Нэхъыжьым —гулъытэ
ХЪУПСЫРОКЪУЭ Зое Айтэч и пхъур фокIадэм и 20-м илъэс 90 ирикъуащ. Апхуэдэ махуэщIымкIэ Зое ехъуэхъуну къыхуеблэгъащ Хьэбэз къуажэм и администрацэм и Iэтащхьэ Туаршы Беслъэнрэ администрацэм и IэщIагъэрылажьэ нэхъыщхьэ Туаршы Фатимэрэ. Абыхэм нанэм фIыщIэ хуащIащ и гъащIэ гъуэгум ипкъ иту игуэщIа гуащIэдэкIым папщIэ, саугъэтхэр тыгъэ хуащIащ икIи узыншагъэ быдэ иIэу илъэс куэдкIэ иджыри псэуну ехъуэхъуахэщ.
Хъупсырокъуэ Зое, нэгъуэщI нэхъыжь куэдым яхуэдэу, и гъащIэр тыншыгъуэу ирихьэкIауэ пхужыIэнукъым. АтIэ, абы и сабиигъуэр зауэ илъэс дыджхэм техуащ, и щIалэгъуэри лэжьыгъэ гугъур псоми я натIэ щыхъуа лъэхъэнэщ зыхиубыдар. Зое курыт еджапIэм щеджащ, иужькIэ бухгалтерхэм я курсхэр къиухыжащ. Унагъуэ ихьа нэужь, ар Хьэбэз къуажэм куэшыжри, шхапIэм щылэжьащ. Зое Хьэбэз районым и социально-экономическэ зыужьыныгъэм хэлъхьэныгъэфI хуэзыщIахэм языхэзщ. И гуащIэдэкI гъуэгуанэм папщIэ абы щIыхь тхылъхэр, фIыщIэ тхыгъэхэр, «Ветеран труда» медалыр къыхуагъэфэщауэ щытащ. «Отличник советской торговли», «Слава труду» медалхэр, къинэмыщIауэ, Хэку зауэшхуэм и ТекIуэныгъэ махуэр щагъэлъапIэ юбилей илъэсхэми нагъыщэ зэхуэмыдэхэр къратащ. Лэжьыгъэм къыдэкIуэу щIэх фызабэу къэна Зое бынитху ипIащ: и къуитхуми IэщIагъэ яригъэгъуэтыфащ. И илъэс 90-м Зое акъыл жанщ, гъащIэр фIыуэ елъагъу. Тхьэм нанэм и псэр гуфIэу, и гур мамыру куэдрэ иджыри игъэпсэу и быным ящхьэщигъэт!
Зыгъэхьэзырар ЧЫРБЫЖ Иринэщ
Больше на Черкес хэку
Подпишитесь, чтобы получать последние записи по электронной почте.
