Мы гъэм Зыуэ щыт къэрал экзаменыр еджакIуэхэм зэрырагъэтыну щIыкIэм щагъэгъуэзэн мурадкIэ, гъатхэпэм и 21-м, зи № 1014 экзамен тыпIэм адэ-анэхэм драгъэкIуэкIащ гъэ къэс зэхашэ «Зэгъусэу дот. Адэ-анэхэм ЕГЭ щат махуэ» хъыбарегъащIэ-гурыгъуазэ акцэр.
2024 гъэм курыт еджапIэхэр къэзыухыну ныбжьыщIэхэм я гупыжкIэ ят хъуну экзаменхэм я гугъуагъыу щытынум, абыхэм жыпхъэу яIэнум зыкIи къыкIэрымыхуу, адэ-анэхэм тхыдэмкIэ щIэныгъэу яIэр кърагъэпщытэжащ. Мы Iуэхур зэфIахын папщIэ ягъэхьэзыращ тхыдэмкIэ экзамен зэратыну лэжьыгъэ кIэщI цIыкIухэр, дэтхэнэри зэщымыщу зэхэлъхьауэ.
Къыхалъытащ экзаменым зыхуэгъэхьэзырынымрэ егъэкIуэкIынымрэ пыщIа дауэдапщэхэр: экзаменым хэтынухэр щIатхащ, щIаплъыкIащ, инструктаж драгъэкIуэкIри, ЕГЭ жыпхъэм ит лэжьыгъэхэр къызэращIынури гурагъэIуащ. Экзаменыр къызэзыгъэпэщахэм адэ-анэхэр щагъэгъуэзащ къащIыну лэжьыгъэхэм я зэкIэлъыкIуэкIэмрэ зэрахьэ хабзэ- хэмрэ.
Адэ-анэхэм къыхагъэщащ мы акцэр психологие и лъэныкъуэкIэ зэрыщхьэпэр. АтIэ, ЕГЭ-м зыщыхуагъэхьэзыркIэ, еджакIуэхэм мыхьэнэшхуэ зратыпхъэр щIэныгъэу ябгъэдэлъ закъуэракъым, гулъытэ хуамыщIу къагъанэ хъунукъым я гукъыдэжми, я къарум шэч къытрамыхьэнми.
Акцэр тещIыхьащ еджапIэм къыщIэкIынухэмрэ абыхэм я адэ-анэхэмрэ лейуэ ятелъ психологическэ губампIэр техыным, экзамен зэрырагъэкIуэкIыну Iэмалхэм нэхъ гъунэгъу хуэщIыным.
Зи гугъу тщIы Iуэху щхьэпэм хэтахэм ящыщщ ПсэукIэ-Дахэ къуажэм и Iэтащхьэ Кэп Мурат.
ЛЫХЬ Тимур
