2025 гъэм медицинэм и лэжьакIуэ 19-м «Земский доктор» программэм ипкъ иту лэжьэн щIадзэнущ. «Къуажэхэм, жылагъуэхэм IэщIагъэ IэпщIэлъапщIагъ зыбгъэдэлъ медицинэ лэжьакIуэхэр ешэлIэн мурадыр нэхъыщхьэу, абы ипкъ иту а щIыпIэхэм IэщIагъэлIхэр зэрыримыкъум епха лъэпощхьэпор IугъэкIуэтын папщIэ, пыдощэ республикэм щыдгъэзащIэ «Земский доктор» программэм.
Ар Урысейм и Президент Путин Владимир и унафэкIэ 2030 гъэм нэгъунэ лэжьэну траухуащ, икIи къэралым и цIыхухэм я узыншагъэр хъумэным ехьэлIа зыужьыныгъэмкIэ мыхьэнэшхуэ зиIэ лъэныкъуэгъазэщ», — щитхащ республикэм и лIыщхьэм социальнэ зэпыщIэныгъэхэм.
ЖыпIэнурамэ, «Земский доктор» программэм лэжьэн зэрыщIидзэрэ, 2018 — 2024 гъэхэм къриубыдэу, Къэрэшей-Черкесым лэжьапIэ IэнатIэ Iухьащ медицинэм и IэщIагъэрылажьи 180-рэ. Жэуаплыгъэ зыхэлъ а IэщIагъэм ирилэжьэн мурадкIэ, мы гъэми IэщIагъэ IэпщIэлъапщIагъ зыбгъэдэлъ дохутыр ныбжьыщIэ 19 узыншагъэр хъумэным и бэзым хэхьэнущ. Къуажэхэм щылэжьэну кIуэ дохутырхэм сом мелуан, абы щIыгъуу, республикэ бюджетым къыхэкIыу сом мини 100 зэ тыгъуэу къратынущ. «Ди къалэныр — дэнэ щIыпIи щыпсэу ди цIыхухэм фIагъ лъагэ зиIэ медицинэ дэIэпыкъуныгъэ, IэщIагъэлIхэм я IэпщIэлъапщIагъ ядгъэгъуэтынращ.
Абы папщIэщ мы программэр щIэлажьэр. ДяпэкIи тхузэфIэкI тщIэнущ щIэныгъэрэ IэпщIэлъапщIагърэ зыбгъэдэлъ медицинэм и лэжьакIуэхэр къуажэхэм дэт, узыншагъэр хъумэным епха IуэхущIапIэхэм етшэлIэным, апхуэдэуи, абыхэм папщIэ здэлэжьэн щытыкIэфIхэр къызэдгъэпэщыным хуэунэтIауэ», — къыхигъэщащ республикэм и лIыщхьэм.
Больше на Черкес хэку
Подпишитесь, чтобы получать последние записи по электронной почте.
