ЦIыхугъэр я гъуазэу

Дунейр зыгуэркIэ нэхъыфI зыщIыну, дэIэпыкъуныгъэ хуэныкъуэм зыщIэзыгъэкъуэну хьэзыр дэтхэнэри доброволецым, волонтёрым и Дунейпсо Махуэм зэрешалIэ. Мы махуэщIыр махуэгъэпсым щыщ махуэ хэIэтыкIа къудейкъым, атIэ цIыхугъэм, гущIэгъуныгъэм, гущабагъым, гумащIагъым я дамыгъэщ. Волонтёрыр нэгъуэщIхэм къащхьэщокI жытIэмэ, егъэлея хъунукъым. АтIэ, абыхэм я зэмани, я псэ къаруи пщIэншэу, псапэу, гулъытэ хуэныкъуэм тыгъэ хуащIыну хьэзырщ. Фегупсысыт! Куэд апхуэдэ цIыхуу фи хъуреягъым щыIэр…

Волонтёрхэм, доброволецхэм уащрохьэлIэ гъаблэ, зауэ, щIыуэпс зэрымыщIэ къэхъукъащIэхэр къыздэхъу щIыпIэхэм. Ахэр гукъабзэщ, пэжым и телъхьэщ, щIэгъэкъуэн хуэныкъуэм нэуфIыцIакIэ блэкIхэм ящыщкъым. Абы къыхэкIыу волонтёрхэм къуажэхэм, къалэхэм, хэгъуэгу щхьэхуэхэм, къэрал псохэм социальноэкономическэ зыужьыныгъэм теухуауэ хуащI хэлъхьэныгъэр къэпщытэгъуейщ.

Апхуэдэ щытыкIэр нэхъри IупщI хъуащ зауэ операцэ хэхар къызэрежьэрэ. Сыт щхьэкIэ жыпIэмэ, зы Iэмали щыIэкъым СВО-м нобэ хэт щIалэхэм дэIэпыкъуэгъу, щIэгъэкъуэн яхуэхъу цIыху псэ къабзэхэм ягуэщI лэжьыгъэм и инагъри абы псапэу пыщIари къыпхуэпщытэну. Мы кIуэрабгъумкIэ щапхъэ зэрыримыкъу щыIэкъым СВО-р къызэрежьэрэ Хьэбэз районым щылажьэ «Родные сердца» гупыр. Абы хэтхэр еш ямыIэу, «жэщи-махуи» жыхуаIэм хуэдэу зэхэуэхэр здекIуэкI щIыпIэхэм щыIэ ди зауэлIхэм дэIэпыкъуэгъу яхуохъу.

Мы гупым хэту къэлъытапхъэщ шхыныгъуэхэр, щыгъын хуабэхэр, зэрызагъэкъабзэ пкъыгъуэхэр, я сомыр зауэлIхэм папщIэ къезыхьэлIэ дэтхэнэри. Ахэр сабийщ, дадэ-нанэщ, цIыху балигъщ, хыхьэхэкIырылажьэхэщ, цIыху къызэрыкIуэхэщ. Дэтхэнэри а псапащIэ Iуэхум щIыхэтыр и псэм, и гум и къыхуеджэныгъэщ. Гуманитар дэIэпыкъуныгъэр къезыхьэлIэхэм къинэмыщIауэ, адэкIэ а псор зэхэзыдзыж, зэрызылъхьэ, зыгуэр къащэхуамэ, ар кIуэуэ къэзыщтэж, хьэлъэр зэрашэну машинэм изыгъэзагъэхэри, рулым дэсу СВО-м щыIэ щIалэхэм ар яхунэзышэсхэри щыIэщ.

Мис а гупым щыщ зы щIалэ псэ къабзэщ волонтёрым и Махуэм ипкъ иту зи гугъу фхуэтщIыну дызыхуейр. КЪУАЧХЭ (КОЙЧЕВХЭ) Индрис Алий и къуэр Хьэбэз къуажэм къыщыхъуащ, абы щопсэу, СВО-м щыIэхэм гуманитар хьэлъэр хузэрагъэпэщын зэрыщIадзэрэ а псапащIэ Iуэхугъуэм псэемыблэжу хэтщ. Пэжыр жытIэнщи, Индрис утыкуакуэкъым, псапэ ищIэр игъэIунуи хуейкъым, ауэ къызэрытлъытэмкIэ, мы щIалэм хэлъ гудзакъэр нэгъуэщIхэми щапхъэу ягъэлъагъуныр, цIыхугъэр псом я щхьэу зэрыщытыр иджыри зэ дэтхэнэми дигу къэдгъэкIыжыныр тфIэигъуэщ. Индрис еш имыIэу хьэлъэ ирагъашэхэр машинэм ирелъхьэ-ирех, ахъшэ зэхадзамкIэ ди зауэлIхэр зыщIэлъэIуахэр зыщIыпIэ къишын хуеймэ, кърешалIэ, нэгъуэщIу сыткIэ сэбэп хъуфынуми лъэкI къигъанэкъым.

Апхуэдэщ абы и анэ Дугархъани. Мы бзылъхугъэр сыт щыгъуи яхэтщ кърахьэлIа шхынхэр, хьэпшыпхэр зэхэдзыным, щхьэхуэ-щхьэхуэу пакетхэм игъэзэгъэным, зэтегъэпщIэным, нэгъуэщI къинэмыщI Iуэхугъуэхэми. Зэанэзэкъуэм я дэIэпыкъуэгъу мэхъу Индрис и къуэш нэхъыщIэ Мухьэмэди. — Мы Iуэхугъуэм дыкъыхэзышар, гупыр дызэрызыгъэпцIар Тамэ Сусанэщ. Абы ди щIалэхэм яхуиIэ гущIэгъумрэ гулъытэмрэ дэри дызэщIигъэIащ. Пэжщ, цIыху куэд мы Iуэхум хэтщ икIи ялъэкIымкIэ зауэм, щIыIэм, уаем, зыщыпIэ мэз пхыдзахэм щыIэ ди щIалэхэм ядэIэпыкъуну я гур хуоIэ. Ауэ дэ длэжь Iуэхури, ди зауэлIхэм къытхуащIэри къызыгурымыIуэхэри куэдщ, жагъуэ зэрыхъущи. Щхьэж къызэрилъытэу мэпсэу, — жеIэ Индрис. Мы щIалэм адрейхэм нэхърэ нэхъыбэ зэман иIэу аракъым. Ари жыджэру мэлажьэ, щхьэгъусэрэ быниплIрэ иIэщ ипIыну. Арами, нобэ ди гъунапкъэхэр зыхъумэ зауэлIхэм защIэгъэкъуэн Iуэхур зэбгъэтIылъэкI зэрымыхъур къыгуроIуэ.

Апхуэдэ гупсысэкIэм тету Индрис и сабийхэри егъасэ. Ахэр адэм, нанэм ящIыгъуу гуманитар хьэлъэр ди щIалэхэм хуаутIыпщыну щагъэхьэзыркIэ псэ емыблэжу, езыхэм я гукъэкIкIэ, дэIэпыкъуэгъу мэхъу. Мыбдеж къыхэгъэщыпхъэу къыдолъытэ Индрисрэ и унагъуэм щыщхэмрэ, гупым хэт нэгъуэщI волонтёр куэдым хуэдэу, зауэ операцэ хэхар здекIуэкI щIыпIэхэм я Iыхьлы щыIэу аракъым мы Iуэхугъуэм щIыпыщIахэр, щIыхэтыр. АтIэ, иджыри зэ жытIэнщи, я псэ къабзагъэращ, цIыхугъэ зэрахэлъращ. Езы Индрис дызэрыщигъэгъуэзащи, СВО-р зэрыщIидзэрэ дэIэпыкъуныгъэм зритащ, ауэ мобилизацэкIэ ди щIалэхэр щыдашым, ахэр къэпсалъэ щыхъум, зыхуэныкъуэхэр, Iуэхур зыIутыр къыщыжраIэм, абы триубыдащ лъэкIымкIэ сыт щыгъуи ядэIэпыкъуну.

— ИджыкIэ нэхъыщхьэр зауэм щыIэ щIалэхэм защIэдгъэкъуэнращ. НобэкIэ щIымахуэр къэсащи, ахэр куэдым хуэныкъуэнущ. Псалъэм папщIэ, ботэ хуабэхэм, цылъэпэдхэм, Iэлъэхэм, пыIэхэм, щIагъщIэлъ хуабэхэм. Техникэ и лъэныкъуэкIэ генераторхэм, электростанцхэм къыщIэлъэIунущ. Сыт щыгъуи зыхуэныкъуэщ щIытI уэздыгъэхэр. А псори цIыху щхьэхуэхэм кърахьэлIэ, е абыхэм зэхадазэ ахъшэмкIэ къыдощэхури, идогъэхь. Къыхэзгъэщыну сыхуейт зауэлIхэм папщIэ зи шхын Iыхьи сом тыкъыри къезыхьэлIэ цIыху къэс. Тхьэм псапэу къаритыж дэтхэнэми! — жеIэ Индрис.

Ди псэлъэгъум деупщIащ гуманитар хьэлъэр машинэм ирагъэзэгъа нэужь, ар адэкIэ хэт ишэми. Абы и жэуапри гъэщIэгъуэнщ

. — Куэдрэ къохъу доброволецу зыкъытпащIэу ди хэгъуэгум е Къэбэрдей-Балъкъэрым щыщ щIалэхэм хьэлъэр зэуапIэхэм нэс щашэ. Ауэ ахэри мэлажьэ, сыт щыгъуи хущIыхьэкъым. Апщыгъуэм уасэкIэ тхуэзышэн къыдолъыхъуэ. ИкIи уасэфI телъу яшэ. Абыхэми гукъанэ яхуэтщIкъым, сыту жыпIэмэ куэдыр а лъэныкъуэмкIэ кIуэн мэшынэри, пхуэкIуэххэкъым. Зэрыхъуу зыдогъэзахуэ, — къыддогуашэ гупым и лэжьэкIэмкIэ Индрис. Псэ хуабагъыр зи гъуазэу псэу мыпхуэдэ цIыхухэр дунейм тетыху, цIыхугъэр, Тхьэшхуэм худиIэ пыщIэныгъэр мыкIуэдыжыну гугъапIэ щыIэщ.

ГЪУКIЭКЪУЛ Иринэ