Зэкъуэтыныгъэр — ди къарущ

Хэку зауэшхуэм совет цIыхубэм ТекIуэныгъэ Иныр къызэрыщихьрэ илъэс 80 зэ- рырикъум хуэкIуэу, накъыгъэм и 1-м Черкесск къалэм и гъущI гъуэгу станцым Урысейпсо акцэ щызэхэтащ.

Республикэм къихьа агитационнэ мафIэгур вокзалым Iутащ 9:00-13:00 сыхьэтхэм къриубыдэу. Зауэм теухуауэ лъэныкъуэ зэхуэмыдэхэм нэIуасэ ухуэзыщI вагонхэм махуэ 75-кIэ зэпаупщIынущ километр мин 33-м щIигъу, щыхьэщIэнущ Урысей Федерацэм и хэгъуэгу 61-м я къалэ 75-мрэ къуажэ зыбжанэмрэ.

Ди хэкуэгъухэм зрагъэлъэгъуащ зауэ зэманым хуэгъэзауэ сэтей къащIа архив тхылъхэр здызэхуэхьэса тематическэ вагонхэр, УФ-м IэщэкIэ Узэда и Къарухэм ихъума экспозицэ зэмылIэужьыгъуэхэр, Хэку зауэшхуэм щыгъуэ советыдзэм къигъэсэбэпу щыта Iэщэфащэхэр, нобэкIэ зауэ операцэ хэхар здекIуэкI щIыпIэхэм къраша техникэр, абдеж щызыIэрагъыхьа къуентхъыр. «ЯгъэIэпхъуэ музейр — ар дэри, нэхъыжьхэми, къыдэкIуэтей щIэблэми блэкIам, дяпэ итахэм ТекIуэныгъэр къэхьыным уасэу щIатам пщIэ хуэтщIыну, ар дигу идгъэлъыну дыкъыхуезыджэ къудейкъым. Ар совет зауэлIхэмрэ тылым и лэжьакIуэхэмрэ, ди цIыхубэм лIыгъэу зэрахьам, ноби СВО-м хэту я дадэхэмрэ дадэшхуэхэмрэ я лъагъуэм ирикIуэхэм я хахуагъэм и нагъыщэщ», — агитационнэ мафIэгум теухуауэ щитхащ и телеграмканалым КъЧР-м и Iэтащхьэм.

Мы акцэм ипкъ иту, контр-адмирал Гринкевич Александр щIыхь зыпылъ къалэн игъэзащIэкIэрэ, «ДэIэпыкъуэгъу зэрыхъумрэ гущIэгъу зэрыхэлъымрэ» медалымкIэ ди хэкуэгъу жыджэрхэм я цIэ ириIуащ, зауэ операцэ хэхам хэт къулыкъущIэхэм защIэгъэкъуэнымкIэ сэбэпышхуэ къызэрахьым папщIэ.

Нагъыщэ лъагэр зылъысахэм ящыщщ КъЧР-м и Правительствэм и тхьэмадэм и къуэдзэ Поляков Евгений, Черкесск дэт сымаджэщ-реабилитационнэ купсэм и дохутыр нэхъыщхьэ Темрезов Бориспий, республикэ къалащхьэм и мэр Баскаев Алексей, Хэку зауэшхуэм и ветеран Беленький Макс, щIалэгъуалэм зауэ-хэкупсэ гъэсэныгъэ здыдрагъэкIуэкI «Авангард» купсэм и методист Эркенов Ибрэхьим, а купсэм и хэгъуэгу къудамэм и унафэщI Баев Уэсмэн, щIалэгъуалэ добровольчествэм зегъэужьынымкIэ Купсэм и унафэщI ХьэкIырэ Ася, «Воин» зауэхэкупсэ клубым и унафэщI Костеров Алексей, хыхьэхэкIырылажьэхэу Шыбзыхъуэ Мусэрэ Шыдхэ Зурабрэ. «Зэкъуэтыныгъэр — фэеплъым. Къарур — лIыхъужьыгъэм!» Урысейпсо акцэр ирагъэкIуэкI УФ-м зыхъумэжыныгъэмкIэ и Министерствэм и жэрдэмкIэ, абы къыдоIэпыкъу «Урысей гъущI гъуэгухэр» ОАО-р.

ЛЫХЬ Тимур