«ЦIыхум и пщIэмрэ и щIыхьымрэ зыгъэлъагъуэр зэхуихьэса мылъкуракъым, атIэ и Iэужьращ. Ди гуащIэр къыхэнэнущ жылагъуэм, къахуэнэнущ цIыхубэм. Апщыгъуэми, дунейм къытенэнущ ди цIэр. Мылъкур — уэсэпсщ. Дыгъэр къызэрыщIэкIыу — уэсэпсыр мэткIуж… Сэ сызыхуэлажьэр — цIыхуращ, абыхэм я щыIэкIэ-псэукIэр нэхъыфI сщIынращ» — апхуэдэщ и гъащIэ джэлэсыр мэкъуауэгъуэм (июным) и 23-м илъэс 75-рэ зэрырикъуар зыгъэлъэпIа, адыгэ лъэпкъым и нэхъыжьыфI, «Хьэбэз жыпс» завод лъэрыхьым и къэгъэщIакIуэ, «Къэрэшей-Черкес Республикэм и пащхьэ щиIэ фIыщIэхэм папщIэ» къэрал нагъыщэ лъапIэр зезыхьэ АРГУН Олег Iэбубэчыр и къуэм. «ЖиIа псалъэм тет, щыпкъагъэ, цIыхугъэ, гущIэгъулы ин зыхэлъ, къызэгъэпэщакIуэ зэчиишхуэ зыбгъэдэлъ, цIыхум и хьэлэмэтыр япэ изыгъэщ…» — пыпщэфынущ Аргун Олег цIыхубэм фIыуэ къыхужаIэм.
Ауэ, а псори къызэщIэпкъуэжмэ, и мыхьэнэр зыщ — жылагъуэм и пащхьэ Олег и пщIэр щыинщ, щылъагэщ, СССР къэралышхуэм хыхьэ щIыналъэхэм зи цIэр щызыгъэIуа и адэфIым — Аргун Iэбубэчыр (ПIатIэ) и гуащIэдэкI лъэужьыфIэр Олег егъэщыпкъэж и лэжьыгъэ нэскIэ, хэлъ цIыхугъэ инымкIэ, псэ хьэлэлагъымкIэ. Елъытэ абы псэ хуитыныгъэм нэхъ лъапIэ щымыIэу. Тетыжщ ар и гъащIэр зэриухуэ, зэрыпсэу, зэрылажьэ, езым къигъэщIа и хабзэфIхэм. Мэпсэу ар и напэм емыпцIыжу, къарууэ иIэр гуащIэдэкI лэжьыгъэм, хэгъуэгум, къэралым я ефIэкIуэныгъэм хуигъэтIылъу, сэбэп къихьу, цIыхум ящхьэпэу. А псор и насып зыхилъагъуэ щытыкIэхэм ящыщуи къелъытэ. «СынасыпыфIэщ: цIыху хъарзынэхэм сыкъаухъуреихь. Ныбжь зиIэхэр — си къуэшым хуэдэщ, ныбжьыщIэхэр — си быным хузогъадэ. Лэжьыгъэм деж зы унагъуэу дызэхэтщ, ди гуфIэгъуэри гуауэри зэдыдолъагъу, зэдыдогуэш. Ар сэркIэ уасэншэщ», — жеIэ Аргуным.
Аргун Олег хуэгъэза хъуэхъухэр
ПщIэшхуэ зыхуэтщIу, АРГУН Олег Iэбубэчыр и къуэ! «Черкес хэку» газетым щылажьэхэм ди гум къикIыу дыпхуохъуахъуэ уи махуэщI лъапIэмкIэ — илъэс 75-рэ узэрырикъуамкIэ! Лъэпкъым и тхыдэр зыухуэр абы къыхэкIа и къуэфI – пхъуфIхэращ, ахэращ абы и фIыр зыIэтыр, зыгъэлъапIэр, жыжьэ зыгъэIур. УкъызыхэкIа унагъуэ берычэтыр, узыщIапIыкIа гуащIэдэкI лэжьыгъэр бгъэщыпкъэу, къыпхалъхьа хьэл-щэн екIухэмкIэ адыгэр бгъэлъапIэу нобэ дунейм утетщи, адыгэ лъэпкъымкIэ ар щIыхь инщ, фащэ къызэрымыкIуэщ. Нобэ лъэпкъыр нэхъыщхьэу зытегузэвыхь Iуэхум — лъэпкъыбзэр хъумэным псэемыблэжу уи къаруи мылъкуи хубогъэтIылъ. АбыкIи щапхъэ нэс къыбогъэлъагъуэ цIыхум къызыхэкIа лъэпкъыр фIыуэ илъагъун зэрыхуеймкIэ, бзэр, щэнхабзэр, хабзэхэр хъумэным хэти хузэфIэкI гуащIэ зэрыхуигъэтIылъыпхъэмкIэ. Тхьэм нэхъыбэжи пхузэфIигъэкI! Адыгэ газетым и дыгъуасэми, и нобэми, и пщэдейми утогузэвыхь, сыткIи удищIэгъэкъуэнщ! Ар дэркIэ уасэншэщ! Дыхуейщ ноби, дяпэкIи хъуэхъуу къыпхужаIэр къыбдэхъуну, уи гур зыщIэхъуэпсыр къохъулIэну, уи узыншагъэмрэ гукъыдэжымрэ хэмыщIу, хэхъуэр къобэкIыу, уи насыпыр зыхэплъагъуэ Iуэхухэм ущефIэкIуэну, къыбдалъхуахэмрэ уи щIэблэмрэ я фIылъагъуныгъэ ущымыщIэу упсэуну, гъащIэ кIыхькIэ Тхьэр къыпхуэупсэну!
АБИДОКЪУЭ Люсанэ, «Черкес хэку» газетым и редактор нэхъыщхьэ
ПщIэ зыхуэтщI Олег Iэбубэчыр и къуэ!
Адыгэ лъэпкъыр цIэрыIуэ зыщIа цIыхушхуэщ къэрал, хъызмэт IуэхущIакIуэ лъэрыхь, УФ-м, КъЧР-м ухуэныгъэхэмкIэ щIыхь зиIэ я лэжьакIуэ Аргун Олег Iэбубэчыр и къуэр.
Производствэм и къызэгъэпэщакIуэ зэчиифIэщ, зи гъащIэм щыщу илъэс 50-р бэдаущ, къэрал, хъызмэт лэжьыгъэм тезыухуащ. Экономикэ лэжьэкIэщIэм тегъэпсыхьауэ лажьэкIэрэ, Олег нобэрей гъащIэ гугъум лэжьапIэ IэнатIэхэр имыгъэкIуэду, нэхъри нэхъыбэжу къызэригъэпэщащ, асфальт, гъущIхэкI пкъыгъуэхэр щащI заводхэри, кондитер цехри къигъэщIащ. ЖыпIэнурамэ, зи псэ емыблэж, зи узыншагъэм щымысхьу лажьэхэм ящыщщ. Сыт и уасэ фIы дыдэу зэригъэзэхуэжа, уеблэмэ щIэрыщIэу иухуэжа пэлъытэ, Хьэбэз къуажэм дэт, Сидакъ СулътIан и цIэр зезыхьэ гъуаз- джэхэмкIэ еджапIэр, егъэджэныгъэмкIэ лицейр! Апхуэдэ IуэхуфIу Олег зэфIихыр гъунэжщ, абыхэм я куэдагъыр къыпхуэлъытэнукъым.
ЦIыху къызэрыкIуэу, адыгэ хабзэфIым щIапIыкIауэ щыткIэрэ, абы хэлъ цIыхугъэр къытщIэтаджэ щIалэгъуалэм щапхъэ хуэхъунущ. ЦIыху къэс бгъэдыхьэкIэ къыхуэзыгъуэтыф, я гуфIэгъуэр, я гуауэр ядэзыIэт, хэти зи гур хузэIуха, дэIэпыкъуэгъу хуэныкъуэм зыщIэзыгъакъуэу щыткIэрэ, абы сыт щыгъуи цIыхур къепщIэкIащ. Псом хуэмыдэу гу зылъытапхъэр, Олег цIыхугъэ нэс зэрыхэлъращ, гуащIэдэкI лэжьыгъэм хуиIэ фIылъагъуныгъэ мыкIуэщIращ.
Аргун Олег тегъэчынауэ лэжьыгъэшхуэ ирегъэкIуэкI ди республикэм щыпсэу лъэпкъхэм яку дэлъ зэныбжьэгъугъэр хъумэнымкIэ. АбыкIи езы дыдэр щапхъэгъэлъагъуэщ.
Абы и дежкIэ щыIэкъым лъэпкъ зэхэгъэж. УзыфIэмыкIыжыну бгырыс хьэл-щэн дахэ зы- хэлъщ, гу къабзэщ, псэ хьэлэлщ. А псоми Олег егъэдахэ, и пщIэр нэхъри нэхъ лъагэ ещI.
Илъэс пщIы бжыгъэ текIыжми, цIыхубэр иригушхуэу я цIэ къраIуэнущ Аргунхэ я лъэпкъым къыхэкIа, зыгъэбжьыфIа цIыху цIэрыIуэхэр, и лIыхъужьхэр. Абыхэм я па шэхэм ящыщуи къыхагъэщынущ Аргун Олег, абы и адэ ПIатIэ и щIыхьымрэ и пщIэмрэ пызыщэр. Къэрэшей-Черкесым, Абхъазым щыпсэу Аргунхэ я лъэпкъыр ирогушхуэ и къуэфIым — зи щIыхьыр лъагэ Аргун Олег!
ПщIэ ин зыхуэтщI нэхъыжьыфI! Къэрэшей-Черкес Республикэм и нэхъыжьхэм я Хасэм хэтхэм, ди гум къыбгъэдэкIыу гуапэу дынохъуэхъу уи илъэс 75-рэ махуэщIымкIэ! Узыншагъэ быдэ, зэIузэпэщ, насып, гъащIэ кIыхь уиIэну Тхьэм жиIэ!
ДАУР Борис, КъЧР-м и нэхъыжьхэм я Хасэм и Советым и тхьэмадэ
Си щхьэкIэ, Куэш-Хьэблэ къуажэм щыпсэухэм къыдбгъэдэкIыу хъуэхъу гуапэхэр худогъэфащэ пщIэшхуэ зыхуэтщI хэкулIым — Аргун Олег Iэбубэчыр и къуэм илъэс 75-рэ зэрырикъуамкIэ!
Ди къуажэм и къуэ щыпкъэ, адыгэ лъэпкъми, Къэрэшей-Черкес Республикэми, уе- блэмэ Урысей псоми зи гуащIэдэкI лэжьыгъэ уасэншэкIэ цIэрыIуэ хъуа Аргун Олег икъукIэ дрогушхуэ, дроин, дробжьыфIэ. Шэчыншэу, Аргунхэ я лъэпкъыцIэр жыжьэ зыгъэIуахэм я лъэужьыр Олег махуэ ищIащ, ноби егъэбжьыфIэ Социалистическэ ГуащIэдэкIым и ЛIыхъужь и адэм — Аргун Iэбубэчыр и щIыхьыр, ар лъагэу еIэт.
Олег! УкъызыдэкIа къуажэ лъапIэмрэ къуажэдэсхэмрэ сыт и лъэныкъуэкIи уазэ- рыпыкъуэкIым, псапэу, дэIэпыкъуныгъэу, щIэгъэкъуэну блэжьым хуэдиз насыпрэ гъащIэ кIыхьрэ Тхьэм къыуит! Тхьэм нэхъыбэжми ухущIигъыхьэ!
Нобэ узэкIуэлIа ныбжь дахэм ббгъэдэлъ акъыл узэщIар, теубыдэныгъэр, уи лэ- жьыгъэм хууиIэ бгъэдыхьэкIэ нэсыр щыхьэт тохъуэ гъащIэм Iуэху зэхэщIыкI лъагэ зэрызыщыIэрыбгъыхьам, уи пщIэмрэ уи щIыхьымрэ жылагъуэм зэраIэтым.
Махуэ къэси уи щIэщыгъуэу, гъащIэм гу щыпхуэу, уи лэжьыгъэм узыхунэс ехъу- лIэныгъэхэм уи гур хагъахъуэу, узыншагъэ быдэ уиIэу, гукъыдэжыр гъунэжу къобэ- кIыу Тхьэм уигъэпсэу, нэхъыжь Iумахуэм уи жьауэм Тхьэм дыщIигъэт!
КЪАНТЕМЫР Алибек,
Куэш-Хьэблэ къуажэ администрацэм и Iэтащхьэ
Адыгэр дызыгъэбжьыфIэ, дызыIэт, ди цIэр жыжьэ зыгъэIу лэжьакIуэшхуэщ ди лъэ пкъым и зыужьыныгъэм хэлъхьэныгъэ ин хуэзыщI, псэемыблэж къару жылагъуэми, республикэми, уеблэмэ къэралми хуэзыгъэтIылъ Аргун Олег Iэбубэчыр и къуэр.
А цIыху щыпкъэм и гъащIэ псор пыщIащ гуащIэдэкI, хъызмэт лэжьыгъэхэр гуэщIыным. Олег сыт щыгъуи хуэщыпкъащ, ноби толажьэ къызыхэкIа лъэпкъым, къыздэхъуа къэралым, зыхуэлажьэ цIыхубэмрэ жылагъуэмрэ яфI къэгъэщIыным. Iуэху зэхэщIыкI лъагэ бгъэдэлъкIэрэ, гъэсэныгъэ нэс, жэуаплыгъэ хэлъкIэрэ, абы пщIэшхуэ къыхуащI, и щIыхьыр ялъытэ и лэжьэгъухэми, ныбжьэгъухэми, пIалъэ зэхуэмыдэхэм къыдэгъуэгурыкIуахэми. Шэч хэмылъу, комсомол, парт, хъызмэт лэжьыгъэшхуэ къызэзынэкIахэм ящыщщ Олег.
ГуащIэдэкI лэжьыгъэм хуиIэ фIылъагъуныгъэ иныр, къызэгъэпэщакIуэ лъэрыхьу зэрыщытыр щапхъэ зэрыримыкъу щыIэкъым уи Хэкум, узыщалъхуа хэгъуэгум, укъы- зыхэкIа лъэпкъым я зыужьыныгъэм ухуэлэжьэнымкIэ. Псом хуэмыдэу, лъэпкъым къыщIэтаджэ щIэблэм бзэр яIэщIэмыхуным, щэнхабзэ къызэрымыкIуэм щIапIыкIыным и мылъкуи и къаруи щымысхьу хуегъэтIылъ. Апхуэдэ щIыхь куэдращ Олег и цIэр къэрал, жылагъуэ нагъыщэхэмкIэ къыщIыхагъэщыр.
Акъыл узэщIа зиIэ лIы щыпкъэм, гъэсэныгъэ зыхэлъ цIыху нэсым, къызэгъэпэ- щакIуэ лъэрыхьым, жылагъуэ IуэхущIакIуэшхуэм ирогушхуэ, ироин Олег къызыхэкIа адыгэ лъэпкъыр.
Дыпхуохъуахъуэ уи махуэщI лъапIэмкIэ, Олег! Узыншагъэ быдэр къобэкIыу, гуфIэгъуэмрэ гукъыдэжымрэ ущымыщIэу, лъэпкъым и пащхьэ сыт щыгъуи уи пщIэр щылъагэу Тхьэм иджыри илъэс куэдкIэ уигъэлажьэ, гъащIэ кIыхь уищI!
АСЛЪЭНХЭ Алий, ДАХ-м и вице-президент, КъЧР-м и Адыгэ Хасэм и тхьэмадэ, КъЧР-м и ЦIыхубэ ЗэIущIэм (Парламентым) и депутат
ПщIэшхуэ зыхуэтщI Олег Iэбубэчыр и къуэ!
«Хьэбэз жыпс завод» ОАО-м щызэдэлажьэ гупышхуэр дынохъуэхъу уи махуэщI лъапIэмкIэ — илъэс 75-рэ узэрырикъуамкIэ!
Ди фIэщ мэхъу, уи унафэм дыщIэткIэрэ, ди гуащIэ здэдгъэтIылъ предприятэр сыт хуэдэ лъэпощхьэпоми, кризис хьэлъэми зэрыпэувыфынур. Дрогушхуэ уэ пхуэдэ цIыху хьэлэмэтым, гъащIэ, Iуэху зэхэщIыкI лъагэ зыбгъэдэлъ унафэщIым и унафэм дыщIэту дылэжьэну лъэкIыныгъэ зэрыдиIэм. ФIыщIэ ин худощI уи шыIэныгъэм, сыт щыгъуи зыкъызэрытщIэбгъакъуэм, ди мыхъумыщIагъэхэм гу зэрылъыдыбгъатэр сыт щыгъуи ди гуапэщ. Уи щIэгъэкъуэнкIэ дэри уэ пхуэдэ цIыху, лэжьакIуэ нэс дыхъуным дыхущIокъу, дыхуопабгъэ.
Уи унафэм щIэткIэрэ, ухуэныгъэ пкъыгъуэхэмкIэ заводыр лэжьакIуэхэм лъэ быдэкIэ ягъэуващ, дунейпсо утыкум ихьа, технологие лъагэ къэзыгъэсэбэп производствэ лъэрыхь хъуахэщ, увыIэгъуэ имыIэу къыщIигъэкI пкъыгъуэхэм хегъахъуэ, ирегъэфIакIуэ.Хьэбэз жыпс заводым къыщIигъэкI пкъыгъуэхэр ди къэралышхуэми, хамэ къэралхэми щыбгъуэтынущ, щIэупщIэшхуэ щаIэщ. Иджырей зэман хьэлъэми заводым, цеххэм я лъэкIыныгъэхэм хэщIакъым, уеблэмэ нэхъри нэхъ лъэрыхьу и лъэ егъэув, зеужь.
Дызэдэлажьэ гупышхуэм къыдбгъэдэкIыу хъуэхъуу щыIэм я нэхъыфIыр пхуэдгъэфэщэну дыхуейщ! Дунейм фIыгъуэу тетым: насыпым, узыншагъэ быдэм, фIылъагъуныгъэм, гъащIэ кIыхьымрэ ехъулIэныгъэмрэ ущимыгъащIэкIэ! Уэри, уи унагъуэми, къыбдалъхуахэми, уи Iыхьлыхэми зэгурыIуэныгъэр, зэпыщIэныгъэр фяку димыхкIэ! Уи унагъуэм дежи, лэжьапIэми хэхъуэмрэ гукъыдэжымрэ уи куэду, гуауэ умылъагъуу уигъэпсэу! Илъэс къэси нэхъри нэхъыфI пхуищI!
Уи фIэщ щIы — уи нэIэм щIэт лэжьакIуэ гупым пщIэ къыпхуащI, уалъытэ, уэркIэ мэгушхуэ. Ди гуфIэгъуэм гъунэ иIэкъым уэ пхуэдэ унафэщI щыпкъэм и нэIэм дыщIэту дылэжьэну лъэкIыныгъэ зэрыдиIэмкIэ! Иджыри зэ дынохъуэхъу уи махуэщIымкIэ!
«Хьэбэз жыпс завод» ОАО-м щылажьэхэм къыдбгъэдэкIыу
ПщIэ зыхуэсщI, си къуэш пэлъытэ Олег!
СыпхуэгуфIэрэ си гум къыбгъэдэкIыу сынохъуэхъу уи махуэщIымкIэ!
УнафэщI зэчиифIэу, Iуэху зэхэщIыкI лъагэ зыбгъэдэлъу ущыткIэрэ, уи лэжьэгъухэми, республикэм щыпсэухэми къабгъэдэкIыу щIыхь ин къэплъэщащ. ЦIыхубэм ящы- мыгъупщэ, Социалистическэ ГуащIэдэкIым и ЛIыхъужь уи адэ цIэрыIуэм игъэтIылъа гуащIэм, шэчыншэу, щIыхь пылъу пыбощэ. УзэрыунафэщI зэчиифIэ къудейм къыщымынэу, уэ икIи улъэпкъыпсэ-хэкупсэщ.
Уи къару ин зыхэлъ предприятэм хэлъхьэныгъэшхуэ хуещI производствэ, социальнэ проектхэм, ухуэныгъэм, щэнхабзэм, егъэджэныгъэм ехьэлIа программэхэр гъэзэщIэным. Уи гуащIэ иным къыпэкIуэ ехъулIэныгъэхэм уасэшхуэ хуащI заводым и лэжьакIуэхэми, абыхэм я унагъуэхэми.
Илъэс зыбжанэ хъуауэ дуней псор зэрыт щытыкIэ хьэлъэм уэ пхузэфIэкIащ лэжьапIэ IэнатIэхэм кIэромыгъэхуу, уеблэмэ цIыху нэхъыбэ лэжьыгъэкIэ къызэбгъэпэщын. Уи гуащIэдэкI, жылагъуэ IуэхухэмкIэ къару мыкIуэщI хыболъхьэ Урысейр нэхъри нэхъ лъэщ, лъэрыхь хъуным, къэкIуэну гъащIэм цIыхухэр лъэ быдэкIэ хэувэным, я псэукIэр тынш щIыным.
Сынохъуэхъу уи лэжьыгъэм дяпэкIи жэрдэмыщIэхэр хэплъхьэну, ебгъэфIэкIуэну лъэкIыныгъэ уиIэну! Узыдэлажьэхэм я щIэгъэкъуэн ущымыщIэу, уи дэтхэнэ къыщIэдзэныгъэми ехъулIэныгъэ хэлъыну Тхьэм жиIэ! Си фIэщ мэхъу, уэ пхэлъ къарум, гъащIэм хууиIэ еплъыкIэ жыджэрым, унафэщI IэнатIэм щызэбгъэгъуэта Iуэху зэхэщIыкI лъагэм дяпэкIи, кIуэ пэтми, нэхъри нэхъ лъагапIэ инхэмрэ ехъулIэныгъэфIхэмрэ узэрыхуашэнур.Уи щхьэкIи, уи унагъуэм щIэсхэри узыншагъэ быдэ, насыпрэ зэIузэпэщыныгъэрэ фыщимыгъащIэкIэ!
АГЫРБЭ Юрэ, Москва къалэм дэс адыгэ-абазэ лъэпкъхэм я нэхъыжь Хасэм и тхьэмадэ
Олег! Илъэс 75-рэ узэрырикъуамкIэ сынохъуэхъу!
Иджыри мынэхъ мащIэу апхуэдиз къабзэ илъэскIэ сэбэп къэпхьу, цIыхухэм щапхъэ къыптрахыу, жыла- гъуэмрэ гъащIэмрэ нэхъыфI щIыным уи гуащIэдэкIыр хэплъхьэу упсэуну сыпхуохъуахъуэ!
Уи адэшхуэ Дадымрэ уи адэ ПIатIэрэ ялъэкI къагъэ- накъым уэ щIэныгъэшхуэрэ гъэсэныгъэрэ бгъуэтын папщIэ. Уэ IуэхуфI куэд уи IэрыкIщ. Ахэр ноби зэпыу- къым. Уи зы къэпсэлъэныгъэм тэрэз дыдэу щыжыпIащ: «ГъащIэр нэхъыфI хъун папщIэ езы цIыхухэри нэхъыфI хъун хуейщ!» жэуэ. Абы жылагъуэр тырет!
СынолъэIу, «Черкес хэку» газетым и щэбэт къыдэкIыгъуэ къэс къытребгъэдзэну цIыхухэмрэ гъащIэмрэ нэхъыфI хъун папщIэ — уи еплъыкIэхэр, уи Iуэху бгъэдыхьэкIэхэр, хэт сыт ищIэн хуейми елъытауэ. Уэ Iуэху зэхэщIыкIыу ббгъэдэлъым щIэджыкIакIуэхэм сэбэпышхуэ къызэрыхахынум шэч къытесхьэкъым. Узыншагъэ быдэрэ гукъыдэжрэкIэ!
ПIЭФ ФуIэд, егъэджэныгъэм и отличник
Больше на Черкес хэку
Подпишитесь, чтобы получать последние записи по электронной почте.
