Нэмыцэ фашизмэр Хэкум къиIэбащ лъэпкъхэр гъэрыпIэм ириубыдэу игъэунэхъун папщIэ. Тедгъэплъэнкъым ахэр дэ абы! Ди цIыхубэр къызэрыIэтауэ и социалистическэ къэралыр ехъумэж. Сэ, плъыжьыдзэ зауэлIым щыщыр, Хэкум хуэсщIа тхьэлъанэм сыхуэпэжщ, щIыхуэу стелъ къулыкъу пщэрылъхэр сопшын. Сызыхэта зэхэуэхэм ящыщ зым деж лагъымщIэххэм зауэ къалэн къытхуагъэуват: бийм и щIыбагъ дыкъыдыхьэу, ахэр зэрызекIуэ лъэмыжыр къэдгъэуэну, Ростов кIуэ гъуэгум зэрытемыхьэфынум, я мотоколоннэри дэубыдауэ къызэрынэнум хуэдэу. Шынэ зымыщIэ щIалий жэщ кIыфIым дыхэту дежьащ ди къалэн дгъэзэщIэну. Лъэмыжым хьэлъакъуиплIу депщылIэщ, лагъымхэр кIэщIэтлъхьэри, япэу къытехьэну нэмыцэ машинэхэм дапэплъэу, пабжьэм зыхэдгъэпщкIуащ. Куэди текIатэкъым жэрыжэу лъэмыжым къытелъэда танк псынщIэр, мотоциклистхэр, машинэхэмрэ лъэсыдзэмрэ уэгум щыдредгъэпхъеям.
Нэхущэм деж ди лъэсыдзэм зыкъиIэтащ Ростов щIыналъэм зыщызыгъэбыдахэм ебгъэрыкIуэну. Сэ, мы щыпIэм щыпсэухэм иджы сарихъумакIуэщи, адэкIи фашист бзаджэнаджэхэр зэрызэтезукIэным сыпылъщ, Хэкур къызэрысщыгугъыр согъэпэжыж. Си къуэхэм, Iыхьлырэ ныбжьэгъуу сиIэм схуащIэупщIэж. Ди адресыр «губгъуэ пощтщ». Зыри къэвмытх, куэд мыщIэу нэгъуэщI щIыпIэ дыIэпхъуэнущ.
Натхэр ТЕМЫР Сослъэнбэчщ, 1943 гъэ
Больше на Черкес хэку
Подпишитесь, чтобы получать последние записи по электронной почте.