2025 гъэм жэпуэгъуэм и 31-м щегъэжьауэ щэкӀуэгъуэм и 5-м нэс Москва щекӀуэкӀынущ лъэпкъ зэкъуэтыныгъэм и Махуэм теухуауэ къызэрагъэпэща «Урысеймрэ СНГ-мрэ я лъэпкъхэр» Лъэпкъыбэ фестивалыр. Абы къызэхуишэсащ властым, щӀэныгъэм, эксперт зэгухьэныгъэм я лӀыкӀуэхэр. КъЧР-м и лӀыкӀуэхэм яхэтщ республикэм лъэпкъ ӀуэхухэмкӀэ, цӀыхубэ зэпыщӀэныгъэхэмрэ печатымрэкӀэ и министр Есенеев Мурат, жылагъуэ, дин зэгухьэныгъэхэм ядэлэжьэнымкӀэ къудамэм и унафэщӀ Къуршэ Фаинэ, жылагъуэ-политикэ Ӏэмалхэм якӀэлъыплъынымрэ ахэр зэфӀэхынымрэкӀэ къудамэм и унафэщӀ Карасов Асхьэд, хамэ къэрал цӀыхухэр социальнэ, щэнхабзэ и лъэныкъуэкӀэ яхэгъэзэгъэнымкӀэ къэрал политикэр гъэзэщӀэнымкӀэ къудамэм и унафэщӀ Эдиев Таулан сымэ.
Урысейм лъэпкъ ӀуэхухэмкӀэ и федеральнэ агентствэм и унафэщӀ Баринов Игорь фестивалыр къыщызэӀуахым къыхигъэщащ къэрал лъэпкъ политикэм и мыхьэнэр — и зэкъуэтыныгъэр зэмылӀэужьыгъуагъращ. «Урысыбзэр лъэпкъзэпх, уеблэмэ лъэпкъыщхьэ мыхьэнэм иту зэрызэпсалъэ Ӏэмал хъуащ, СНГ-м и цӀыхухэр зэкъуэзыгъэувэ бзэщ. Бзэр — къаруушхуэщ!», — жиӀащ Баринов Игорь. Фестивалым и программэм хэтщ пленар зэӀущӀэхэр, стратегическэ сессиехэр, егъэджэныгъэ семинархэр, творческэ зэӀущӀэхэр, кино, сурэт гъэлъэгъуэныгъэхэр, мастер-классхэр, нэгъуэщӀхэри.
УЭЗАЕ Маринэ
Больше на Черкес хэку
Подпишитесь, чтобы получать последние записи по электронной почте.
