Зэдэлэжьэныгъэр ягъэбыдэу

КъЧР-м и Ӏэтащхьэ Темрезов Рэшид лэжьыгъэ ӀуэхукӀэ ӀущӀащ Федеральнэ антимонопольнэ къулыкъум и КъЧР Управленэм и унафэщӀ КIУАНТIЭ Артур.

Ахэр тепсэлъыхьащ ведомствэм и нэӀэ-кӀэлъыплъыныгъэ лэжьыгъэм кърикӀуахэм, Управленэм и лэжьыгъэм псом япэ иригъэщын хуей унэтӀыныгъэхэм, республикэ властым и къулыкъухэмрэ антимонопольнэ къулыкъумрэ зэрызэдэлэжьэну Ӏуэхугъуэхэм, нэгъуэщӀхэми. КIуантIэ Артур тепсэлъыхьащ Къэрэшей-Черкесым хыхьэ Архъыз зыгъэпсэхупӀэм щекӀуэкӀа, Урысейм и ФАС-м и щӀыналъэ къулыкъухэм я хэгъуэгузэпх семинар-зэӀущӀэм кърикӀуахэм. Ар теухуауэ щытащ Ипщэ, Ищхъэрэ Кавказ федеральнэ хэгъуэгухэм, Донецк, Луганск ЦӀыхубэ Республикэхэм, Запорожье, Херсон щӀыналъэхэм конкуренцэм зыщегъэужьыным. «Апхуэдэ семинар ди республикэм зэрыщекӀуэкӀам мыхьэнэшхуэ иӀэщ. Абы Урысейм и ФАС-м и хэгъуэгу Управленэхэм я зэдэлэжьэныгъэр зэригъэбыдэным и мызакъуэу, къэрал антимонопольнэ политикэр гъэзэщӀэнымкӀэ я ӀэзагъымкӀэ зэдэгуэшэну, экономикэ щытыкӀэщӀэхэм къыхэкӀыу конкуренцэм зегъэужьынымкӀэ зыуэ щыт бгъэдыхьэкӀэхэр къызэрагъэпэщыну лъэкӀыныгъэ яӀащ», — республикэм и лӀыщхьэм МАХ-м щиӀэ напэкӀуэцӀым щитхащ. КъинэмыщӀауэ, зэӀущӀэм гулъытэ хэха щыхуащӀащ социальнэ мыхьэнэшхуэ зиӀэ хьэпшыпхэмрэ Ӏуэхутхьэбзэхэмрэ я уасэхэм кӀэлъыплъыным, хэгъуэгу сатухэм деж конкуренцэм защӀэгъэкъуэным. Ахэр щхьэхуэу къытеувыӀащ уасэхэр щхьэусыгъуэншэу къэӀэтыным пэщӀэтыным, сату щытыкӀэхэм псынщӀэу зэрызахъуэжым зэрыпэщӀэувэным хуэунэтӀа Ӏуэхугъуэхэм. ДЗЭМЫХЬ Маринэ