Афганистаным Советыдзэр къызэрырашыжрэ илъэс 36-рэ щрикъум хуэгъэза дауэдапщэр къэрал власть къулыкъущIэхэр, жылагъуэ Iуэхузехьэхэр, ветеран организацэхэм я лIыкIуэхэр, СВО-м къулыкъу щызыщIахэр хэту Черкесск къалэм ТекIуэныгъэм и Аллеем, Афганистаным хэкIуэда ди хэкуэгъухэм я фэеплъ сыным и пащхьэ щекIуэкIащ.
ЗэIущIэм хэтащ Къэрэшей-Черкес Республикэм и Iэтащхьэмрэ и Правительствэмрэ я Администрацэм и УнафэщIым и япэ къуэдзэ Хубиев Марат, КъЧР-м и ЦIыхубэ ЗэIущIэм (Парламентым) и депутатхэу Аслъэнхэ Алий, Ганшин Алексей, Михайлов Павел, СВО-м хэта, депутатхэу Гусхэ Замиррэ Мутчаев Дахиррэ, нэгъуэщIхэри. Фэеплъ дауэдапщэм куэду къекIуэлIащ хабзэхъумэ къулыкъущIэхэр, щIалэгъуалэ хэкупсэ организацэхэм зыщызыгъасэхэр, Iуэху щызыщIэхэр, къалэ еджапIэхэм класс нэхъыжьхэм щеджэхэр. Республикэм лIыщхьэм къыбгъэдэкIа зыхуэгъэзэныгъэмкIэ зэIущIэм къызэ хуэсахэм захуигъэзащ Хубиев Марат: — Хэкум и хъумакIуэм и Илъэсым, зауэлI – интернационалистым и Махуэу нобэ къэралышхуэм дгъэлъапIэм, мыхьэнэ хэха иIэ мэхъу. АтIэ, нобэ зи щIыхьыр дгъэлъапIэр зауэлIафганцхэм я мызакъуэу, Хэкур хъумэныр зи къулыкъу пщэрылъу зылъытэхэм, лIыгъэрэ хахуагъэрэ къагъэлъагъуэу къэралым и хьэлэмэтхэр зыхъумэ псоми махуэщI яхуохъу. ЖыIэпхъэщи, Афганистаныр зыпэщIэкIа куэд нобэ хэтщ СВО-м щекIуэкI зауэ Iуэхугъуэхэм, псапащIэ дэIэпыкъуныгъэхэр къызэрагъэпэщ, ветеран организацэхэм щIалэгъуалэм драгъэкIуэкI хэкупсэ лэжьыгъэм и курыкупсэм хэтхэщ. Республикэм и лIыщхьэ Темрезов Рэшид гулъытэ хэха хуещI афганцхэм я фэеплъыр хъумэным.
Больше на Черкес хэку
Подпишитесь, чтобы получать последние записи по электронной почте.
