Иджыблагъэ Къэрэшей-Черкесым и Ӏэтащхьэ Темрезов Рэшидрэ УФ-м и Федеральнэ ЗэӀущӀэм ФедерацэмкӀэ и Советым Къэрэшей-Черкесым къыбгъэдэкӀыу хэт сенатор Къэзэнокъуэ Кърымрэ зэӀущӀащ.
Ахэр тепсэлъыхьащ республикэм и социально-экономикэ зыужьыныгъэм, зауэ операцэ хэхам хэтхэмрэ абыхэм я унагъуэхэмрэ защӀэгъэкъуэным, къинэмыщӀауэ, сенаторыр зэпымыууэ зыхэт унэтӀыныгъэхэм ящыщ зым — Урысейм и дзэ къулыкъущӀэхэмрэ къэралым и гъунапкъэ щӀыналъэхэмрэ гуманитар дэӀэпыкъуныгъэхэр яхуегъэшэным теухуа Ӏуэхугъуэхэм.
АдэкӀэ Къэзэнокъуэ Кърым къиӀуэтащ и хабзэгъэув лэжьыгъэм, профиль комитетым щилэжьым, ди къэралым и зыхъумэжыныгъэм хуэгъэзауэ правовой базэр гъэбыдэным, и шынагъуэншагъэмрэ хьэлэмэтхэмрэ хъумэным хуэунэтӀа жэрдэмхэр гъэхьэзырыным зэрыхэтым. Щхьэхуэу къытеувыӀащ Урысейм и Президент Путин Владимир игъэува, мыхьэнэшхуэ зиIэ къалэнхэр гъэзэщӀэнымкӀэ, къэралым и хэгъуэгухэм, абыхэм ящыщу Къэрэшей-Черкесми, я сэбэп зыхэлъхэр хъумэнымкӀэ щӀыналъэхэм я палатэу щыт ФедерацэмкӀэ Советым и лэжьыгъэм. Федеральнэ властым и къулыкъухэм ядэлажьэкӀэрэ икӀи хабзэгъэув унафэхэр гъэхьэзырыным хэткӀэрэ, Парламентым и Ищхьэ палатэр щӀэгъэкъуэн мэхъу республикэм и щытыкӀэ щхьэхуэхэр къыхалъытэнымкӀэ, республикэм и социально — экономикэ зыужьыныгъэм зыщӀэгъэкъуэнымкӀэ.
ЛъэныкъуитӀыр тепсэлъыхьащ сенаторыр Къэрэшей-Черкесым щыпсэухэм зэраӀущӀам кърикӀуахэм цӀыхухэм я зыхуэгъэзэныгъэхэм жэуап зэрыригъэгъуэтам. Къыхэдгъэщынщи, а лэжьыгъэр зэпымыууэ йокӀуэкӀ, цӀыхухэм къабгъэдэкӀа сыт хуэдэ зыхуэгъэзэныгъэри сенаторым и нэӀэм щӀэтщ, унафэхэр псынщӀэу къащтэ, федеральнэ къулыкъухэм быдэу зэрадэлажьэм и фӀыгъэкӀэ.
Зэпсэлъэныгъэ нэужьым, Къэрэшей-Черкесым и социально-экономикэ зыужьыныгъэм хуищӀ хэлъхьэныгъэм папщӀэ, Урысей Федерацэм и Федеральнэ ЗэIущӀэм ФедерацэмкӀэ и Советым и унафэщӀ Матвиенко Валентинэ къыбгъэдэкӀыу Къэзэнокъуэ Кърым ди республикэм и лIыщхьэм ФӀыщӀэ тхылъ иритащ. «Къэрэшей-Черкесым социальнэ экономикэ я лъэныкъуэкӀэ зегъэужьыным хуэсщI хэлъхьэныгъэр къыхилъытэкӀэрэ, Урысей Федерацэм и Федеральнэ ЗэIущIэм ФедерацэмкӀэ и Советым и унафэщӀ Матвиенко Валентинэ къысхуищӀа гулъытэр сэркIэ щIыхьышхуэщ икIи гуапэ дыдэ сщыхъуащ. Ди зэдэлэжьэныгъэм уасэ лъагэ зэрыхуищӀам папщӀэ фӀыщӀэ хузощӀ Матвиенко Валентинэ Ивановнэ. ФедерацэмкӀэ Советым и спикерыр сыт щыгъуи щIэгъэкъуэн мэхъу ди хэгъуэгур егъэфӀэкӀуэным ехьэлӀауэ, абы и дэӀэпыкъуныгъэр сыт щыгъуи зыхыдощӀэ», — социальнэ зэпыщIэныгъэхэм щитхащ республикэм и лӀыщхьэм.
Больше на Черкес хэку
Подпишитесь, чтобы получать последние записи по электронной почте.
