Москва къалэм и ВДНХ-м «Дружба народов» лъэпкъ хьэщIагъэ фестивалыр щокIуэкI. Ар теухуащ Урысейм щыпсэу лъэпкъхэм я зэкъуэтыныгъэм и Илъэсымрэ СНГ-р илъэс 35-рэ зэрырикъумрэ. ЩхъуэкIэплъыкIэу зэхэт фестиваль гъэщIэгъуэным КъЧРми и Iыхьэ хилъхьащ.
Фестивалым ипкъ иту «Карачаево-Черкесия: гостеприимный горный край» уэрам сурэт гъэлъэгъуэныгъэм зрагъэубгъуащ. Абы нэIурыт ещI ди республикэм и щIыуэпс телъыджэри, ижь лъандэрэ къыдэгъуэгурыкIуэ хабзэхэри, мыхьэнэ зиIэ ди щIыпIэ дахэхэри. Сурэт къэс кIэщIэт QR-кодым и фIыгъэкIэ хьэщIэхэм лъэкIыныгъэ ягъуэт абы къыщыгъэлъэгъуам нэхъ куууэ нэIуасэ зыхуащIыну. Фестивалым и щэнхабзэ программэм къриубыдэу Къэрэшей-Черкесым и уэрэджыIэхэм зыкъагъэлъэгъуащ, лъэпкъ къафэхэмкIэ мастер-классхэр ирагъэкIуэкIащ.
КъинэмыщIауэ, «Непокоренная бурка» спектаклри абдеж щагъэлъэгъуащ. Махуэр зэхуащIыжащ щIэблэ зэпыщIэныгъэм, анэдэлъхубзэмрэ хабзэмрэ хъумэным ятеухуауэ ди хэгъуэгум къыщыдагъэкIауэ щыта «Испытание аулом» фильм гъэлъэгъуэныгъэмкIэ. Къэрэшей-Черкесыр фестивалым хэтыныр къызэригъэпэщащ КъЧР-м и лIыкIуэу сыт щыгъуи Москва къалэм щыIэхэмрэ ди хэгъуэгум щэнхабзэмкIэ и Министерствэмрэ.
Больше на Черкес хэку
Подпишитесь, чтобы получать последние записи по электронной почте.
