«Ди Валя цIыкIу, ди Валя дыщэ…» — гу хуабагъэ, гуапагъэ, фIылъагъуныгъэ ин къызыхэщ а псалъэхэмкIэ зызыхуагъазэ, зи цIэр ираIуэ дохутыр къызэрымыкIуэм, «Заслуженный врач Российской Федерации» фIэщыгъэцIэ лъагэр хуэфащэ дыдэу зезыхьэм, «За заслуги перед Карачаево-Черкесской Республикой» орденкIэ къыхагъэща, нэгъуэщI щIыхьыцIэ, IэщIагъэ нагъыщэ бжыгъэншэкIэ зи цIэр къраIуа, нобэ зи гугъу сщIыну дохутырым бгъэдэлъ IэпщIэлъапщIагъым и фIагъыр, хэлъ цIыхугъэр узыфIэмыкIыжынщ.
Шэчыншэу, цIыхубэ фIылъагъуныгъэр уасэншэщ. Ар къэплъэщынри зыхуэдэ щымыIэ щIыхь лъагэщ. ЩIышылэм (январым) и 30-м зи юбилей махуэщIри, цIыхубэм и узыншагъэр хъумэным и гуащIэр зэрытриухуэрэ мы гъэм илъэс щэныкъуэ зэрырикъури зыгъэлъэпIэну, пщIэ инрэ щIыхь лъагэрэ зыбгъэдэлъ IэщIагъэрылажьэ нэхъусаращ — Беслъэней щIыпIэ сымаджэщым и дохутыр нэхъыщхьэ КХЪУЭНЭ Валентинэ Зураб ипхъуращ мы тхыгъэр зытезухуэр.
Урыс тхакIуэшхуэ Чехов Антон мыпхуэдэу жиIащ: «Дохутыр IэщIагъэр — ар лIыхъужьыгъэщ, абы къыпхуегъэув псэемыблэжыныгъэ ин, псэ, гупсысэ къабзагъэ». Нобэрей ди тхыгъэмкIэ зи щIыхьыр тIэтыну дохутыр Iэзэм бгъэдэлъщ апхуэдэ хьэл-щэн къызэрымыкIуэхэр. Абы щыхьэт тохъуэ Валентинэ цIыхум фIыуэ зэралъагъумрэ зэралъытэмрэ. ГурыIуэгъуэщ мыхьэнэшхуэ зиIэ IэщIагъэ куэд дунейм зэрытетыр. Ауэ, цIыхум и гъащIэм къриубыдэу зэми зэ зрихьэлIэ дохутырхэр, абыхэм я IэщIагъэр, хьэкъыпIэкIэ, уасэншэщ. Ди узыншагъэкIэ гугъусыгъу гуэр къыдэуэлIа — дыздэжэр медицинэ щIэныгъэ зыбгъэдэлъ IэщIагъэрылажьэм дежщ. Апщыгъуэми, сыт хуэдиз фIыщIэ уи гум къыщыпхуэушрэ узрихьэлIа медицинэ лэжьакIуэр гуапэу, щабэу, и IэщIагъэм хицIыхукIыу къыщоIэзэкIэ…
Апхуэдэхэращ зыхужаIэр: «Гиппократ хуищIа тхьэлъанэм епцIыжкъым» жэуэ. Дохутыр Валя абыхэм ящыщщ — зи пщэ умыкIуэжын дохутыр Iэзэщ, цIыхугъэр къызэбэкI бзылъхугъэ гуапэщ. Зэкъым си щхьэкIэ а цIыху къызэрымыкIуэм, дохутыр нэхъусауэ зи цIэ Iуам хуэгъэза псалъэмакъ гуапэхэр, фIыщIэ псалъэхэр зэрызэхэсхар. ИкIи, сыт щыгъуи къыхагъэщыр Тхьэм къыхилъхьауэ дохутыр зэчий Кхъуэнэ Валентинэ зэрыхэлъращ. «Сыт хуэдэ IэщIагъэт зыхуеджэнур?..»
Ставрополь къэрал медицинэ институтыр 1975 гъэм къиухри, ординатурэр зы илъэскIэ Къэрэшей-Черкес область сымаджэщым щрихьэкIауэ щытащ, хэгъуэгум щыцIэрыIуэ, пщIэшхуэ зыхуащI, Iуэху зэхэщIыкI ин зыбгъэдэлъ дохутыр, терапевтическэ къудамэм и унафэщI Гриневэ Галинэ и нэIэм щIэту. Валентинэ игу къызэригъэкIыжымкIэ, апщыгъуэм медицинэ IэщIагъэм хуеджа IэщIагъэрылажьэ ныбжьыщIэхэр а дохутыр Iэзэм и нэIэм зэрыщIэувам и сэбэп куэд абыхэм къайкIащ, иужьми ди хэгъуэгум щыпсэухэм я узыншагъэр хъумэныр ирагъэфIакIуэу лэжьэжахэщ, ноби я IэнатIэхэм пэрытщ. – Галинэ Ильиничнэ Тхьэм зэчий ин къызыхилъхьа дохутырт, къудамэм и унафэщI щыпкъэт, узыдэплъеин хуей гъэсакIуэт.
Абы жиIэ псалъэ, илэжь Iуэху къэс ди акъылым куууэ идгъэтIысхьэт, дэтхэнэри узыфIэмыкIыжыну дерс щапхъэт. Си лэжьыгъэм деж зэкъым а унэтIакIуэм дызыхуигъэсахэр къызэрысщхьэпэжар, — игу къегъэкIыж Валентинэ. И еджэным кIэ игъуэта нэужь, Валентинэ и псэм хуихь и къуажэм ягъэкIуэжыну, абдеж и гуащIэдэкI лэжьыгъэм щригъэжьэну лъэIуащ. Апхуэдэуи, IэщIагъэрылажьэ ныбжьыщIэм Беслъэней къигъэзэжащ. Здэлэжьэну къыздэкIуэжар 1929 гъэм яухуа щIыпIэ сымаджэщт. Игу къызэригъэкIыжымкIэ, абдеж щылажьэхэм я медицинэ къалэнхэм къадэкIуэу, къахуихуэт завхоз, кочегар, IэщIагъэлI-ремонтник пщэрылъхэри зэдахьын.
Псалъэм и жыIэгъуэкIэ, щIымахуэм хьэкур ягъэплът, гъэмахуэ зэрыхъуу, блын зэгуэчахэр «ядыжт». Къапщтэмэ, зэщIэкъуэн-зэгъэзэхуэжыныр зэуэ зи пщэ дэлъыр медицинэ IуэхущIапIэм и лэжьакIуэхэрат. ИтIани, щхьэх ямыцIыхуу, зэгурыIуэу, зым Iэпыхур адрейм къищтэжу я лэжьыгъэр зэдагъэкIуатэт. Дохутыр Валентинэ и гуащIэдэкI лэжьыгъэр щригъэжьам и гугъу ищIкIэрэ, абы фIы дыдэу ецIыхуж япэ дыдэ къыхуэкIуа сымаджэм зэрыпыкъуэкIауэ щытар, апщыгъуэм игу щыхъа псори. КъыгурымыIуэ хъунт ихь жэуаплыгъэр, зи узыншагъэкIэ дагъуэ зиIэу къыхуэкIуам хуигъэувыну диагнозымкIэ… Нэхъ хьэлъэжыр — къыхуэкIуар езы Валя зи нэIэм щIэту къэтэджа и къуажэгъут. Арати, хуабжьу пIейтейт, и гур къилъэтт.
– Ауэ, си гур зэзгъэгъуэтыжщ, шынагъуэ, гусыс хуэдэхэр зыщхьэщызгъэкIри, пIейтеиныгъэ схэмылъ хуэдэу си япэ лэжьэгъуэ махуэр есхьэкIауэ щытащ, — игу къегъэкIыж а зэман жыжьэхэр. Дохутырым игу къигъэкIыжын и мащIэ? Ауэ, и гъащIэ псом гукъинэж щыхъуаи къыхуэнащ. – Жэщ пIалъэ сылажьэу, си пэшым «къыщIэлъэтащ» медсестрар, жьы хуэмышэж жыхуаIэм хуэдэу, хьэчэхьэпсэу, икIи жиIащ зи ныбжь хэкIуэта лIым, махуэ зыбжанэ хъуауэ стационарым щIэлъым, и жьыр зэфIэнэурэ, иужьым щэху зэрыхъуар. СыщIэпхъуащ а лIыр здыщIэлъ палатэм. КъызэрыщIэкIамкIэ, и гур къэувыIат. Ар си дохутыр практикэм япэ дыдэ къыщызэхъулIа Iуэху хьэлъэт. «Сыт сщIэнур?» – си щхьэм къилъэдащ гупсысэр напIэзыпIэм. Зэуи IэрыщIу жьы езгъэшэжынымкIэ Iэмалыр сщIын щIэздзащ. Шынагъуэр — зэманыр схуримыкъунрат, апщыгъуэми цIыхур сIэщIэкIынут…
Ауэ, псоми ди гуфIэгъуэшхуэм щIэту и гур езгъэжьэжри, лIым зыкъищIэжат, жьы ишэжат… Дохутырым дежкIэ апхуэдэ къэхъугъэхэр – махуэ къэс зыхэплъэнкIэ хъуну щытыкIэщ. Абы хуэхьэзырщ цIыхум и узыншагъэр зыхъумэну пщэрылъыр зыхуэзыщIыжа медицинэ IэщIагъэлIхэр… Кхъуэнэ Валентини зы гуауэкъым, зы хэщIыныгъэкъым и гъащIэм зыщрихьэлIар. ИкIи, а псоми дохутырым и хьэлщэныр япсыхьащ, Iуэху хьэлъэхэм пэлъэщыфу ягъэсащ.
— Дохутыр IэщIагъэр къыхэсхынымкIэ щапхъэфI схуэхъуащ цIыхухэм я узыншагъэр хъумэным, яIэзэным гуащIэ ин хуэзыгъэтIылъа си адэ шыпхъу Жэнымбей Ксение – дохутыр – гинекологыр. Абы япэжкIэ уIэбэжмэ, къыхэзмыгъэщ хъунукъым Беслъэней сымаджэщым и лъабжьэгъэтIылъ, ди лъэпкъым къыхэкIа цIыху цIэрыIуэ ГъукIэкъул Даут ипхъу Тамарэ – япэрей бгырыс дохутыр пщащэм и Iуэху зэхэщIыкI уасэншэр. Ари си щапхъэщ. КъинэмыщIауэ, си IэщIагъэр къыхэсхыныр си сабиигъуэм къыщежьауэ плъытэфынущ, ди къуажэ сымаджэщым и дохутыр Чырбыж Соня и фIыщIэкIэ. ЕджапIэм щыстха, «Сыт хуэдэ IэщIагъэ къыхэсхыну сызыхуейр» сочиненэр зытезухуар а дохутыррат: абы сабий къэс бгъэдыхьэкIэ къазэрыхуигъуэтымкIэ бгъэдэлъ зэчийм, мыузу мастэ зэрыхилъхьэфым сытетхыхьат, — жеIэ Валентинэ.
Дохутырым гу хуабагъэ ин хэлъу игу къегъэкIыж япэ дыдэ къызыхыхьауэ щыта медицинэ лэжьакIуэ гупыр. – Сымаджэщым сыщылэжьэну сыкъыщыкIуам, сыкъызыхыхьахэм саринэхъыщIэ дыдэти, псори зэуэ къыскъуэуващ. Сэри сыт хуэдэ чэнджэщри зэрызыщIэсшэным сыхущIэкъуащ. Дэтхэнэ медицинэ IэщIагъэрылажьэми и гулъытэ скIэрылъщ. Щапхъэ схуэмыхъуауэ зы яхэткъым. Мыхьэнэшхуэ иIэщ апхуэдэ цIыху гуащIафIэхэм уакъыхэхуэным. Си насып къихьащ. Щапхъэу къэсхьынщи, сыт хуэдэ бзылъхугъэ къызэрымыкIуэт фельдшер IэпщIэлъапщIэ Нэптыгъу Гуащэ! КъуажитIым щыпсэухэм сыт хуэдэу ар япылъа! Апхуэдэхэм хуэгъэзауэ жаIэ: «ХузэфIэмыкIын щыIэкъым!»
Гулъытэшхуэ зыхэлът, щIэныгъэ зыбгъэдэлъ медицинэ лэжьакIуэт, псом нэхъыщхьэжыр арати – зэуэ унафэ тэрэз къэзыхьт. Апхуэдэ хьэл-щэнхэм я фIыгъэкIэ, сыт хуэдиз цIыхум Гуащэ жэщ-махуэ имыIэу ядэIэпыкъуа, ажалым къригъэла?! Ахэр бжыгъэншэщ.., — къыпещэ дохутырым. Зыдэлэжьахэм, нобэ и гуащIэ зыдигъэтIылъхэм яхужиIэ псалъэ гуапэхэм поджэж Валентинэ езым къыхужаIэ фIыщIэ гъунэншэхэри: «Кхъуэнэ Валентинэ — Тхьэр дохутырыну къызыхуэупсащ, хэлъ цIыхугъэри уасэншэщ».
Абы хуэдэ дохутырхэр зырызыххэщ Илъэс 40-м къриубыдэу а дохутыр Iэзэм гуащIафIэу дэлэжьащ медсестра пщэрылъхэр зыгъэзащIэу сымаджэщым Iута Къардэн Симэ (и цIэ дыдэр Фаризэтщ). АдэкIэ дыщIодэIу Симэ и гукъэкIыжхэм. «Ищхьэ медицинэ щIэныгъэ зригъэгъуэтауэ, и ныбжьыр илъэс 25-м иту Кхъуэнэ Валентинэ Зураб и пхъум 1976 гъэм лэжьэн щыщIидзауэ щытащ Беслъэней къуажэ сымаджэщым. Узримыгъэплъу пщащэ дахащэт, ныбжь зиIэри щIалэгъуалэри дихьэхауэ. Нобэр къыздэсми апхуэдэщ. Мы гъэм илъэс 50 ирокъу Валентинэ терапевт, дохутыр нэхъыщхьэ IэнатIэхэм зэрыбгъэдэувэрэ, жэуаплыгъэ ин, фIагъ лъагэ хэлъу ноби а пщэрылъхэр, нэгъуэщI унафэщI лэжьыгъэхэри зэдехь. ЖыпIэнурамэ, Валентинэ къызыхыхьар езым нэхърэ илъэси 10-20- кIэ нэхъыжь IэщIагъэрылажьэхэт: фельдшер, акушеркэ, медсестра хуэдэхэт.
Арами, дохутыру къагъэкIуа IэщIагъэрылажьэ ныбжьыщIэм япэ махуэм щегъэжьауэ хузэфIэкIащ и псалъэм пщIэ иIэу игъэувын, ныбжь псоми задригъэкIун, нэхъыщхьэжыр арати, цIыхубэм я псэм хуахь дохутыр хъун. Сымаджэщым къакIуэри пIалъэ кIэщI нэхъ темыкIыу, и щхьэгъусэ Руслан (здэкIуам Тхьэм и псэр щигъэтынш) и дэIэпыкъуныгъэшхуэ хэлъу Валентинэ сымаджэщым къыпригъэщIыхьауэ щытащ IуэхущIапIэ: дохутыр нэхъыщхьэм, педиатрым, дзэм елэжь медицинэм и лэжьакIуэм я пэшхэр хэту. ФIы дыдэу сощIэж нэгъуэщI зы Iуэхугъуи. 1994 гъэм и мазае (февраль) мазэу «ДэIэпыкъуэгъу псынщIэ» — станцыр къызэригъэпэщри, Беслъэней, Инжыджышхуэ къуажэхэр я нэIэм щIэту зэтригъэпсыхьауэ щытащ.
Абы ипэкIэ апхуэдэ лъэкIыныгъэ щыIатэкъым. АтIэ, зыгуэр и узыншагъэкIэ гузэвэгъуэ хэхуамэ, жэщмахуэ имыIэу езым, и фельдшерым къызэхакIухьт. Къэхъут куэдрэ жэщыкум щраджэ. Апщыгъуэм дежи машинэ лъыхъуэным емыжьэу, лъэсу кIуэт, е мотоциклкIэ, е гум ису, е хьэлъэзешэ транспорткIэ нэст. Дохутырым дежкIэ нэхъыщхьэр цIыху сымаджэм деж щIэх-щIэхыу нэсу дэIэпыкъуныгъэ иригъэгъуэтынрат. Абы къыхэкIыу, «ДэIэпыкъуэгъу псынщIэ»-м ди лэжьыгъэр хуабжьу игъэпсынщIат. КъэралымкIэ хьэлъэ дыдэу щыта 1990 гъэхэм сымаджэщыр зэрызэхуамыщIыжар зи фIыщIэри Валентинэ щIэгъэкъуэн нэхъыщхьэу иIа и щхьэгъусэ Русланщ. ЗыфI ахърэтым щыIэмэ, Тхьэм къылъигъэс. АтIэ, ерыскъыкIэ, сыт и лъэныкъуэкIи зыкъыщIигъакъуэурэ, сымаджэщыр зэхуамыщIыжу къызэтригъэнат. Иужьым, пIалъэ кIэщIым къриубыдэу сымаджэщым и унафэщIым хузэфIэкIащ махуэм лажьэ стационар иригъэщIын. Абы къыкIэлъыкIуащ жэщ-махуэм лажьэу игъэпсынри.
Лэжьэн щыщIидзагъащIэм, совхозхэм, заводым щылажьэхэм плановэ диспансеризацэр, медицинэ щIэплъыкIыныгъэхэр ядегъэкIуэкIыпхъэу къагъэувти, дохутырым дызыщIигъути, лэжьакIуэхэм: жэмышхэм, Iэщыхъуэхэм, къущхьэхъу дэкIынухэм я узыншагъэр зытетыр зэхэдгъэкIт. Iэзэгъуэ зыхуэныкъуэм яригъэгъуэтт. Гуэдз Iуахыжмэ, езы дыдэр губгъуэм дэкIти, яхэтт, якIэлъыплът. КъуажитIри къызэкIэригъэхутэкъым. Езыри етIысэхтэкъым, дэри дригъэтIысэхтэкъым. ЛэжьакIуэхэр щIэтплъыкIа нэужь, хэт дэнэкIэ иунэтIынуми, хэт адэкIэ еIэзэнуми къагуригъэIуэнут. Я узыншагъэр зэтригъэпсыхьэжыху и нэIэм щIигъэтынухэт. КъыхуэкIуа, зэIэза цIыхур щIигъэкIуэтыкIыжынущ езым къыдалъхуа, и Iыхьлы дыдэм хуэдэу, апхуэдизымкIэ цIыхугъэшхуэ хэлъщи. Си псалъэхэм зы егъэлеиныгъэ хэслъхьэкъым. Ардыдэщ зэрыщытыр дохутыр Валентинэ.
Абы зэ жиIар етIуанэ зэи къытригъэзэжакъым. Дызэдэлажьэхэр дызэгурыIуэу, зэхэтыкIэ дахэ дяку дэлъу дызэхэтащ, ноби а щапхъэм текIхэкъым. УнафэщIым къыдэлажьэ цIыху къэскIэ хуэгъэзауэ зыуигъэукIынущ, апхуэдизымкIэ пщIэшхуэ яку дэлъщи. Гъэсэныгъэм гулъытэ ин хуэзыщIщ. Валентинэ хэлъ гущIэгъум зэкъым сызэрырихьэлIар. ДэIэпыкъуэгъу хуэныкъуэм зыщIигъэкъуэныр зи пщалъэу зылъытэщ. ЦIыхум Iэмал имыIэу медицинэ щIэплъыкIыныгъэ ищIын хуейми, ахъшэ зэримыIэм къыхэкIыу, зэрыхузэфIэмыкIынур къыгурыIуамэ, зэрыхуищIэм гу лъримыгъатэу, а цIыхум зэрыкIэлъыплъыну ахъшэр езым хуритт.
Ар зэрищIар зыхуищIам иригъэцIыхунутэкъым. Абы хэлъ гумызагъагъым и зы щапхъэ къэсхьынщ: сымаджэ хьэлъэр нэгъуэщI сымаджэщым иригъэшэн хуеймэ, абы иужь имыкIыу, псори икIэм нигъэсынут, сымаджэщым щIигъэгъуалъхьэу, зыIэрыхьар зригъэлъагъухукIэ и гъусэнут. Си нэгу щIэкIыжкъым машинэ зэжьэхэуэныгъэ хьэлъэ дыдэ къэхъуауэ, абы хэхуахэр ди сымаджэщым къытхурашэлIат, нэхъ дыгъунэгъути. Валентинэ лъэгуажьэмыщхьэкIэ лъэгум щысу зэ зым, зэ адрейм ябгъэдыхьэурэ зыхуей хуигъазэу зэращхьэщытар… Апхуэдэ къэхъугъэ дапщэ и нэгу щIэкIар?! Сыт щыгъуи щыпкъагъэ ин къэзыгъэлъагъуэ дохутырщ. Беслъэней и гъунэгъу урыс къутыр, къуажэ цIыкIухэми къикIыурэ «дохутыр Валентинэ зэдгъэплъыну дыхуейщ» жаIэурэ дапщэ къыхуэкIуэрэт. Ноби ахэр зэпыукъым. Псоми фIы дыдэу ялъагъу унагъуэ, цIыхубэ дохутырщ ди Валя. Ар зи унагъуэ имыхьа, ди къуажэ закъуэр къэсщтэнщи, щыбгъуэтынукъым. Хэти ди нэщ, ди псэщ. НэгъуэщI зы телъыджэ жысIэнщи, Валентинэ сымаджэм хуигъэува диагнозымкIэ зэи гъуащэкъым, уеблэмэ абы игъэува диагнозым Москва къалэм щыхьэт щытехъуащ.
Мис апхуэдэ дохутыр IэкIуэлъакIуэщ Кхъуэнэ Валентинэ. Зэдэлажьэ гупым и гугъу пщIымэ, ахэр гъэсэныгъэ нэс зыхэлъ защIэщ, хуабжьу зэщIэкъуахэщ, «мыр сэ си пщэрылъкъым, си къалэнкъым е си Iуэхукъым» жэуэ зыми жиIэнукъым. ЗэдэIэпыкъурэ зызэщIагъакъуэу зэдолажьэхэ. Я къалэн нэхъыщхьэр – къуажэдэсхэм я узыншагъэр я нэIэм щIагъэтынращ. Апщыгъуэми, щытхъурэ фIыщIэрэ хуагъэфащэу ягъэзащIэ. Нобэ махуэм и гугъу пщIымэ, сымаджэщым терапевтищ, зы педиатр щолажьэ, езы Валентинэ зэрыдохутыр нэхъыщхьэм къыдэкIуэуи, икIи участковэ терапевтщ. Сымаджэщым и сыт хуэдэ лъэкIыныгъэхэри, ехъулIэныгъэхэри зэуэ зи фIыщIэр дохутыр нэхъыщхьэ гумызагъэращ. Дзэм здыщыкIэлъыплъ пэшри, лабораторэри, физпэшри фIагъ лъагэ зиIэ медицинэ оборудованэкIэ къызэгъэпэщащ, яIэщ электрофорез здащI, шытIапIэ, УВЧ пэшхэр.
Сымаджэщым и шхапIэр — ар псалъэмакъ щхьэхуэщ. «Ди унагъуэхэм мыпхуэдэу дыщыпщафIэкъым, мыбдеж ерыскъыкIэ къызэрытпылъым хуэдэу», — къыхужаIэ сымаджэщым щIэлъхэм, апхуэдизымкIэ пщафIэхэм псэемыблэжу я лэжьыгъэр ягъэзащIэри. Зэкъым Валентинэ медицинэ IуэхущIапIэ нэхъ лъэрыхьхэм щылэжьэну яшэжыну къызэрелъэIуар. Ауэ зыми хузэфIэкIакъым и гуащIэдэкI лэжьыгъэм къыздыщIидза сымаджэщыр нэгъуэщIкIэ ирагъэхъуэжын. ПщIэшхуэ къыхуащIу ядэлэжьащ Хьэбэз район сымаджэщым и дохутыр нэхъыщхьэхэу Даур Борис, Кхъуэхъу Долэт, Жантемыр Борис, нобэкIэ — Мэкъуауэ Iэмин… ИкIи, и гуащIэдэкI лэжьыгъэм щIыхь нагъыщэу къыпэкIуар къыпхуэбжынкъым. Хуэфащэ дыдэу сыт щыгъуи ягъэлъапIэ, ялъытэ, яIэт. А псори Валентинэ къилъэщащ бгъэдэлъ щIэныгъэ куум, и IэщIагъэм хуиIэ IэпщIэлъапщIагъым, хэлъ цIыхугъэ иным я фIыгъэкIэ. А нагъыщэ псоми я щхьэжу Валентинэ илъытэр зи узыншагъэкIэ гусыс хэхуа цIыхур игъэхъужыныр, игу жьы дигъэкIыныр, нэгъэсауэ сэбэп хуэхъунращ. АбыкIи дохутырыфIым хузэфIэкI къигъанэкъым. Тхьэр гъащIэ кIыхькIэ къыхуэупсэну сыхуохъуахъуэ!» — жиIащ Къардэн Симэ.
* * * ПщIэ зыхуэтщI Кхъуэнэ Валентинэ! Дыхуейщ дэри дынохъуэхъуну укъыщалъхуа МахуэмкIи, гуащIэдэкI лэжьыгъэм узэрыпэрытрэ илъэс 50 зэрырикъумкIи!
Уи унагъуэ жьэгум мафIэр зэпымычу щыблэу, быным я ехъулIэныгъэм уи гур хигъахъуэу, уи лэжьыгъэм дэрэжэгъуэ къыуиту, цIыхубэм и пащхьэ къыщыплъэща фIыщIэм уи щIыхьымрэ уи пщIэмрэ иIэту, псапэу пщIэм насыпыр уэру къыпхудэкIуэу, уузыншэу Тхьэм куэдрэ дунейм утригъэт!
АБИДОКЪУЭ Люсанэ
Больше на Черкес хэку
Подпишитесь, чтобы получать последние записи по электронной почте.
