Адыгэ-Хьэблэр нэхъ лъэпкъ куэду зэдэпсэу районхэм ящыщщ. Мыбдежым мамыру щызэдопсэу адыгэхэр, абазэхэр, къэрэшейхэр, урысхэр, нэгъуейхэр, алыджхэр, ермэлыхэр, нэгъуэщӏ лъэпкъхэри. Абы и щыхьэтщ гуапагъэкӏэ гъэнщӏауэ екӏуэкӏа шхыныгъуэ фестивалри.
Мы махуэм утыку кърахьащ щхьэж и лъэпкъ шхыныгъуэхэр, жумартагъыр, щэнхабзэ хъугъуэфӏыгъуэхэр. Адыгэ шхыныгъуэхэр берычэту къигъэлъэгъуащ Эрсакон къуажэм. Мыбдежым ди лъэпкъ шхыныгъуэхэм я теплъэхэм нэхъри узыIэпишэт, я гуакIуагъымрэ мэ IэфIымрэ къызэхуэсахэр зыбгъэдашэу. СыткIэ уемыхъуэпсэнрэт джэд шыпс тхъуэплъым, къэлътамэм, хьэлыуэм… Гъунэгъу лъэпкъхэм я Iэнэхэми къыщытлъэгъуащ ди кхъуейжьапхъэри, ди хьэлыуэри, ди лыбжьэм ещхь шхыныгъуэхэри. АтIэ, ар пхуэгъэщIэгъуэнукъым, сыту жыпIэмэ, апхуэдиз илъэс бжыгъэкIэ зэхэшыпсыхьыжауэ зэдэпсэу лъэпкъхэм шхыныгъуэкIи, хабзэкIи зэмыхъуажэу ялъэкIкъым.
Щхьэж и фIым щыщ зыхелъхьэ, и гъунэгъум догуашэ. Арагъэнт мы махуэщIри районым щызэдэгъуэгурыкIуэ лъэпкъ бжыгъэм я теплъэ екIу щIэхъуари! Абы и щыхьэту Эрсакон къуажэ администрацэм и Iэтащхьэ Къанкъуэщ Арсени къытхуиIуэтащ: — «Узэкъуэтмэ — улъэщщ» — жеIэр адыгэм. АтIэ, нобэрей махуэм ар нэрылъагъу тхуищIащ. Адыгэм зэи сыт хуэдэрей лъэпкъри Iумпэм ищIакъым, дэтхэнэри зыдригъэхьэхыу, иригъэблэгъэфу, игъэхьэщIэфу щытащ. Адыгэ-Хьэблэ районым щыпсэу лъэпкъхэр зэкъуэту дызэдопсэури, нобэ флъэгъуари абы щыхьэт тохъуэ. МахуэщIыр шхыныгъуэхэм къанэмыщIауэ, концерт дахащэкIэ ягъэбжьыфIащ.
Мыбдеж зыкъыщагъэлъэгъуащ районым щылажьэ творческэ гупхэм, къэфакIуэхэм, уэрэджыIэ цIэрыIуэхэм.
АСЛЪЭНЫКЪУЭ Мадинэ
Больше на Черкес хэку
Подпишитесь, чтобы получать последние записи по электронной почте.
