МахуэщIым къеблэгъахэм яхъуэхъукIэрэ, Темрезов Рэшид къыхигъэщащ илъэс блэкIар – къэралым и тхыдэм и зы напэкIуэцIу къызэрызэднэкIар. И хэкуэгъухэм фIыщIэ яхуищIащ Урысейми, Къэрэшей-Черкесми я зыужьыныгъэм хуащI хэлъхьэныгъэм папщIэ, илъэсыщIэмкIэ, мамырыгъэкIэ, ехъулIэныг ъэщIэхэмкIэ яхъуэхъуащ.
Мы махуэм нэрыбгэ 28-м къэрал нагъыщэ лъагэхэр хуагъэфэщащ. Апхуэдэу, «Заслуженный работник пищевой индустрии КЧР» щIыхьыцIэр къыхуагъэфэщащ Хъупсырокъуэ Алий, «За- служенный тренер КЧР» ДыщэкI Зураб, «Заслуженный экономист КЧР» Уэз Уэзир, «Заслуженный артист КЧР» Мысрокъуэ Заурбэчрэ Хьэжырокъуэ СулътIанрэ.
Республикэм и лIыщхьэм къызэрыхигъэщамкIэ, дэтхэнэми илэжь Iуэхум жэуаплыгъэ лъагэкIэ бгъэдыхьэным, республикэм и зыужьыныгъэмкIэ мыхьэнэшхуэ иIэщ.
«Фэ фхуэдэхэращ зи фIыщIэр ди Хэку ЦIыкIум зэрызиужьыр, ди цIыхухэм я гъащIэр зэрефIакIуэр, фэ фщыщ дэтхэнэри къыдэкIуэтей щIэблэмкIэ щапхъэ зэрыримыкъу щыIэкъым. Къэрэшей-Черкесыр сыт щыгъуи цIыху зэчиифIэхэмкIэ, нагъыщэ лъагэхэр зыхуэфащэхэмкIэ къулейт, ноби аращ», — жиIащ Темрезов Рэшид.Республикэм и лIыщхьэм къэрал нагъыщэ лъапIэр — «За заслуги перед Карачаево-Черкесской Республикой» бгъэхэIур зритахэм ящыщщ ди лэжьэгъу, «Къарачай» газетым и зы къудамэм и редактор Мамчуевэ Динэ. ГЪУКIЭКЪУЛ Иринэ