Адэм и Iуэхур къуэм пещэ

ЧЕРКЕССК къалэм дэт уней тхылътедзапIэ нэхъ инхэм, лъэкIыныгъэ нэхъ зиIэхэм ящыщщ Джатэ Хьисэ и унафэм щIэту лажьэр.
Абы зыхуэзгъэзэным ипэ къихуэу, сеплъащ тхылътедзапIэм зи Iуэху зыхузэфIигъэкIа цIыхухэр абы и сайтым деж къызэрыпэджэжам. Зым етх: «Мыхэр зи Iуэхум нэгъэсауэ хэзыщIыкI IэщIагъэлIщ!! (джэ нагъыщитI зэрыщытым къегъэлъагъуэ цIыхур хуабжьу зэрыарэзыр). Ди Iуэхухэр щIэх дыдэ икIи фIагъ лъагэ иIэу тхузэфIагъэкIащ. Мыпхуэдэ Черкесск дэту дызырихьэлIар мы зыращ. Сыхуейщ адэкIи ехъулIэныгъэ фиIэну, фыщIэрэщIэну!». ЕтIуанэм къигъэнащ мыпхуэдэ тхыгъэ: «Логотипыр фIы дыдэу тхутрадзащ. ДызыщIэлъэIуахэр псынщIэу тхузэфIагъэкIащ. ЦIыху гуапэхэщ, псори фIы дыдэщ!» Ещанэм: «Сурэтхэр тхутрадзащ. ФIагъымкIэ арэзы дащIащ. ЦIыху нэфIэгуфIэхэщ. Псалъэр къомыгъажьэ щIыкIэ узыхуейр къагуроIуэ. Я хуэIухуэщIэхэр лъапIэкъым. Яхуэфащэ дыдэу «тху» яхузогъэув…» Мыпхуэдэ тхыгъэхэр куэдщ, ахэр псори къэсхьынкъым. Абы ипIэкIэ упщIэ зыбжанэкIэ зыхуэзгъэзэнщ езы Хьисэ.

— Хьисэ, тхылътедзапIэм и Iуэхур къызэрымыкIуэщ, гугъущ. Абы и ужь фихьэныр дауэ фигу къэкIа? Дауэ фытегушхуа?

— Мы Iуэхур къезыгъэжьар ахърэтым увыIэпIэ дахэ щызыгъуэтын си адэ Валерэщ. Илъэс зыбжанэкIэ Iуэхум хэтауэ, абы лъэщтэгъу къыхуэхъуащ си анэм и дэлъху Бэвыж Рэмэзан, нэгъуэщI и ныбжьэгъухэр. Си адэр псэужамэ, мы упщIэхэм жэуап тегъэчынахэр къаритынт, ауэ сэ сызыщыгъуазэу щIэзгъэбыдэнур аращи, езым къри гъэжьа Iуэхур фIэфIт икIи леймкIэ гугъу зригъэхьакъым. 1990 гъэхэм псэуалъэхэр бэджэнду къащтэурэ къекIуэкIащ, иужькIэ иджы дызыщIэс псэуалъэр къэтщэхужри дыкъэкуэшыжащ. Си адэр дунейм щехыжам, сигу кIуэдауэ сыщыст, сщIэнур сымыщIэу: тхылътедзапIэр адэкIэ згъэлэжьэну, хьэмэрэ… Ауэ, си щхьэ унафэ хуэсщIыжри, сытегушхуащ, сыт щхьэкIэ жыпIэмэ, къызгурыIуащ си адэм и мурадыр къызэрехъулIар, и Iуэхум адэкIэ пысщэныр си мурад пажэу зэрыщытыр, абы и хъуэпсапIэу щыта псори зэзгъэхъулIэну къызэрыстехуэр.
— Сыт хуэдэ продукцэ лIэужьыгъуэхэр къыщIэвгъэкIрэ?

— Си адэм и хьэрычэтрэ и гулъытэрэкIэ щIадзауэ щытащ къалэм, республикэм и къэрал къулыкъущIапIэхэм (МВД-м, поликлиникэхэм, сымаджэщхэм, еджапIэхэм, нэгъуэщIхэм) IуэхукIэ къагъэсэбэп бланкхэр, къулыкъу пэшхэм кIэралъхьэхэр, нэгъуэщIкъинэмыщIхэр тедзэныр. Ди лэжьыгъэм и кIуэрабгъу нэхъыщхьэхэм ящыщ зы хъуауэ, дэри ар догъэкIуатэ. Тыдодзэ «оперативная полиграфия» жыIэкIэм къызэщIиубыдэ, псынщIэу, щIэхыу ягъэхьэзыр продукцэр: визит карточкэхэр, листовкэхэр, флаерхэр, промоакциехэм ятегъэпсыхьа буклетхэр, плакатхэр, баннерхэр, наклейкэхэр, этикеткэхэр, каталогхэмрэ презентацэхэм къыщагъэсэбэп материалхэмрэ, корпоратив IэмалкIэ къагъэсэбэп папкэхэр, блокнотхэр, махуэбжхэр… Черкесск къалэм дэт «Бумфа-групп» ООО-м и салфеткэхэм, нэгъуэщI хьэпшыпхэм трагъапщIэхэр зэуэ дэращ зи IэрыкIыр. Пэжщ, си адэр щIэхъуэпст тхылъхэр тедзэным, ар зыщызгъэгъупщэкъым, сыпылъщ си адэр зыхуэпабгъэу щыта плъапIэхэр зыIэрызгъэхьэным. Станокрэ оборудованэу сызыхуэныкъуэр иужьрей илъэс зыбжанэм си къарукIэ зыIэрызгъэхьащ. Переплетхэр зэрад пкъыгъуэхэр, Iэмэпсымэхэр диIэтэкъыми ахэр псори зэзгъэпэщыжащ. Тхылъхэр хужь-фIыцIэу щытмэ, тираж инхэри тыдодзэ, ауэ щхъуэкIэплъыкIэхэр иджыкIэ зэрытхузэфIэкIыр тираж цIыкIукIэщ.

— Газетхэр тевдзэну фигу къэкIакъэ, фыхуежьакъэ? Ди КъэрэшейЧеркесым къыщыдагъэкI газетхэр Ставрополь крайм нэгъунэ яшэурэ традзэ. Ар фхузэфIэкIамэ, ари хэхъуэхэ кIыпIэ дэгъуэ фхуэхъунут…

— Газетхэри теддзэну дигу къэкIа къудейкъым, икIи дыхуежьат. Ауэ газетхэр тебдзэн папщIэ станок ин, псэуалъэшхуэ ухуэныкъуэщ. ИджыкIэ тхузэфIэкIкъым. Ауэ дяпэкIэ, Тхьэм жиIэмэ, а Iуэхутхьэбзэри къэдгъэIурыщIэну ди гугъэщ. Формат цIыкIу зиIэ газетхэр теддзэфынущ, ауэ инхэр…

— АдэкIэ-мыдэкIэ кIэралъхьэ рекламэ къыхуеджэныгъэхэм хуэдэхэр тевдзэкъэ?

— Рекламэ баннерхэр, къыхуеджэныгъэхэр тедзэныр иджы щIыдодзэ къудей, ари къытпэплъэ Iуэхуу къызолъытэ.

— Хьисэ, мы тхылътедзапIэр хэхъуэ къызыхэкI Iуэхуу щыт?

— Хэхъуэшхуэр хэт ищIэн, ауэ Тхьэм и шыкуркIэ, дызыхуэныкъуэншэу дегъэпсэу. ЦIыхуитху догъэлажьэ, дыщыхуэныкъуэм деж нэхъыби къыдощтэ.

— Адэм и Iуэхур къуэм щыпищэкIэ, гугъапIэ щыIэщ. ДяпэкIэ Тхьэм зывигъэужь, фи лъэкIыныгъэхэм заригъэузэщI. ДЭБАГЪУЭ Хьэтызэ