АвтобусыщIэхэр

Черкесск къалэмрэ Къэрэшей — Черкес Республикэмрэ я Махуэм ехъулӀэу, ди хэгъуэгум ит егъэджэныгъэ ӀуэхущӀапӀэхэм щӀэуэ еджапӀэ автобус 19 иратащ.

Абыхэм я фӀыгъэкӀэ жьы хъуа транспортхэр яхъуэжынущ икӀи еджакӀуэхэр, псом хуэмыдэу, жылагъуэ пхыдзахэм щыщхэр, шынагъуэншэу кърашэкӀынущ. Сабийхэр еджапӀэхэм къэшэн — шэжыным теухуа лэжьыгъэхэр егъэджэныгъэ ӀэнатӀэм пэрытхэм ягъэкIуатэ къалэн нэхъыщхьэхэм ящыщщ. Автопаркыр къагъэщӀэрэщӀащ «Зыуэ щыт Урысей» партым и жэрдэмкӀэ, УФ-м и Президент Путин ВладимирядищтэкӀэрэ.

Апхуэдэ еджапӀэ автобусыщӀэ зыӀэрыхьахэм ящыщщ Къэрэшей районым хыхьэ Хъумэрэ курыт еджапӀэри. КъЧР-м и Правительствэм и тхьэмадэм и къуэдзэ Поляков Евгенийрэ республикэм егъэджэныгъэмрэ щӀэныгъэмрэкӀэ и министр Кравченко Иннэрэ еджапӀэм и унафэщӀ Дыгъужь Хьэжы-Мурат автобусым и ӀункӀыбзэр щыӀэщӀалъхьэм, министрым Хъумэрэ еджапӀэм и унафэщӀым фӀыщӀэ хуищӀащ икӀи жиӀащ сыт хуэдэ ӀуэхукӀи, лэжьыгъэкӀи ар зэрыжыджэрыр, и ӀэнатӀэм гурэ псэрэкӀэ зэрыбгъэдэтыр. — Мы махуэм ягуэша автобусхэр тыншщ, ныбжьыщӀэхэр шынагъуэншэу къызэретшэкӀыным и мызакъуэу, ӀэмалыщӀэхэри къыдет. АтӀэ, дэ къуажэ пхыдзам — Хъумэрэ — дыщопсэу.

Ди гъуэгухэр зэрыбгъузэм къыхэкӀыу, сабийхэр зэрызекӀуэну лъэс зекӀуапӀэ диӀэкъыми, автобускӀэ къатшэурэ зэрытшэжым я шынагъуэншагъэмкӀэ мыхьэнэшхуэ иӀэщ. Дэри сабийр тыншу я унагъуэ зэрихьэжар дощӀэри, ди псэр мэтынш. А лъэныкъуэмкӀэ хуабжьу сэбэпщ. КъинэмыщӀауэ, зыплъыхьакӀуэ, зэпеуэ, олимпиадэ зэхуэмыдэхэм цӀыкӀухэр иридошэ, — къыддэгуэшащ Дыгъужь Хьэжы-Мурат икӀи КъЧР-м и Ӏэтащхьэ Темрзов Рэшидрэ министр Кравченко Иннэрэ фӀыщӀэ яхуищӀащ апхуэдэ гулъытэкӀэ еджапӀэр къызэрыхагъэщам папщӀэ.

ДЗЭМЫХЬ Маринэ