Мазаем и 23-м — Хэкум и хъумакIуэм и Махуэм, Москва къалэм, Кремлым, УФ-м и Президентым и представительскэ пэшым Путин Владимир Урысей Федерацэм и ЛIыхъужьым и нагъыщэ «Дыщэ Вагъуэ»-р адыгэ лъэпкъым къыхэкIа къулыкъущIэм, подполковник Джэрийхэ Инал Артур и къуэм хуигъэфэщащ. Адыгэ щIалэ — лIыхъужьыр Ставрополь крайм хыхьэ Курской районым щыщ Серноводскэ жылагъуэм къыщыхъуащ. Иужьым Iэпхъуэжащ Ищхъэрэ Осетием хыхьэ Мэздэгу къалэм. Инал къулыкъу щещIэ Сухопутнэ дзэ пакIэхэм. КъуэкIыпIэ военнэ округым и етхуанэ общевойсковой дзэм и 57-нэ щхьэхуэ мотострелковэ бригадэм и штурмовой отрядым и командирщ. СВО-м хэтщ.
И зауэлI къалэнхэр игъэзащIэкIэрэ, щIалэм къигъэлъэгъуа гуеигъэмрэ лIыхъужьыгъэмрэ къыхалъытэкIэрэ, 2023 гъэм Инал къыхуагъэфэщащ «Орден Мужества» къэрал нагъыщэ лъагэр. 2025 гъэм ди лъэпкъэгъу къулыкъущIэ гуейр яхэтащ Запорожскэ областым хыхьэ Гуляйполе къалэр хуит къэзыщIыжахэм. ИкIи, ехъулIэныгъэ хэлъу и зауэлI къалэнхэр зыгъэзэщIа Джэрийхэ Инал хуэфащэу къыхуагъэфэщащ Урысейм и ЛIыхъужь щIыхьыцIэ лъагэр. «Курской хэгъуэгур гъунэ имыIэу ирогушхуэ икIи ироин зи лIыхъужьыгъэ щапхъэкIэ къэралым и тхыдэм и напэкIуэцIыщIэм зыхэзытха я хэкуэгъу щIалэ гуейм», — жеIэ муниципалитетым и Iэта щхьэ къалэнхэр зыгъэзащIэ Бабичев Павел.
Мы къэхъугъэр — дуней хъурейм тет адыгэхэм я гушхуапIэ къызэрымыкIуэщ. Гвардии подполковник Джэрийхэ Инал Артур и къуэм щIыхь хэлъу егъэзащIэ офицерым и къалэнхэр, хахуагъэм, гуеигъэм, псэемыблэжу Хэкум къулыкъу хуэщIэным и щапхъэ нэсщ. Инал зэрихьа лIыхъужьыгъэр тхыдэм зэрыхитхар езым къигъэлъэгъуа лIыхъужьыгъэ закъуэмкIэкъым, атIэ, къызытекIа лъэпкъ уардэм лIыщIыгъуэ бжыгъэкIэ зэIэпаха гуеигъэм и хабзэхэм я пыщакIуэущ, мамырыгъэмрэ пэжагъымрэ хъумэным я хъумакIуэущ, я телъхьэущ. Адыгэ лъэпкъыр ирогушхуэ апхуэдэ лIыхъужь – щыпкъэхэр къызэрыщIэтаджэм. Абыхэм яIэтыр къызыхэкIа лъэпкъ закъуэракъым, атIэ зыщалъхуа хэгъуэгуми, Урысей псоми я щIыхьыр ягъэлъапIэ.
Джэрийхэ Инал — лIыгъэм и щапхъэщ, щIалэгъуалэм и щапхъэгъэлъагъуэщ. Апхуэдэ щIалэм иджыри зэ гурыIуэгъуэ тщещI Хэкум хуэщыпкъэныр, хэкупсагъэ-лъэпкъыпсагъэр. Къэрэшей-Черкес Республикэм щыпсэу адыгэ лъэпкъри дыдогуфIэ ди щIалэ хахуэм. Дыхуохъуахъуэ узыншагъэ быдэ иIэу, и къаруи и жэрдэми и гур зыхущIэкъум хуиунэтIыну. Насып, зэIузэпэщыныгъэ, гуфIэгъуэрэ мамырыгъэрэ щымыщIэу псэуным ящыщ Тхьэм уищI, Джэрийхэ я щIалэ хахуэ Инал! Тхьэм укъихъумэ!
ЩОХЪУЖЬ Люсанэ
Больше на Черкес хэку
Подпишитесь, чтобы получать последние записи по электронной почте.
