БлэкIа гъейхэм я лIыхъужьхэр

Черкесск къалэм дэт, цIыхухэм социальнэ хуэIухуэщIэхэр ягъэгъуэтынымкIэ Купсэм кърагъэблэгъащ СВО-м къикIыжа ди лъахэгъухэр, абыхэм я унагъуэхэр. ЗэIущIэр теухуауэ щытащ Хэку зауэшхуэм, тхыдэм, иджы екIуэкI операцэ хэхам, щIэблэм и гъэсэныгъэм, къэралым и къарум, и щIыхьым. — 2025 гъэр УФ-м и Президент Путин Владимир Хэкум и хъумакIуэм и Илъэсу игъэуващ. Ар ауэ сытми махуэбжым щыгъэнэIуа къэхъукъащIэкъым.

Ар — лъэпкъ зэкъуэтыныгъэмрэ хэкупсагъэмрэ я нагъыщэщ. Илъэсыр догъэнщI хэкупсагъэм, Хэкум теухуа IуэхухэмкIэ. Ди Хэкур къэрал ЛIыхъужьщ, — апхуэдэ псалъэхэмкIэ ирагъэжьа зэIущIэр хэIэтыкIауэ, гуапэу екIуэкIащ. Ар нэхъри ягъэбжьыфIащ зауэ уэрэдхэр, усэхэр зыгъэIуа уэрэджыIэхэм, усэеджэхэм. Къэралым и цIыхухэм, балигъхэми сабийхэми азбару яцIыху зауэ уэрэдхэм хэт псалъэ, сатыр къэс. Абыхэм демыжьукIи, нэпсхэр кърамыгъакIуэкIи къэнакъым а махуэм. ЩIалэ цIыкIум жиIэ уэрэдым хэт «… ДызэщIэвгъэтаджэ! Дабгъэдэвгъэувэ гъунэгъуу абыхэм. ДызэщIэвгъэтаджэ! Урысейм и ЛIыхъужьхэр ену дигухэм илъынущ…» сатырхэм псори зы къарууэ къызэщIиIэтэ

ри, щыту едэIуащ. Апхуэдэ къабзэуи, зауэ зэхуэмыдэхэм, зэхэуэхэм хэкIуэдахэм я фэеплъ яIэтащ зы дакъикъэкIэ щыму щыту. Къызэхуэсахэм захуигъэзащ кърагъэблэгъа хьэщIэхэм ящыщ, СВО-м хэта, «Защитники Отечества» фондым и унэтIакIуэхэм ящыщ, Гусхэ Замир — ЛIыгъэм и орденыр, е 4-нэ нагъыщэм Джаурджий и цIэкIэ жорыр, «За верность долгу» медалыр къызыхуагъэфэщар. ЗауэлIым къыхигъэщащ щIэблэм хэкупсагъэ, лъэпкъыпсагъэ лэжьыгъэр ену зэрыдегъэкIуэкIыпхъэр, абы къихь сэбэпыр. Псалъэмакъ щхьэхуэ траухуащ республикэм, властым, хэгъуэгум  щыпсэу цIыхухэми, балигъхэми, ныбжьыщIэхэми СВО-м хэтхэм зэрыдащтэм, гуманитар дэIэпыкъуныгъэм дэтхэнэми и гъерэт, и гуащIэ хилъхьэным зэрыхуэпабгъэм, а пабгъэныгъэр Iуэху наIуэхэмкIэ зэрыщIагъэбыдэм. Iэнэ берычэтхэм пэрысу, унагъуэкIэ, я сабийхэри ящIыгъуу ягъэкIуа зэманыр а махуэм зыгъэпсэхугъуэ яхуэхъуащ хьэщIэхэм. СВО-м хэтахэм я нэгум щIэкIар зэ щхьэкIэ ящызыгъэгъупщэфын, тезыгъэун Iуэхугъуэ хьэлэмэт хъуащ Купсэм и лэжьакIуэхэм я жэрдэмкIэ къызэрагъэпэща пшыхьыр.

«…Хэку зауэшхуэм щыгъуэ ди дадэжьхэм Донецк, Харьков, Одессэ, Киев, дэнэкIи фашистым къызэрыIэщIахыжам хуэдэу, абыхэм я зауэлI щIыхь гъуэгум ирокIуэ ди цIыхухъухэр.  Аращи, сыт щыгъуи хуэдэу, ТекIуэныгъэр дыдеинущ!» — пшыхьым и кIэух псалъэу щытащ ахэр.

КъинэмыщIауэ, кърагъэблэгъа хьэщIэ къэс тыгъэхэр хуагъэфэщащ, зэхэту гукъинэж сурэтхэр зытрагъэхащ, иджыри куэдрэ зэдэуэршэращ. ХьэщIэхэм жаIащ къыхуащIа гулъытэр икъукIэ я гуапэ зэрыхъуар.Пшыхьым къекIуэлIахэм я гукъыдэжыр къаIэтащ республикэ филармонием и уэрэджыIэхэм: Думэныщ Ланэ, Акбаевэ Лаурэ, Мыкъуэ Анжелэ, Ощепковэ Любовь, къалэм дэт, макъамэхэмкIэ е 1-нэ сабий еджапIэм и артист ныбжьыщIэхэм.

ТУАРШЫ Ирэ