УФ-м и Президент Путин Владимир ядищтащ 2026 гъэр Урысейм щыпсэу лъэпкъхэм я зэкъуэтыныгъэм и Илъэсу гъэлъэпӀэным теухуа къыхэлъхьэныгъэр икӀи пщэрылъ яхуищӀащ абы теухуа унафэхэр ягъэхьэзырыну. Ар наӀуэ щыхъуащ лъэпкъ зэхущытыкӀэхэмкӀэ Президентым и деж щыӀэ Советым и зэӀущӀэм. «Жылагъуэ, лъэпкъ зэкъуэтыныгъэр тхъумэн хуейщ.
Егъэлеиныгъэ хэмылъу, аращ нэхъ мыхьэнэ ин дыдэ зиӀэр, ди щхьэхуитыныгъэм и тегъэщӀапӀэ нэхъыщхьэр. Лъэпкъ зэкъуэтыныгъэ нэс, зауэлӀ зэкъуэшыныгъэм и щапхъэ нобэ зауэ операцэ хэхам къыщагъэлъагъуэ ди лӀыхъужьхэм, сэлэтхэмрэ офицерхэмрэ. Ахэр зэгъусэу Урысейм, пэжыгъэм папщӀэ мэзауэ, зэхэуэхэм къыщагъэлъагъуэ псори зы лъэпкъыу дызэрыщытыр. ЦӀыхухэр зэщызыхъуэну, лъэпкъхэм я кум зэгурымыӀуэныгъэ къыдэзылъхьэну пылъхэм я мурад фӀейхэр зэпыудын хуейщ. Ахэр езыхэр хамэ къэралхэм щыӀэщ, ахъшэкӀэ къызэрагъэпэщри, хамэ къэрал спецкъулыкъухэм къаутӀыпщ.
Мурадыр нэрылъагъущ — ди зэкъуэтыныгъэр зэпыудын Абы щхьэкӀэ ди бийхэм сыт хуэдэ Ӏэмали къагъэсэбэп. Урысейм и къэралщӀыбым къыщызэрагъэпэщ лъэпкъыбэ зэгухьэныгъэхэр, лъэпкъ купсэ нэпцӀхэр. Ауэ пэжу жыпӀэмэ, ахэр ди бийхэм къытхуагъэхьэзыра хъыбарегъащӀэ зауэм и Ӏэщэ къудейщ. Фэ фыщыгъуазэщ абы: иджы нэхъыбэрэ зытепсэлъыхьыр Урысейм и «деколонизацэращ», пэжу жыпӀэмэ, Урысей Федерацэр зэкъуэудынращ, стратегическэу зэхэкъутэныгъэр къытхуахьынращ.
Абы и гугъу зэкъым зэрызэхэтхар, итӀани, илъэс пщӀы бжыгъэхэм я мызакъуэу, лӀыщӀыгъуэхэм къриубыдэу зыри яхузэфӀэмыкӀами, жыпӀэ хъунущ, итӀани бийм и мурад фӀейхэр къызэримыгъэувыӀар — шынагъуэхэр къытщхьэщытщ. Ахэр къыхэтлъытэн хуейщ, быдэу, зэкӀэлъыкӀуэу, Ӏущыгъэ хэлъу ди Ӏуэху длэжьын хуейщ, шынагъуэхэмрэ гъэунэхуныгъэхэмрэ яхуэфащэу дапыкъуэкӀыпхъэщ.
А псори къигъэлъэгъуэн хуейщ лъэпкъ политикэм и Стратегием и редакцэщӀэми», — къыхигъэщащ ди къэралым и лӀыщхьэм.
Больше на Черкес хэку
Подпишитесь, чтобы получать последние записи по электронной почте.
