Иджыри зы адыгэ пхъурылъхум и цIэр ину щыIуащ Тырку къэралми дуней псоми я кинематографием. Актрисэ Унсал Синем хъуащ GQ версиемкIэ «Илъэсым и бзылъхугъэ» пщIэшхуэ зиIэ тырку саугъэтым и лауреат. ЖыпIэ хъунущ ар куэдым ягу ирихьа, зэрыкъэралу зэлъащIыса «Къалэ жыжьэ» сериалым бзылъхугъэ ныбжьыщIэм къыщигъэлъэгъуа зэчийм, IэпщIэлъапщIагъым къапэкIуауэ. Абы ипэкIэ ар фIы дыдэу, пылъхьэншэу щыджэгуащ «Доктор Хан» сериалым (ар «Доктор Хаус» америкэ культ сериалым къытращIыкIыжащ).
Саугъэтым къегъэлъагъуэ мы актрисэм куэд зэрыхузэфIэкIамрэ тырку кинематографием хэлъхьэныгъэшхуэ зэрыхуищIамрэ. Унсал Синем 1993 гъэм мэкъуауэгъуэм и 21-м къыщыхъуащ Измир къалэм. Ари гъэщIэгъуэну къыщIэкIынщи, ар тыркуу ятх щхьэкIэ, и адэр азербайджан щылъхущ, и анэр адыгэщ. Синем лэжьыгъэм зыщимыдзейуэ, щIэныгъэм хуэпабгъэу къэтэджащ. Псом хуэмыдэу фIэфIт тхылъ еджэну. ЕджапIэм щыщIэсым ар нэIуасэ хуэхъуащ урыс тхакIуэ цIэрыIуэ Достоевский Федор и творчествэм.
Езым зэрыжиIэжамкIэ, хьэкъыпIэкIэ Достоевский и тхылъхэращ ар тезыгъэгушхуар Османагази университетым и литературэ къудамэм щIыхьэну. Дипломыр зыIэригъыхьа нэужь, Синем мазэ зыбжанэкIэ лэжьащ литературэ редактору. Театр гъэлъэгъуэныгъэхэм ящыщ зым щIэса нэужь, тегушхуащ актер IэпщIэлъапщIыгъым и курсхэм щIэ тIысхьэну. Синем и япэ лъэбакъуэхэр кинематографием хичащ «Лъагъуныгъэ хужь-фIыцIафэ» сериалымкIэ. Абдежым щигъэзэщIа ролыр нэхъыщхьэу щымытами, режиссерхэм гу къылъатащ.
АдэкIэ и ехъулIэныгъэхэр къызэкIэлъыкIуащ. А сериалым иужь, и хэкуэгъухэм ар къацIыхуащ, режиссерхэр къыщIэхъуэпс хъуащ апхуэдэ роль гугъухэр, къызэрымыкIуэхэр къызэхъулIэ актрисэ ныбжьыщIэр я фильмхэм ирагъэблэгъэну. Илъэс 33-рэ нэхъ зимыныбжь актрисэр зэфэну псыр иджыри къэжакъым, абы и лэжьыгъэ нэхъыщхьэхэр, саугъэт инхэр, цIыхухэм я фIылъагъуныгъэмрэ гулъытэмрэ къыпоплъэ. АдэкIэ фыщыдгъэгъуэзэнщ Унсал Синем и гъащIэм щыщу нэхъ гъэщIэгъуэн фщыхъунухэм. ИщхьэкIэ къызэрыхэдгъэщащи, Унсал Синем и нэщ, и псэщ Достоевский Федор и тхылъхэр. И жагъуэкъым Цвейг Стефан и творчествэри. Бзылъхугъэр фильмхэм щыджэгу къудейкъым, абы и зэфIэкIыр здынэсыр къыщегъэлъагъуэ театрми. «Раифрэ Латафетрэ» театр гъэлъэгъуэныгъэм и роль нэхъыщхьэр зэригъэзэщIам папщIэ, 2019 гъэм абы къыхуагъэфэщащ пщIэшхуэ зиIэ «Афифе Жале» театр саугъэт нэхъыщхьэхэм ящыщ зыр. Унсал Синем пэшхэм щыщIыхьэкIэ лъакъуэ ижьымкIэщ нэхъапэу зэрыщIэбакъуэр.
«Къалэ жыжьэ» сериалыр зэрыщыту щIаплъыкIати, гу лъатащ абы пэш псоми лъакъуэ ижьымкIэ лъэ зэрыщIичэм. Бзылъхугъэм и фIэщу жеIэ апхуэдэ щэным ехъулIэныгъэхэм зэрахуишэр икIи дяпэкIи лъэпощхьэпохэм зэращихъумэнур. Унсал Синем лы ишхкъым, ар вегетарианкэщ. Бзылъхугъэм езыр и щхьэ акъылкIэ абы хуэкIуауэ, зыIуилъхьэкъым псэущхьэхэм къапыкIа шхыныгъуэхэр, хуабжьу пылъщ спортым. Абы къару лей къыхелъхьэ икIи лъэкIыныгъэ кърет фильмхэр щытрахкIэ зыпэщIэхуэ гугъуехьхэр гугъу ядемыхьу къызэринэкIыну. Тырку актрисэм и жагъуэщ и уней гъащIэм и гугъу ищIыну. Синем адэкIи пещэ «Къалэ жыжьэ» сериалым и роль нэхъыщхьэр гъэзэщIэным. Лэжьыгъэм къыщыдэхуэкIэ, и щIэныгъэм хегъахъуэ, и лъэкIыныгъэхэм зарегъэузэщI — тхылъ куэд йоджэ, спортзалым макIуэ зэпыт, пщэфIэну фIэфIщ. Иджырей диетэхэм задримыгъэхьэхыу, езым игу къищтэ шхыныгъуэхэр егъэхьэзырыж.
Зыгъэхьэзырар ДЭБАГЪУЭ Хьэтызэщ
Больше на Черкес хэку
Подпишитесь, чтобы получать последние записи по электронной почте.
