Бригадир ныбжьыщIэ — Амирокъуэ Ибрэхьим

Повестым хэзыгъэгъуазэ

Хьэбэз районым ит адыгэ къуажэ нэхъ щIалэхэм ящыщ Куэш-Хьэблэ къыдэкIа тхакIуэ Амирокъуэ Ибрэхьим Iэсхьэд и къуэм «Бригадир ныбжьыщIэ» повестыр зытриухуар комсомольц Къантемыр Хьисэщ.

Ар къуажэ Советым и тхьэмадэу щытащ, иужькIэ Хэку зауэшхуэм ипэ куэдрэ бригадир цIэрыIуэу щытащ. 1936 гъэм февралым и 13-м урысыбзэкIэ къыдэкIауэ щыта «Красная Черкесия» газетым щатхыгъащ: «Ставрополь крайм и шы – спорт клуб нэхъыфI дыдэхэм ящыщщ» «Черкес плъыжькIэ» зэджэ колхозым ейр. Ар къызэригъэпэщащ бригадир Къантемыр Хьисэ.

Шууей бэлыхьщ Мусэхэ Мыхьэмэт, ПщыхьэщIэ Сэхьид, ПIапIшу Хьэмид сымэ. Абыхэм ямыфIэкIхэмэ зыкIи зыкъыкIэрагъэхукъым бзылъхугъэхэу Борэныкъуэ Ботэщ, Мусэхэ Шокуэ, Борэныкъуэ Зэхьирэт, Амирокъуэ Мин, Багъ Бат сымэ. Илъэс 27-кIэ жэм къишащ Борэ ныкъуэ Зэхьирэт. Колхозым и шыспорт клубым зэрыхэтам теухуауэ абы жиIэжащ: «Гъэмахуэт, губгъуэм дыкърашэхыжри комсомол зэIущIэ ящIащ.

Абдеж къытхуагъэуващ шыхэм дышэсын хуейуэ. Зэ папщIэ, дыIэнкуну, ар ддакъым. ИужькIэ «дыкъытрагъэнащ». ФIы дыдэу сощIэж шыгъажэм дыхэтыну Черкесск дызэрыкIуауэ щытар. А зэхьэзэхуэм бзылъхугъэхэм ятекIуэгъащ Ботэщ, адэкIи апхуэдэ зэхьэзэхуэм хэтыну Пятигорск ягъэкIуэгъащ». Зи ныбжькIэ мыщIалэж Мини пенсэм кIуэхукIэ жэмышащ. И щIалэгъуэм епха блэкIа илъэсхэр игу къигъэкIыжкIэрэ, абыи Зэхьирэт и псалъэхэм пищащ: «Черкесск дашэн ипэкIэ тхьэмахуэкIэ лIыхэм дагъэсауэ сощIэж. Ботэщ нэхъыжьыIуэу къытхэтт, нэхъ шууейуи щытти, къэлъэну хуагъэфэщэгъащ. ИкIи, къыхуащIа дзыхьыр игъэпэжащ, псоми ятекIуэри.

Иджыпсту хуэдэу си нэгу щIэтщ цейхэмрэ пыIэхэмрэ тщыгъыу Черкесск КъуэдымэзкIэ шууэ дызэрыкIуар…» Апщыгъуэм Iэджэми Iэджи жаIащ бзылъхугъэхэр шым зэрышэсам папщIэ. Ауэ Ботэщ хуэдэхэм япэ ирагъэщар я щхьэ Iуэхуракъым. Езыхэр мышэсамэ, нэгъуэщI шэсынути, зыми жиIи едэIуакъым. — Сэ сымышэсу шэсакъым зыри.

ИтIанэ ди бзылъхугъэ шууейхэм я бжыгъэр нэрыбгэ тIощIым нэсащ. КъуажэкIэм щыщу дэ ди гъусащ Къардэн Цуцэ, Барэ Люцэ сымэ, нэгъуэщIхэри.

Зызумысыжынщи, шы тесыкIэм хэсщIыкI щыIэтэкъым, сытрагъэтIысхьэти шы IумпIэр яIыгъыу сыкърашэкIыурэ сагъэсащ япэхункIэ. ИужькIэ мащIэ-мащIэурэ сытегушхуащ Iуэхум. Пятигорск деж шыгъажэм дыщыхэтам, си пыIэр сщхьэрыздзыхукIэ ящIакъым сыбзылъхугъэу, — и гукъэкIыжхэмкIи къыддэгуэшагъащ Ботэщ.

Бзылъхугъэ шууейхэр зыгъэса Жантемыр МэтIасэ, шууей бэлыхьу щыта нэгъуэщI нэхъыжьыфIхэр апхуэдизкIэ гуфIащэри, Ботэщ къащытежам Iэтауэ шым кърахьэхыжащ, къыщигъэзэжми колхозым гуапэ дыдэу къыщрагъэблэгъэжауэ щытащ.