Черкесск къалэм дэт печатым и Унэм щагъэлъэпIащ хэгъуэгум къыщыдэкI лъэпкъ газетхэм, тхылъ тедзапIэм я лэжьакIуэхэр. Дауэдапщэр къызэрагъэпэщащ журналистхэмрэ тхылъхэр дунейм къытезыгъэхьэхэмрэ я IэщIагъэ махуэщIым — печатым и Махуэм — ипкъ иту.
МахуэщIыр зейхэм яхъуэхъуну къеблэгъащ Къэрэшей-Черкесым лъэпкъ IуэхухэмкIэ, цIыхубэ зэпыщIэныгъэхэмрэ печатымрэкIэ и министр Есенеев Мурат, Урысейм и журналистхэм я Союзым и хэгъуэгу къудамэм и тхьэмадэ Тхьэгъэпсэу Увжыкъуэ, республикэ профсоюз зэгухьэныгъэм и унафэщI Айбазовэ Раисэ, ЛДПР партым хэгъуэгум щиIэ къудамэм и пашэ Чайка Александр сымэ. — Урысейм и прессэр лIыщIыгъуэ бжыгъэ хъуауэ цIыхухэм хъыбархэр янэхьэсынымкIэ, тхыдэ фэеплъыр хъумэнымкIэ, жылагъуэм и гупсысэр узыншэу щытынымкIэ щхьэпэшхуэ хуэхъу Iэмалщ. Нобэ, цифровой технологиехэм я лъэхъэнэм, журналистикэм хэтхэм лантIагъ яхэлъу, пасэрей теплъэмрэ иджырей Iэмалхэмрэ зэдагъэгъуэгурыкIуэн ялъокI.
Махуэ къэс фи щIэджыкIакIуэхэм хъыбар пэжхэр, гъэщIэгъуэнхэр янывохьэс, къэралым къыщыхъу Iуэхугъуэхэр цIыхубэм зэхэщIыкIауэ ягурывогъаIуэ, ди анэдэлъхубзэр фохъумэ, абы зиужьынымкIэ лэжьыгъэшхуэ ивогъэкIуэкI, лъэпкъхэм ди щэнхабзэ, хабзэ щIэинхэр мыкIуэдыжыным фытолажьэ. Фи тхыгъэхэр сыт щыгъуи фи щIэджыкIакIуэхэм я псэм нэсу щытыну сывохъуэхъу.
Сыхуейщ фи лэжьыгъэм фрипагэу фыщытыну, гукъыдэж сыт щыгъуи фиIэну! – жиIащ министрым. Хэгъуэгум и журналистхэм я Союзым и унафэщIым и хъуэхъум къыхигъэщащ печать СМИ-хэр иджырей журналистикэ псом и лъабжьэу зэрыщытыр. Хъуэхъу псалъэ гуапэхэм къыдэкIуэу, мы махуэм зи IэщIагъэ махуэ щIыр зыгъэлъапIэхэр щIыхь нагъыщэхэмкIэ къыхагъэщащ. Гуапэ зэрытщыхъуну, зи цIэ къраIуахэм ящыщщ «Черкес хэку» газетым и лэжьакIуэхэу Дэбагъуэ Хьэтызэ, Аслъэныкъуэ Мадинэ, ЛIымаху Iэсят сымэ. Мы махуэм печать журналист жылагъуэм гулъытэ къахуищIащ икIи хъуэхъукIэ, саугъэтхэмкIэ игъэгуфIащ хэгъуэгум и профсоюзхэм я унафэщIым.
ЧЫРБЫЖ Иринэ
Больше на Черкес хэку
Подпишитесь, чтобы получать последние записи по электронной почте.
