Куэд щIауэ районым, къуажэм щыпсэухэр зыпэплъа дауэдапщэр, Адыгэ — Хьэблэ къуажэм дэт пэщIэдзэ еджапIэм и бжэр щIэрыщIэу къызэIухыжыныр егъэджакIуэхэмрэ еджакIуэ цIыкIухэмрэ я гуфIэгъуэшхуэм щIэту къызэрагъэпэщащ.
ПIалъэ кIэщIым къриубыдэу абдеж щрагъэкIуэкIа зэгъэзэхуэжыныгъэ лэжьыгъэхэр яухри, здеджэ- ну щIыпIэкIэ мытыншхэр я «унэм» къекIуэлIэжащ.
ГуфIэгъуэ зэхыхьэм къеблэгъащ Къэрэшей-Черкес Республикэм и ЦIыхубэ ЗэIущIэм (Парламентым) и депутат, лъэпкъ политикэмрэ хэгъуэгущIыб зэпыщIэныгъэхэмрэкIэ комитетым и тхьэмадэм и къуэдзэ, КъЧР-м и Адыгэ Хасэ лъэпкъ жылагъуэ зэщIэхъееныгъэм и тхьэмадэ Аслъэнхэ Алий, Парламентым и депутат Дзыуэ Заур, КъЧР-м егъэджэныгъэмрэ щIэныгъэмрэкIэ и министрым и къуэдзэ Шаманов Щэмил, РИПКРО-м и ректор Гурин Александр, УФ-м просвеще- нэмкIэ Министерствэм и эксперт педагогическэ советым хэт Капалкинэ Светланэ, нэгъуэщIхэри.
ХьэщIэхэм фIэхъус псалъэкIэ захуигъэзащ Адыгэ-Хьэблэ район администрацэм и Iэтащхьэ IэнатIэр пIалъэкIэ зыгъэзащIэ Астэжь Мыхъутар.
— Егъэджэныгъэм зегъэужьынымкIэ къэрал программэм лъэкIыныгъэ лъэщ къыдет ди еджапIэхэр зэманым декIуу зэтедгъэпсыхьэнымкIэ. НобэкIэ ди районым егъэджэныгъэ IуэхущIапIи 6 щызэдгъэзэхуэжагъэххэщ. Ар ехъулIэныгъэ къызэрымыкIуэщ.
