Къэрэшей-Черкес Республикэм и Ӏэтащхьэ Темрезов Рэшид лэжьыгъэ ӀуэхукӀэ ӀущӀащ РАНХиГС-м и Ищхъэрэ Кавказ институтым и унафэщӀ, УФ-мрэ КъЧР-мрэ я Жылагъуэ палатэм хэт Лъыс Азэмэт. Ахэр тепсэлъыхьащ къэрал, муниципальнэ ӀэнатӀэм пэрытынухэр гъэхьэзырыным хуэунэтӀауэ Президент академием зэрыдэлэжьэну щӀыкӀэм и лъэныкъуэкӀэ мыхьэнэшхуэ зиӀэ Ӏуэхугъуэхэм. Апхуэдэщ, республикэм и экономикэм и унэтӀыныгъэ нэхъыщхьэхэм я ӀэщӀагъэлӀхэм я зэфӀэкӀым хэгъэхъуэным теухуауэ «Кадры» федеральнэ проектым ипкъ иткӀэ ӀэщӀагъэм ехьэлӀа программэ гуэдзэхэр гъэзэщӀэныр.
«Къэрэшей-Черкесым щыщ студентхэм я гукъыдэжыр зэрылъагэр къыхигъэщащ Лъыс Азэмэт. Абыхэм ящыщ куэдыр Президент, Правительствэ стипендиехэм я стипендиатщ, жылагъуэ проектхэм жыджэру холэжьыхь, дызыгъэгуфӀэращи, я ӀэщӀагъэ къэкӀуэнур республикэм ирапх. ФӀыщӀэ яхуэсщӀащ РАНХиГС-м и лэжьакӀуэ гупым, зауэ операцэ хэхам хэтхэм, «ЛӀыхъужьхэм я зэман» федеральнэ проектым и зы Ӏыхьэу щыт «Къэрэшей-Черкесым и лӀыхъужьхэр» хэгъуэгу программэр гъэзэщӀэнымкӀэ къызэрыддэӀэпыкъуам папщӀэ.
Программэм щхьэпэ зэрыхъур къигъэлъэгъуащ — абы хэтхэм унафэщӀ Ӏэзагъ зрагъэгъуэт, республикэм мыхьэнэшхуэ зиӀэ и къалэнхэр зэфӀэхыным хагъэхьэ. Зауэ Ӏуэхухэм хэта ди ветеранхэм адэкӀи защӀэдгъэкъуэнущ, граждан гъащӀэм я ӀэщӀагъэр къыщагъэсэбэпыфыным папщӀэ щытыкӀэхэр къахузэдгъэпэщынущ. Граждан жылагъуэм и институтхэм я зыужьыныгъэм щхьэхуэу дытепсэлъыхьащ. УФ-м и Жылагъуэ палатэм хэт Лъыс Азэмэт властымрэ жылагъуэмрэ яку дэлъ зэпсэлъэныгъэр гъэбыдэным, лъэпкъхэмрэ щэнхабзэхэмрэ зайгъэужьыным купщӀафӀэу йолэжь.
Урысейм щыпсэу лъэпкъхэм я зэкъуэтыныгъэм и Илъэсымрэ КъЧР-м и псэкупсэ, щэнхабзэ щӀэинхэр хъумэным я Илъэсымрэ хиубыдэу, ди лъэпкъхэм я бзэхэр, щэнхабзэ зэмылӀэужьыгъуэхэр хъумэным хуэунэтӀа а Ӏуэхугъуэм мыхьэнэшхуэ иӀэщ. Къэдгъэлъэгъуа унэтӀыныгъэхэмкӀэ зэдэлэжьэным пытщэну дызэгурыӀуащ. Шэч къытесхьэкъым, ди республикэр РАНХиГС-мрэ Урысейм и Жылагъуэ палатэмрэ зэрадэлажьэм Къэрэшей-Черкесым къыпэщыт кадр, социально-экономикэ упщIэхэр тэмэму зэрызэфӀигъэкӀыфынум», — итхащ КъЧР-м и Ӏэтащхьэм.
КъЧР-м и Iэтащхьэмрэ и Правительствэмрэ я пресс-къулыкъу
Больше на Черкес хэку
Подпишитесь, чтобы получать последние записи по электронной почте.
