. ЖыIэпхъэщи, зэпеуэм республикэм щыщ сабий псори къызэщIиубыдащ: районхэр, къалэхэр, сабий садым, курыт еджапIэхэм щеджэхэр, творчествэмкIэ еджапIэхэм кIуэ цIыкIухэр…
Сурэт щIыным дихьэх ныбжьыщIэхэр номинацэ зэмылIэужьыгъуэхэмкIэ зэхагъэкIащ. Апхуэдэщ «Креативный подход», «Труд уважай – охрану труда соблюдай», «Помни всегда и везде: главное – это охрана труда», «Охраняя себя — храним других», «Охрана труда в знаках и символах», «Внедрение искусственного интеллекта в охрану труда» номинацэ щхьэхуэхэр. Зэхьэзэхуэм хэта цIыкIухэр ягъэлъэпIэну, яхъуэхъуну филармонием щекIуэкIа дауэдапщэм къеблэгъащ республикэм гуащIэдэкIымрэ социальнэ зыужьыныгъэмрэкIэ и министр Хачиров Кемал, абы и къуэдзэхэу Щай Мадинэ, Хубиевэ Фатимэ, Шияновэ Ольгэ сымэ. МахуэщIыр къызэIуихащ Хачиров Кемал. — Зэпеуэм хэтахэми, щытекIуахэми, абыхэм я адэ-анэхэми, я егъэджакIуэхэми – псоми сывохъуэхъу! НыбжьыщIэхэ, фи нобэрей текIуэныгъэ цIыкIур текIуэныгъэшхуэхэм хуэкIуауэ дигъэлъагъу! Фэ сабийхэращи ди пщэдейр, фIыуэ щыIэм фыкъаухъуреихьыну! — жиIащ министрым. Хъуэхъухэм къадэкIуэу, номинацэ къэс щытекIуахэм, гулъытэ зыхуащIахэм щIыхь тхылъхэр, саугъэт гукъинэжхэр Министерствэм и унафэщIхэм сабийхэм хуагъэфэщащ. Апхуэдэу, зэпеуэм щытекIуахэм, илъэси 7-10-м итхэм я ныбжьым деж япэ увыпIэр къэзылъэщахэм яхэхуащ Хьэбэз къуажэм щыщ МыкIытэ Айдари.
ЩIалэ цIыкIур дауэдапщэм и анэ Сюзаннэрэ и къуэш цIыкIу Хъалидрэ я гъусэу къеблэгъащ. Ар къызэрыддэгуэшамкIэ и ныбжьыр илъэси 10-м итщ, еплIанэ классым фIыщэу щоджэ. — Футболым сыдехьэх, «АРР» командэм полузащитникыу сыщоджэгу. Абы сыхэту къалэ куэдым сыщыхьэщIагъэххэщ.
Ауэ сурэт щIынри жагъуэкъым. Зэпеуэр зэрекIуэкIыр къыщысцIыхум, сыхэтыну сытегушхуащ, — къыджиIащ Айдар. КъыхэжаныкIахэм, увыпIэ къэзылъэщахэм ящыщщ Псыжь къуажэм щыпсэу зэшыпхъухэу Лэфыщхэ Аделинэрэ Къардэн Рианэрэ. Пщащэхэм сурэт щIыныр яфIэфI дыдэщ, зэпеуэ зэхуэмыдэхэми хэт зэпытщ. А цIыкIухэм зэрыжаIащи, зэрытекIуахэр, саугъэтхэр къызэрыхуагъэфэщахэр я гуапэ дыдэщ икIи адэкIи творчествэ и лъэныкъуэкIэ заужьыну нэхъри тегушхуэнущ.
ГЪУКIЭКЪУЛ Иринэ
Больше на Черкес хэку
Подпишитесь, чтобы получать последние записи по электронной почте.
