ХабзэфI зэрыхъуауэ, илъэсым икIэм къапщытэж КъЧР-м лъэпкъ IуэхухэмкIэ, цIыхубэ коммуникацэхэмрэ печатымрэкIэ Министерствэм и къызэгъэпэщыныгъэкIэ иригъэкIуэкI республикэ журналист творческэ зэпеуэр.
Иужьрейр хуэунэтIауэ щытащ хэгъуэгум щыпсэу лъэпкъхэм яку дэлъ зэныбжьэгъугъэр, зэпыщIэныгъэхэр гъэбыдэным, дин зэхуэмыдэ зезыхьэхэр зэдэгъуэгурыкIуэным, зэгурыгъэIуэным теухуауэ журналистхэм я Iэдакъэ къыщIэкIа тхыгъэхэм.
Журналистхэм я творческэ зэпеуэм сыт щыгъуи къыхашэ печать, электроннэ СМИ-хэм я IэщIагъэрылажьэхэр, икIи, зэныкъуэкъуныгъэм ипкъ иту фIым я нэхъыфI тхыгъэхэр къыхагъэщ, ягъэлъапIэ, утыку кърашэ. Абыхэм я лэжьыгъэхэр жюрим номинацэ 12-кIэ къапщытэ. Абыи къыщымынэу, штатым хэмыт корреспондентхэм я тхыгъэ нэхъыфIхэри къыхагъэщ.
— Хэгъуэгум и журналистхэм я творческэ зэпеуэр Министерствэм ирегъэкIуэкI «Реализация государственной национальной, конфессиональной, информационной политики в КЧР» къэрал программэм ипкъ иту. Гулъытэ нэхъыщхьэ зэдгъэгъуэтыр республикэм щыпсэу лъэпкъхэр тыншу зэдэпсэуным журналистхэм я къару ин зэрыхэлъращ, абыхэм я тхыгъэхэм мыхьэ-нэшхуэ зэраIэращ. КъинэмыщIауэ, урысей граждан зэпIэзэрытыныгъэр гъэбыдэнымкIэ СМИ-хэм я лэ-жьыгъэр уасэншэщ. Ар хьэкъщ. Нобэ дызэрыт зэманым, СВО-р щекIуэкI пIалъэм журналистхэм пэжагъ хэлъу хъыбарыр сэтей ящIыным куэд елъытащ, — къыхигъэщащ КъЧР-м лъэпкъ IуэхухэмкIэ, цIыхубэ коммуникацэхэмрэ печатымрэкIэ и министр Есе-неев Мурат гъэлъэпIэныгъэ пшыхьыр къызэIуихкIэрэ.
Хъуэхъу псалъэхэм къыдэкIуэуи, зэпеуэм къыщыхагъэща журналистхэм яхуигъэфэщащ щIыхь тхылъхэр, ахъшэ саугъэтхэр.
Зи цIэ къраIуахэм яхэхуащ ди газетым щылажьэ журналист нэхъыжь Дэбагъуэ Хьэтызэ. Штатым хэмыт ди корреспонденту къыхагъэщащ адыгэ газетым пыщIэныгъэ ин къыхузиIэ, ди лъэпкъыр зэрыгушхуэ дохутыр цIэрыIуэ Даур Борис. Абы и тхыгъэр, хэгъуэгу зэхуэмыдэхэм щыпсэу Даурхэ я лъэпкъым я зэпыщIэныгъэм теухуар, фIым я нэхъыфIу къалъытащ.
— ИкъукIэ гуапэ сщыхъуащ мы зэпеуэм си тхыгъэр зэрыхэхуар, сыкъызэрыхагъэщар. Ар зи фIыщIэхэм тхьэм фигъэпсэу вжызоIэ! Журналистым и къалэн пажэхэм ящыщщ лъэпкъхэр зэрыгъэубыдыныр, яку зэныбжьэгъугъэ дэлъыным цIыхубэр къыхуеджэныр. Гуапэщ ди журналистхэм мыхьэнэ ин зиIэ а Iуэхугъуэм гулъытэшхуэ зэрыхуащIыр, — жиIащ Даур Борис къыщыпсалъэм.
Зи щIыхьыр къыхагъэща журналистхэри фIыщIэ псалъэ куэдкIэ пэджэжащ зэпеуэм и къызэгъэпэщакIуэхэм, гулъытэ гуапэ къахуэзыщIахэм яхуэгъэзауэ.
АБИДОКЪУЭ Люсанэ
